Loma 9
9
Folo yana yo'o higa miIsileli Yesu hikilowena fa'ina,
ginuwavita lakahina.
1Siule tobohiyakweyao, yaku nuwanuwa sa'eyana ganalukahihiyena. Iya Keliso yana kaliva yaku gahe velemo'ena. Keke gadafwaya. Kadu Alu'aluwa Mahalina Tauna nuwahinagekuya gimimiyami-ma gi'alakakila be iya makewa gagahe velemo'ena ma nuwakuya ga'ayaunena. 2-3Gagahe velemo'ena badi tobohiyakweyao higa tauku yaku yo'o kalivai-dina fa'idiya ganuwanuwavita, ada yaku ase'u'aulolo keke ma'ita gidahavaini. Badi yaku yo'o kalivadi Yesu hikilowena fa'ina, aimo adi matahiwadi lakahina hinavaina be Keliso ginalugolohidi-yo abaga koyona againe hinamiyami. Tu ka'i iya tauku akufaiweya digo, adi matahiwadi iya gadavaina be Keliso gidalugolohiku-yo badi Yaubada buye hidamiyami hagihagina. 4Badi kalivai-dina adi egana miIsileli. Yadi yamumu tulina tulina ganalukahihiyena. Tuwai-mo'ena Yaubada bwanenediyao giluwafadi be Tauna yana yo'o gisedi ada gigahedi gigayo, “Omi'iyao be bwanenemiyao ganahawavenatunemi.” Badi agaidiya yana veyao gisedi. Badi agaidiya yana vehimeya gilakayemu. Badi Yaubada ana tafalolo velemo'ena hihalamanena ada manuwa-tafalolo againe Yaubada yana mahalina ve'akinamanamalina giseyemaunena be hi'itana. Badi Yaubada yana wonadabadaba yadi miya hagihagina fa'ina hivaina. 5#Md 1:1-2; Yo 1:1Kaliva kikaiwabudiyao Abelahamo Aisake Isileli (kadu ana egana Yakobu) badi agaidiya hitubuyemu, kadu Bana Yaubada yana Tovegida Keliso babiya gihobu'ela ana toveya badi yo'oi-dina agaidiya gitubuyemu, Bana'e anafaiweya Yaubada gaitoma moya'aidi givehimeyedi-ma kalivai-nadi. Bana ana egana kanakilakahina tova inaga inaga keke ana abalauyabu. Ehe hidedemi.
Folo Yaubada yana lauwafa fa'ina gilukahihi.
6Tu yaku yo'o kalivadi Yesu hikilowena ma kahihidi gayakahina fa'ina, keke vaita gadagahe higa Yaubada yana wonadabadaba miIsileli agaimeya keke gidalakayemu. Au gilakayemu fa'ina keke kaliva matatabudi bana kaliva kikaiwabuna ana egana Isileli againe hitubuyemu-ma Yaubada yana yo'o velemo'ena kalivadi. Au tufoidiga, higa keke tokilowa au tovetumagana. 7#Aba 21:12Kadu bana Abelahamo bwaneneneyao ma keke matatabudi Yaubada yana yo'o velemo'ena kalivadi. Fa'ina tuwai-mo'ena Yaubada keke Abelahamo natuneyao moya'aidi fa'idiya gidagahe au bana Aisake anakaibe fa'ine gigahe gigayo,
Bana natu Aisake kadu bwaneneneyao agaidiya a egana ginayemuyemu.
8Mena gahe ana nuwanuwa ma keke Abelahamo natuneyao moya'aidi bana hagaline hitubuyemu-ma Yaubada yana yo'o kalivadi. Yaubada Abelahamo natuna sa'eyanaga higa Aisake fa'ine bana againe giwonadabadaba. Gaveyao Yaubada yana wonadabadaba guwana againe hitubuyemu, medema Yaubada yana yo'o kalivadi. 9#Aba 18:14Yana wonadabadaba ana gahegahe ma hidede amine. Gigayo,
Tova gayakahina-ma againe ganayewa'ela be Sela natuna kaliva ginavenatunena.
Au hidedemi Yaubada Aisake fa'ine giwonadabadaba be yana lauwafa giseyemaunena.
