Luku 23
23
Jisasina Paerotinte avre'za vu'naza naneke
(Mat 27:1-2,11-14, Mak 15:1-5, Jon 18:28-38)
1Ana maka vahe'mo'za erihantage'za Paerotinte, Jisasina avre'za vu'za, 2amanage hu'za erigafa hu'za naneke hunte'za, tagra konkeno ama ne'mo'a havi kante Jiu vahetia zmareno nevuno, Sisana takesi zgoa omiho nehuno, Agra'agura huno Nagra Kraisina kini mani'noe hu'ne. 3Ana hazageno, Paeroti'a Jisasina anage huno antahigene, Kagra Jiu vahe'mofo kinio? Jisasi'a ana kenona'a anage huno hu'ne, Ha e'i kagraka'a nehane. 4Anante Paeroti'a ugagota prisi vahe'ene, ana vahe kevugura anage huno zmasamine, nagra ama ne'mofompina mago hazenke zama'a kena eri fore osue. 5Hianagi zamagra hu hankveti'za, agra rama'a vahe'mokizmi zmarimpa zmazeri otino, maka Judia kaziga rempi huzamine. Anazamo Galiliti agafa huno amarera ehnati'ne.
Paeroti'a Jisasina avreta Herotinte viho hu'nea naneke
6Paeroti ana naneke nentahino'a, Jisasi'a Galili ne' mani'neo huno hu'ne. 7Hagi Paerotima antahiama, Jisasi'a Heroti kvagrinea mopafinti e'ne nehuno'a, Herotinte huntene. Herotia ana knafina Jerusale emaninegeno huntegeno avare'za vu'naze. 8Herotinte avare'za vzageno, Heroti'a Jisasima negeno'a tusi muse hu'ne. Na'ankure Jisasina agenke'a hakare zupa antahitere nehuno, magokna Agra kaguvaza eri fore hanigena kesue huno antahinegu hu'ne. 9Heroti'a rama'a antahige naneke hianagi, Jisasi'a kenona'a osu mani'ne. 10Hagi ugagota prisi vahe'mo'zane, kasegere ugota hu'naza vahe'mo'za, anante oti'za mani'ne'za, hu hankveti'za Jisasina kegaga hunte'naze. 11Hanki Heroti'ene sondia vahe'ane, Jisasina revatga vatago nehu'za, azanava anteza azeri haviza hute'za, knare avonke kukena eri antaninente'za, huzmantege'za Paerotinte ete avre'za vu'naze. 12Na'ankure znagra kora ha' vahe tro hune manina'ankino, ana knazupage, Paeroti'ene Herotikea erimago znarimpa hu'na'e.
Paeroti'a Jisasina zminea nanenke
13Hagi Paeroti'a ugota prisi vahezgane, kva vahezgane, vahetamine kehutru huno, 14anage huno zmasami'ne, ama ne'ma avretma nagritema aza nekura hutma, vahetamina avreno havikante nevie hutma hazanagi keho, nagrama tamagri tamavuga Agri'ma rezagnena koana, tamagrama hunentaza kemofona agafa'a kena erifore osue. 15Heroti'enena magozahu antahintahi hu'negu, ama nera huntegeno tagritega e'ne. Antahiho, ama ne'ra magore huno ahefriga hazenke osu'ne. 16E'ina hu'negu, kanonkeve amitena atresugeno vugahie huno Paeroti'a hu'ne.
Barabasi katufegeno vu'nea naneke
17[Amanahukna nehazane, kafune kafunena Anumzamo Israeli vahe ozmahe zamagtere'negu antahimi ne'za neknarera, Paeroti'a kina nompinti mago vahe kazufe zamitere nehiane.] 18Hianagi maka vahe'mo'za ranke hu'za kezati'za, Jisasina avreta ome ahenefrita, Barabasi katufe tamio! hu'naze. 19[Barabasi'a, Jerusale rankumate kamani vahe ha' renezmanteno, mago vahe ahefrigeza kina huntageno mani'nea nere.] 20Paeroti Jisasima atresigeno vanigu, mago'ene veara zamantahigene. 21Hianagi zamagra mago'ane kezatiza, rugeka zafare aheta hantiho! Rugeka zafare aheta hantiho! Huza nehazageno, 22Paeroti'a mago'ene 3'a zupa zamantahigeno, nagafarere? Nankna hazenke ama ne'mo'a hu'negeta nehaze? Nagrama kena eri fore'ma huana, friga hazenke'a osu'ne. E'ina hu'negu nagra kanonkeve amitena atresugeno vugahie. 23Hianagi zamagra kazigazi hu'za, rankefinti antahige'za, rugeka zafare ahefrio hu'zama hazankemo, Paerotina agu'a azeri rukrehe hu'ne. 24Hagi kema hazare, Paeroti'a antahintahi'a retrohuno Jisasinkura ahefriho hu'ne. 25Hagi zamagrama kamani vahe ha' renezmanteno vahe zmahe fri'nege'za kina hunte'naza ne'kuma antahigaza ne' katufe nezamino, hanki Jisasina ahefrisunema hazagu avarezamine.
