Aposol 9

Soli agu'a rukarehe hu'nea naneke

1Ana knafinke Soli'a ana zanke huno Ramofo amage' nentaza disaipol nagara zamahe frinaku tusi asi nevazigeno, rimpa henezmanteno, ugota prisi nete vuno, 2ome antahigegeno mago'a avona kremigeno erino Damaskasi vuno atruma nehu'za mono nehaza nontamimpi (sinagogs) marerino huama huno, agrama veo, aro Kraisti amage' nentaza vahe'ma zamagesuno'a, kina rezmanteno eteno zamareno Jerusale vugahie huno kre'ne. 3Agrama vuno Damaskasi urava'o nehigeno'a, ame huno monafinkati hanavenentake tavi'mo agrite remsa huntegeno, 4traka huno mopafima nemseno'a, agrama mago kezankema antahi'nea kemo'a anage hu'ne, Sol! Sol! Na'a higenka Nagrira kna nenamine? 5Higeno kenona'a, Ramoka, Kagra izage? huno higeno, Agra huno, Nagra Jisasine, kagrama knama nenamina Nere. 6Hu'neanagi otinka ana kumapi ufrenka vuge'za, kagrama nankna'zama hanana zamofo kea kasmigahaze. 7Soli enema nevaza vene'nemo'za kea osu'za oti'za mani'ne'za, kema hia agerura antahi'nazanagi, mago vahera onke'naze. 8Soli'a mopafinti otigeno, avumo'a hari hu'neanagi, mago'zana onke'ne. Magoka vu'naza vahe'mo'za azante avazu hu'za Damaskasia avare'za ufare'naze. 9Taregi magoki zagene haninena, avua onkeno ne'zane, ti'nena oneno amane mani'ne.

10Magora Jisasi amage' nentea nera, Ananaiasi'e nehaza ne'mo Damaskasi kumatera mani'neno, ava'na keankna huno negegeno, Ramo'a anage huno asami'ne, Ananaisi'o! Higeno ke nona hunteno, ama mani'noe Ramoka. 11Anante Ramo'a asamino, otinka fatgoe nehaza kuma kampi vunka, Judasi nonte vunka, Tesasiti nera, Soli'e nehaza neku ome zamantahigo, na'ankure menina manino nunamu huvava nehie. 12Ana nehigeno Soli'ma ava'nagna'zama kefina, Ananaisi'ema nehaza ne'mo efrea zamo avuma kesigura azanteno nunamu hunentegeno, ana avanagnazampina ke'ne. 13Hianagi Ananaisi'a ke'nona'a huno, Ra Anumzamoka nagra rama'a vahepinti, nama'a vahe krerafama Kagrite'ma zamentintima nehaza vahe'ma Jerusale kumapima mani'naza zamahe'neana ana ne'mofo agenkea nagra antahi'noe. 14Nehuno ama kumapi eno, ugagota kva (hai pris) vahe'mo'za hugnare huntageno, iza'o Kagri kagima ahesaza vahera zamareno kina huzamante kva agi eri'ne. 15Hianagi Ramo'a anage huno agrira asami'ne, Vuo, na'ankure agrira ko huhampri ante'noakino, Nagri eri'za ne' manigahie. Hagi Nagri nagi nagenkea erino megi'a vahete'ene, kini vahete'ene, Israeli vahetera vugahie. 16Na'ankure nama'a kna'zama Nagri nagire'ma eri'sia zana, Nagra averi hugahue. 17Huno higeno, Ananaisi otino mani'nea nonte vuno, azama omenteno nunamuma hunteteno anage huno asami'ne, nenafu Soliga, kantegama neankeno, Ra Jisasi'ma kagrite efore'ma hu'nemo, kagrama etenka kavu negenka, Ruotge Avamura eri avitesane huno hunantege'na nagra e'noe. 18Anagema nehigeno'a, ame huno avuragafinti irikna'zamo knope ramigeno, avua eteno negeno otino mono ti fre'ne. 19Hagi anante ne'za neno hanavema e'nerino'a, Jisasima amage' nentaza disaipol naga'ene Damaskas mago'a kna mani'ne. 20Ame huno, ana zupage Jisasi agigenkea osi mono nompi marerino, ama Nera Anumzamofo Mofavre huno huama huno zamasmi'ne. 21Hige'za maka antahiza vahe'mo'za tusiza hu'za antri nehu'za, anage hu'naze, Ama'na nera Jerusalema mani'neno, Jisasi agire'ma zamazeri havizama nehia nero? Menina eno Jisasi agima huama nehaza vahera kina huzamanteno zamareno ugota ra mono (hetprisi) kva vahete vunaku ne-eo? Hu'naze. 22Hianagi Soli'a, antahintahi'afina hageno nevuno Jisasi'ema nehaza nera tazahu ne' Kraisi'e huno eri ama huno tusiza huno hanavetino nehigeno, ana kema Damaskasima mani'naza Jiu vahe'mo'za, nentahiza inankna huta nanekea huntesune ha hu'za kea osu'naze.