10Kadu'e yana lauwafa ana aba'ita sa'eyana ma natuluga Libeka hivenatunedi, tomo'ainagona ana egana Iso kadu kwamaneya ana egana Yakobu. Badi natuluga tamadi au sa'eyana bana bwaneneda Aisake. 11-12#Aba 25:21,23Atu we'owe'o adi'iselu aimo keke hidatubuga kadu aimo keke dewa hagihagina o dewa koyona hidafaisewani tu Yaubada kwamayoku agaidiya gigahe gigayo,
Natumi ginamiditubuga-ma taina againe ginave'agetoga.
Yaubada hidedemi gigahe be higa yana lauwafa inubana ginaseyemaunena fa'ina. Natuluga aimo keke hidatubuga tu Tauna yana nuwenuweya kwamaneya giluwafana tu tomo'ainagona keke gidaluwafani. Yana lauwafa inubana ma keke kaliva yana dewa gida'italuveluveni-yo gidaluwafani, au Tauna yana nuwenuweya giluwafana. 13#Mal 1:2-3Meda anafaiweya Yaubada kaliva adi'iselu adi lauwafa fa'ina Veyao Tuwaina ana bukiya gigahe gigayo,
Bana Yakobu galuwafana tu bana Iso gakilowena.
14Hida kagahe vaita Yaubada kaliva sa'eyana giluwafana tu sa'eyana gikilowena. Gavaimi kananuwanuwa? Ka'i kanagahe vaita Yaubada keke kaliva tunutunugina? Keke, keke-mo'a! 15#Yem 33:19Fa'ina tuwai-mo'ena Yaubada Mosese againe gigahe gigayo,
Gaveyao nuwanuwaku ganahinekalikaliyedi,
medema ganahinekalikaliyedi.
Ada gaveyao nuwanuwaku gananuwakabubuyedi,
medema gananuwakabubuyedi.
Au hidedemi Yaubada Veyao Tuwaina ana bukiya gigahe. 16#Ta 3:5; Ef 3:9Medema fa'ina kahalamanena Yaubada yana lauwafa inubana keke kaliva yana nuwanuwa o yana dewa, au Yaubada yana hinekalikali. 17#Yem 9:16Fa'ina Yaubada yana gahe sa'eyana Felo againe Veyao Tuwaina ana bukiya gidadauda gigayo,
Iya gakilakahi be miIdifita adi tokaiwabu umiyami be higa vita tulina tulina ganavele-ma agaidiya yaku faiwala ganaseyemaunena, kadu fafali moya'aina kalivai-dina valeya hinanogali-yo Iya Yaubada aku egana hinahalamanena fa'ina.
18Yaubada hidedemi gigahe fa'ina kahalamanena gaveyao Bana nuwanuwana ginahinekalikaliyedi medema ginahinekalikaliyedi, ada gaveyao Bana nuwanuwana tagadi gina'ivekuluna medema tagadi gina'ivekuluna.
Folo Yaubada yana ila'a kadu yana hinekalikali
fa'ina gilukahihi.
19Tu kaliva sa'eyana agaimiya ginatoliyeku ginagayo, “Ka'i Yaubada kaliva tufoidi tagadi gi'ivekuluna, gavadi-yo yadi koyona fa'ina gidakeyedi? Ka'i tagakulu amine hinahuluva, au Yaubada yana nuwanuwa amine hinahuluva fa'ina Bana Tauna tagadi gi'ivekuluna.” 20#Ais 45:9Ada iya bonana ganafatana ganagayo, “Kumani, o vaita hakwa'adi yo Yaubada u'awafaseni?” Wa'ita, keke gidalubodani be avaeka ana to'aibubuna againe gina'awafata ginagayo, Gavadi-yo hidede amine ububuku? 21#Yel 18:6Mena maikawa ma to'aibubuna yana abavehimeya. Ka'i nuwanuwana digo, anafaiweya maikawa ana monuna sa'eyana againe avaeka luhei ginabubudi, sa'eyana ana wavaigau a'a ana abavetagova fa'ina, sa'eyana avaeka-kawowo yogo ana abavedodoga fa'ina.
