Loma 8
8
Keke dibuda koyona ana nuwanuwa amine kanamiyami, au
Yaubada Alu'aluwana ana nuwanuwa amine kanamiyami.
1Tu Yesu Keliso yana alika againe yada koyona ana laufata giwahina fa'ina, ide gaveyao tova adamoya Yesu Keliso buye kave'atutamo'aida medema ada matahiwadi keke, keke-mo'a. 2Gavadi-yo ada matahiwadi keke? Me tuwaina koyona be alika ana abavehimeya againe yogoyogonideyao kamiyami, tu tova adamoya Yesu Keliso giyauda be Yaubada Alu'aluwana yana abavehimeya againe wayawaida ivaguna Bana againe give'inuba-ma kamimiyami. 3-4#Ga 5:16Kadu tuwaina dibuda koyona ana nuwanuwa ka'itave'avina fa'ina, Mosese yana vehimeya keke adafaiweya kadamuliyeni-yo vehimeyai-nadi anafaiweya gida'ihagihagiyeda. Tu tova adamoya Yaubada gi'ihagihagiyeda. Tauna Natuna gi'iveninisena ada ide kaliva koyodeyao ada nuya gi'osena be yada koyona ana aiyawela fa'ina gi'alika. Ma Mosese yana vehimeya ana nuwanuwa tunutunugina hidede amine, higa Yaubada tokoyona yadi koyona ginalaufata. Tu Yaubada Tauna Natuna wowone yada koyona gilaufata be higa koyona ana laufata ide agaideya ahe'i, mena vehimeya ana nuwanuwa tunutunugina ahe gilakayemu agaideya, ide gaveyao keke dibuda koyona ana nuwanuwa amine kadahuluhuluva au Yaubada Alu'aluwana yana nuwanuwa amine kahuluhuluva-ma kalivai-dana.
5Gaveyao dibudi koyona ana nuwanuwa amine hihuluhuluva, medema dibudi koyona ana nuwanuwa againe nuwadi hisena. Atu gaveyao Yaubada Alu'aluwana yana nuwanuwa amine hihuluhuluva, medema Yaubada Alu'aluwana ana nuwanuwa againe nuwadi hisena. 6#Ga 6:8Ka'i dibuda koyona againe nuwada kanasena, alika kananuhagana. Ka'i Yaubada Alu'aluwana againe nuwada kanasena, wayawaida ivaguna kadu yada wa'aseniwalova kanamiyami. 7Fa'ina hai kaliva dibuna koyona ana nuwanuwa againe nuwana gisena, medema Yaubada givenibainena. Dibuna koyona ana nuwanuwa nuwana gi'abina fa'ina, bana Yaubada yana vehimeya keke gida'idibumuhigeni kadu keke anafaiweya gina'idibumuhigeni. 8Ada badi dibudi koyona givehimeyedi-ma keke-mo'a adifaiweya Yaubada nuwana hinakiveyamumuni.
9 #
1Ko 3:16
Hai kaliva nuwahinagene Keliso Alu'aluwana keke gidamiyami, medema keke Keliso yana kaliva. Tu omi'iyao ma ka'i Yaubada Alu'aluwana Tauna nuwahinagemiya makewa gimimiyami digo, dibumi koyona keke gidavehimeyemi au Alu'aluwa Mahalina givehimeyemi. Hai kaliva nuwahinagene Keliso Alu'aluwana Tauna keke gidamiyami, medema keke Keliso yana kaliva. 10Koyona fa'ina wowomi gina'alika, atu ka'i Keliso Tauna nuwahinagemiya gimimiyami, au Bana Alu'aluwana yawai-vagahimi givelemi, fa'ina Yaubada gisemi yegayegamiyao Bana matane. 11Ada ka'i Yaubada Yesu alikeya gisivemididina-ma Alu'aluwana Tauna nuwahinagemiya gimimiyami, au Bana Yaubadai-nadi kadu omi wowomi aimo gina'alika-ma ginakiveyawayawana. E, Bana Alu'aluwana Tauna nuwahinagemiya gimimiyami-ma yana faiwaleya ginasivemididimi.