23Mago'a knama evutege'za, Jiu vahe'mo'za komoru hu'za Solina ahenaku hu'naze. 24Hu'nazanagi ana komoru hu'naza kemo'a Soli agesafi efre'ne. Zgene haninena ahe fri'snagu zamurga ra vihu kafante ke ankerete'za mani'naze. 25Hu'nazanagi, Polima amage'nentaza disaipol nagamo'za kerage'afi avare'za eka eka kupi antete'za, kumamofo vihu keginamofo megi'a kankamumpi nofi rentete'za mago kaziga avazu nehu'za atrageno urami'ne.

Soli'a Jerusale kumate ete vu'nea naneke

26Jerusale ema nehanatino'a, Jisasi amage nentaza disaipol nagapi hagerafigahue huno hianagi, agrikura tusi kore nehu'za agra Jisasi amage' nentea nere hu'za maka'mo'za antahi'za zamifina ontahi'naze. 27Hianagi Banabasi'a, Solina avareno aposol nagate viazamo, Jisasima kampi kegeno keaga humi'neazane, Damaskas mani'neno hanavetino'ma Jisasi agifima keaga hu'neazanku ene, agigenke'a hu'ama huno aposol vahera zamasmi'ne. 28Ana huteno Soli'a zamagrane mani'neno, Jerusalemia fru huno vuno eno huno, Jisasi agigura korera osuno hanavetino keaga huama hu'ne. 29Agra keaga nehuno, Griki kema nehaza Jiu vahe'enena, keha hu'nazanagi, zamagra ahe frisnaza kanku hakare'naze. 30Hige'za mono afuhe'za anankema nentahi'za, avare'za Sisaria urami'za ometrageno Tasisi vu'ne.

31Anante Judia kazigane Galili kazigane Sameriama nemaniza mono vahe'mo'za, hagera hu'za nevu'za zamarimpa fru hu'za nemani'za, Anumzamofonku kore hunentageno, Ruotge Avamu'mo zamazeri hanavenetige'za, rama'a mono vahe fore hu'naze.

Pita'a Ainiasi azeri oti'nea naneke

32Pita'a mago'a kumate kagino vano vano huteno, agra Lida kumate mani'naza (saints) mono nagatega erami'ne. 33Anampina mago nera Ainiasi'e nehaza ne' 8ti'a zgegfu'mofo agu'afi avufa fri kri erino sipa'a atreno novia ne' keno erifore huteno, 34Pita'a anage huno asami'ne, Ainiasiga, Jisas Kraisi'a krika'a kazeri so'e huganteanki, otinka tafeka'a atrenka vuo, higeno anante ame huno oti'ne. 35Ana hige'za ana mika Lidane, Saroni kumate ene mani'namo'za agri nege'za, Ra Anumzamofonte zamagu'a rukarehe hu'naze.

36Jopa kumatera Jisasi amage nentea a'mofo agi'a Tavita'e. Ana a'mofo agima (Griki kefi eri rukarehe'ma hazana Dokasi'e hu'naze. Ama ana agimofo agafa'a, dia afure hu'ne) agripina knare eri'zamo avite'negeno upa'ma nehu'za zamasunku zampima nemaniza naga miko zupa zamaza hu'ne. 37Ananknafina kri erino fri'geno, avufama tinu sesema huntete'za eri'za vazazamo'za, anaga nomofo hunaragintepinka ome ante'naze.

38Jopa kumamo'a Lida kuma tva'onte me'ne, Pita'a anantega Lida kumate mani'ne hianke nentahiza, Jisasi amage nentaza disaipol nagamo'za tare ne'tre huznantageke, vuke hampo'nage huke, Tagriku tavega ontenka muse hugantonaki (plis) ko eno huke ome asami'na'e. 39Anankema asamikeno nentahino'a, Pita'a otino zanagrane vu'ne. Uma hanatige'za, avare'za anaga agofetu nomofo hunaragintepinka vu'naze. Miko kento a'nemo'za agrane oti'ne'za, zavira nete'za Dokasi'ma zamagranema ofri mani'neno tro hu'nea zanra kukenarami'ne, ruga'a kukenane averi'naze. 40Hianagi Pita'a ana mika vahera megi'a hunezmanteno, rena reno nunamu hu'ne. Huteno fri vahe kerafarega rukarehe huno, Tabitaga otio! Higeno avua hari huno, Pitana negeno oti'ne. 41Nehuno Pita'a aza antegantuteno azeri oti'ne. Anama nehuno zamentintima nehaza naga'ene, kento a'ne nagara kehuno asimu erie huno avazu huno eme zami'ne. 42Anama hia nanekemo'a Jopa kokampina zamukino vuno eno higeno, rama'a vahe krerfamo'za Ra Anumzamofonte zamentinti hu'naze. 43Pita'a mago'a zaza kna, afu akruteti hanave'zantami tro nehia ne' Saimoni'ene Jopa mani'ne.

Currently Selected:

Aposol 9: kbq

Highlight

Copy