22Yaubada anafaiweya avaeka ana to'aibubuna. Bana kaliva gibubuda. Kaliva tufoidi yana ila'a guwana hinanuhagana, ada Tauna yana nuwenuweya gihawahegedi be agolaufofola ana eda againe hinanauna. Atu badi agaidiya keke gidamadulaufata au gi'atuvefa'iledi. Ka'i Yaubada nuwanuwana hidede amine ginahuluva be higa yana ila'a ginaseyemaunena kadu yana faiwala gina'ivemogatalina, au keke gidalubodami be wana'awafaseni. 23-24Meda kaliva tufoidi yana hinekalikali hinanuhagana, ada Tauna yana nuwenuweya givegide-vagahidi be kaiwabu ana eda againe hinanauna. Kadu gavadi-yo badi yana ila'a guwana hinanuhagana-ma gi'atuvefa'iledi? Me higa badi yana hinekalikali hinavaina-ma badi kalivai-dina adi agolaufofola hina'ita-yo hinagayo, “Yaubada yana kaiwabu gavatubuga!” Au hidede amine Yaubada yana kaiwabu badi agaidiya gina'ivemogatalina. Ada badi kalivai-dina ide'eyao Yaubada gikovada-ma kalivai-dana. Tufoida Isileli ana yo'o agaidiya katubuyemu tu tufoida yo'o tulidiyao agaidiya katubuyemu. 25#Hos 2:23Ada Yaubada kadu omi yo'o tulimiyao kalivai-mina gikovami ma bonana ana to'awatalatalaina ana egana Hoseya gi'alakakila. Tuwaina Hoseya Yaubada yana gahe omi yo'o tulimiyao kalivai-mina fa'imiya gi'etoladina be Veyao Tuwaina ana bukiya gidadauda gigayo,
Badi keke yaku yo'o miIsileli kalivai-dina ma ganakovadi ganagayo, “Omi yaku yo'o.”
Mena yo'o boi keke nuwanuwaku ma ganagahedi ganagayo, “Nuwanuwaku omi'iyao.”
26 #
Hos 1:10
Ada fafali-nadi againe boi gagahedi gagayo,
“Omi keke yaku yo'o kalivai-mina,”
medede againe ganakovadi ganagayo,
“Omi Iya Yaubada Tomiya-vagata natukweyao.”
27-28 #
Ais 10:22-23
Kadu'e Yaubada bonana ana to'awatalatalaina ana egana Aiseya miIsileli tufoidi fa'idiya yana buki againe gigahe gigayo,
MiIsileli yadi yo'o kalivai-dina moya'ai-mo'edi taliya ana makama amine. Moya'ai-mo'edi nonogana keke moya'aidi au tufoidiga adi kibababala hinanuhagana. Fa'ina Kaiwabu agaidiya babiya ginamadulaufata, e ginalaufata-vagata.
29 #
Ais 1:9
Meda anafaiweya boi Aiseya ahe gigaheye-vagahina gigayo,
Ka'i Kaiwabu Tofaiwala-mo'a ada hilafa tufoidi agaideya keke gidahawahegedi digo, badi miSodoma kadu miGomola hi'alika-'owoga amine meda ide moya'aida kada'alika-'owoga.
Hidede amine Aiseya yana gahe Veyao Tuwaina ana bukiya gidadauda.
MiIsileli keke Yesu Keliso hidavetumaganeni au
yadi dibumuhiga againe hiluluve'avina.
30Hida ada gahe ana nuwanuwa hidede amine. Badi yo'o tulidiyao kalivai-dina yadi yegayega Yaubada matane keke hidanuwenuweni lakahina tu Yaubada againe hivetumagana fa'ina, Bana gisedi yegayegadiyao Bana matane. 31Atu badi miIsileli Mosese yana vehimeya ana dibumuhiga hinuwenuwena lakahina, higa vaita medema fa'ina Yaubada gidasedi yegayegadiyao Bana matane. Tu yadi yegayega fa'ina higa-wayoga. 32Gavadi-yo yadi yegayega fa'ina higa-wayoga? Me keke yadi vetumagana Yaubada againe hidaseni, au vehimeya ana dibumuhiga againe hiluluve'avina vaita medema againe hinayegayega Yaubada matane. 33#Ais 8:14, 28:16; 1Fi 2:6,8Bana Yesu Keliso yada yegayega ana eda tu Yesu hikilowena fa'ina Bana vaita ogola eda gilubodana-ma againe hitutumadumadu. Mena ogolai-nadi higa Yesu fa'ine Yaubada Veyao Tuwaina ana bukiya gigahe gigayo,
Wa'ita, yaku melala Saiyoni againe
ogola sa'eyana gasena,
ada ogolai-nadi againe kaliva
hinatutumadumadu kadu hinabe'ube'u.
Tu hai kaliva Bana againe ginavetumagana,
medema keke ginavetumagana-wayoga.
Au hidedemi Yaubada Yesu fa'ine gigahe.
Currently Selected:
Loma 9: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