Gaveyao Yaubada Alu'aluwana hivenovenogalena,
medema Bana natuneyao.
12Omi tobohiyakweyao yaku gahe Yaubada Alu'aluwana fa'ina wananuwenuwena. Gilubodada be Yaubada Alu'aluwana givehimeyeda amine kanahuluhuluva. Keke gidalubodada be dibuda koyona ana nuwanuwa amine kanahuluhuluva. 13#Ga 6:8Fa'ina ka'i dibumi koyona ana nuwanuwa amine wanahuluhuluva, au wana'alika. Atu ka'i Yaubada Alu'aluwana yana faiwala againe yami dewa koyodi wanaluve'alikadi, au wayawaimi ivaguna wanamiyami. 14Gaveyao Yaubada Alu'aluwana hivenovenogalena, medema Bana natuneyao. 15#2Ti 1:7; Ga 4:6Tuwaina matauta againe wave'agetoga tu Yaubada Alu'aluwana givelemi keke vaita Bana gina'ivematauhimi be matauta againe wanave'agetoga-havagi. Au Yaubada Bana Alu'aluwana givelemi be Yaubada natuneyao watubuyemu. Ada Yaubada Alu'aluwana ide sa'eyana sa'eyana ada ayauna giveleda be kakova kagayo, “Baba, Kamaku.” 16#1Yn 4:13Ide Yaubada natuneyao ma taudeyao ka'ayaunena ada Yaubada Alu'aluwana alu'aluwadeya gi'alakakila gigayo, “E, o Yaubada natuna.” 17#Ga 4:7; Ha 21:7Kadu'e ide Yaubada natuneyao fa'ina, aimo gavadi gavadi Yaubada badi natuneyao adi du'u fa'ina gisevehailena, medema kananuhagana, kadu gavadi gavadi Yaubada Keliso ana du'u fa'ina gisevehailena, medema ide Keliso buye kananuhagana. Gavaimi-yo Keliso ana du'u ide Bana buye kananuhagani? Me ka'i ve'umagigi Keliso ginuhagana-ma amine meda ide Bana buye kananuhagana, au kadu ide Bana buye kanakaiwabu.
Aimo tova mulina Yaubada natuneyao hinakaiwabu.
18 #
2Ko 4:17
Tu iya ganuwanuwa vaita aulolo tagiya tova adamoya kawahiwahina-ma gaitoma kabi'ona. Mena kaiwabu aimo tova mulina Yaubada ginaveleda-yo Bana buye kanakaiwabu-ma gaitoma lakahina, lakahi-mo'ena. Keke adafaiweya aulolo tagiya agaidiya kanahawaluveluveni. 19E, ide Yaubada natuneyao Keliso buye kanakaiwabu, ada Yaubada yana aibubuna matatabudi nuwanuwadi lakahina Bana Yaubada badi natuneyao yadi wakikaiwabu gina'ivemogatalidi ada natuneyao adi ivemogatala fa'ina gaitoma moya'aidi i'ibubunidi hibodaboda. 20#Aba 3:17-19Boi tuwai-lokalokana Yaubada gaitoma moya'aidi i'ibubunidi fa'idiya gigayo, “Hida hima hinakoyo be hinave'iyohoyoho.” Keke taudiyao yadi nuwenuweya hidave'iyohoyoho, au babi koyona ana vita givaini-yo Yaubada givehimeya be gaitoma moya'aidi i'ibubunidi hive'iyohoyoho. Atu keke hidave'iyohoyoho-vagata. 21#Ha 21:1Tova adamoya gaitoma moya'aidi i'ibubunidi hikoyokoyo ada havahavaidi. Tu tova mulina Yaubada mena yadi dewa havahavaina ginadabana. Ide Yaubada natuneyao babi ana vita againe ginayauda be yada wakikaiwabu kanamiyamiya-vagata amine, meda Yaubada yana aibubuna matatabudi ginayaudi be yadi wakikaiwabu hinaduva-vagata.