Jisasina rugeka' zafare' ahe'naza naneke
(Mat 27:32-44, Mak 15:21-32, Jon 19:17-27)
26Jisasima avare'za nevazageno mago Sailiniti (Afrika) nera agi'a Saimonikino, Jerusale ne-ege'za kantega ome nege'za, Jisasi rugeka zafa erio hu'za eri kofintageno erino Jisasina avaririno vu'ne. 27Jisasina tusi'a vea kevumo'za avaririza nevazageno, ananpina mago'a a'nenagamo'za zamasunku hunente'za, zavite'za vu'naze. 28Hianagi Jisasi'a rukrahe huno nezmageno amanage huno zamasmi'ne, Jerusale kumate a'nemota nagrikura zavira oteta, tamagragu'ene mofavre timigu'enenku zavira ateho. 29Antahiho, mago kna ne-eankiza vahe'mo'za anage hugahaze, narvo a'ne mo'zane, mofavre onte'anene, mofavre ami anuntage nosnamo'za muse hiho hu'za hugahaze. 30Ana nehu'za zamagra agafa huza, ra agonamoka ankrisenka refiteranto, hu'za nehu'za, osi 'agonagura refiteranto hu'za hugahaze. (Hos 10:8) 31Na'ankure kasefa huno me'nenia zafamofoma e'inahuma huntesuza, osapama ana zafamoma renkenoa, inanknaza fore hugahie?
32Tare kumzafa netrene, Jisasine magoka zanahe frisazegu zanavre'za vu'naze. 33Aseni zaferine (Golkote) nehaza agonarema zamagra vute'za, Jisasine tare kumzafa netrena keka zafare zmahe'za hanti'naze. Magomofona Jisasi azantmaga ahe'za nehantiza, magomofona aza hoga hanti'naze. 34Hianagi Jisasi'a anage hu'ne, nafanimoke, ontahine'za anara nehazanki, kumizmia atrezmanto. Anage nehige'za sondia vahe'mo'za zaza kena'a refko huza erinaku taisi zokogo re'naze. (Sam-Zga 22:18) 35Ana nehazageno, hakare veamo'za anante otine'za uruha nehzageno, kva vahe'mo'zanena azanvanke hunte'za, vahe'mokizmia zamza nehia neki, Anumzamo huhamprintenemo Krasima mani'nesuno'a atregeno agra agu'vazisnigura kamaneno hu'za nehazageno, 36Sondia vahe'mo'zanena azanava ke nehu'za, akahenea waini tina eme nemiza, 37Kagra Jiu vahe'mokizmi kinima mani'nesunka, kagra ka'a kaguvazio! hu'za hu'naze. 38Hanki asenirega anage hu'za avona kreza ome hentenaze, ama'i Jiu vahe'mokizmi kinie.
39Mago kumzafa ne'ma aheza hantinaza nemo'enena Jisasina kesuno, Kagra Kraisiga omninano? Kagra'ka'a kagu'nevazinka, tagri'enena taguvzio! 40Hianagi mago'mo'a azerikorino, kagra Anumzamofonkura korera nosano? Ana mikomota anahukna knazampi mani'none. 41Tagra tamage huta hazenke hu'noa zamofo nona'a, eriga knaza eneru'e. Hianagi ama ne'mo'a mago hazenke osu'ne. 42Anantera anage huno ana ne'mo'a hu'ne, Jisasiga hihamukafima manisunka kagesa antahinamio. 43Jisasi'a anage huno ana nera asami'ne, tamage huna negasamue, kagra menina nagrane mona avasesezama'ane kumapina Paradais umanigahane.
Jisasi' fri'nea naneke
(Mat 27:45-46, Mak 15:33-41, Jon 19:28-30)
44Tuelufu kilokinaza higeno, maka mopafina hanimo refitegeno, kinaga 3 kilokuma higeno rumsa hu'ne. 45Na'ankure zgemo'a ananknafina remsa osu'ne. Hagi ra mono nompi tafinaza tavravemo'a amu'nompinti ruhakeke huno fenkamu uramine. 46Jisasi'a ranke huno, Nfa'nimoka kagri kazampi avamuni'a antoe nehuno vgare asimu atreno frine. (Sam-Zga 31:5) 47Sondia vahe'mokizmi kva ne'mo anazama hiazama negeno'a, agafa huno Anumzamofo agi erisaga nehuno, tamage ama fatgo ne'kino hazenkea omnene hu'ne. 48Hanki maka vea kevumo'za anazama fore hu'neaza ome kete'za ne-eza, zamasunku zampi zamarimpare zamaza refiteriri huza vu'naze. 49Hanki maka Jisasi rone'amo'zane, Galili kazigati Agrane e'naza a'nene, ogantu umani'ne'za ana zama fore hiazana ke'naze.
Jisasi erisente'naza naneke
50Mago nera Josefe'e nehaza nekino knare huno fatgo avu'va ene ne', kanisol vahepina mani'ne. 51Kanisol vahe'mo'za, Jisasima ahenakuma kema retroma hazankerera agra mago rimpa osu'nea nere. Ana nera Jiu vahe'mofo rankumapinti Aramatia nekino, Anumzamofo kumaku avega ante'ne. 52Ana ne'mo Jisasi avufga erino ome asentenigu, Paeroti ome antahigeteno, 53vuno rugeka zafareti Jisasi avufga ome eri fenkma atreno, efeke tavravefi anovazino erino have fregeno hanagatitenea kampi ome antene. Magore huno ana havegampina kora fri vahera ome ontenefi ome ante'ne. 54Mni fruhu kna (Sabat) eza hige'za ana knarera retrotra nehaza kna fore hu'ne. 55Galiliti Jisasi amagema ante'za e'naza a'nemo'za, ana havegampima avufga'ama antazana ke'naze. 56Anante rukrahe hu'za vu'za mana nentake'zane, masvene retro ome hu'naze. Mni fruhu kna (Sabat) zupa kasegemoma hu'nea kante anteza manigsa hu'naze.
Currently Selected:
Luku 23: kbq
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.