22Ide kahalamanena tuwai-lokalokana be hinunauwena tova adamoya gaitoma moya'aidi i'ibubunidi hiyawayawai'ohi, vaita kwamayoku yadi venatuna ana yawai'ohi amine. 23#2Ko 5:2-4Atu keke gaitoma moya'aidi i'ibubunidiga hidayawayawai'ohi. Au kadu ide taudeyao Yaubada Alu'aluwana agaideya gihawahegena be againe gisetagoda-ma nuwahinagedeya kayawayawai'ohi lakahina tu Yaubada fa'ina kalulauboda kagayo, “Ho gava tova-yo Yaubada ana unuma agaidiya ginavega'auleda be Bana natuneyao wawowoda ivaguna kanamiyami?” 24Yaubada yada koyona agaidiya gikibababaleda ana toveya, ide kavebutu ada vega'aula ana unuma agaidiya be wowoda ivaguna ana nauhaga fa'ina kalulauboda. Ka'i tamo gavadi ahe kanuhagana-ma fa'ina aimo kalulauboda, medema keke velemo'ena lulauboda. Keke tamo hakwadi yana nuwanuwa sa'eyana ahe ginuhagana-ma fa'ina aimo ginalulauboda, fa'ina ahe ginuhagana. 25Atu ka'i yada nuwanuwa mena ada ihagihagi fa'ina aimo keke kadanuhagani-ma kalulubodena, au yada wa'atuvefa'ila kabodaboda.
Alu'aluwa Mahalina yana veluga be Yaubada yana inuba.
26Kadu'e ide nuwadeya kagakowakowa tu Alu'aluwa Mahalina giveluvelugada. Gavaimi gilubodada be kanave'o'ola ma keke kadahalamaneni, tu Alu'aluwa Mahalina nuwahinagedeya ve'o'ola toyogina gi'alaveleveleda, ana ayauna ma vaita yawai'ohi lakahina keke ana wahifufu. 27#Sam 139:1Bana Yaubada ide kaliva nuwada gi'itafolena-ma Alu'aluwa Mahalina yana nuwanuwa gihalamanena. Ada Alu'aluwa Mahalina gihalamanena gavaimi Yaubada nuwanuwana ginagugai. Medema fa'ina Alu'aluwa Mahalina giveluvelugada be ve'o'ola toyogina Yaubada yana nuwanuwa amine nuwahinagedeya gi'alaveleveleda.
28 #
Ef 1:11
Kadu'e kahalamanena ide gaveyao yada nuwanuwa Yaubada againe kasena amanadi gavadi gavadi agaideya gilakayemu, Yaubada medema vitai-dina yada yamumu fa'ina ginakiviladi, ide Yaubada yana inuba fa'ina gikovada-ma kalivai-dana. 29#1Yn 3:2Fa'ina gaveyao tuwai-lokalokana Yaubada givenuwadadane-vagahidi, medema kadu givegide-vagahidi be Natuna ana ita'ita amine hinavenuya be higa Bana tawadi kikaiwabu-mo'ena wai ginanagona tu badi taineyao moya'aidi Bana buye hinamiyami. 30#2Te 2:13-14Ada badi givegide-vagahidi ma kadu gikovadi. Ada badi gikovadi-ma kadu gisedi yegayegadiyao Bana matane. Ada badi gisedi yegayegadiyao Bana matane ma kadu yana kaiwabu giveledi be Bana buye hikaiwabu.
Yaubada yana nuwanuwa agaideya gavatubuga!
31Hida Yaubada yana inuba ana nuwanuwa tulina tulina ide yana kaliva yana vevine fa'ideya kalukahihiyena. Gavaiyami? Yaubada ide gilulugolegoleda fa'ina, badi hivenibaineda-ma yadi faiwala gaitoma-kawowo keke-mo'a adifaiweya hinafaiwalahegeda. 32Yaubada Tauna Natuna keke gidanuwaloloneni, au moya'aida fa'ideya alikeya gihawahegena. Natuna gihawahegena fa'ina, kadu makewa abahawahega tulina tulina Bana buye ginaveleda. 33Ide Yaubada giluwafada be yana yo'ogaga agaidiya kaluku-ma hai ada tohawavekoyo? Yaubada ahe giseda yegayegadeyao Bana matane fa'ina, keke tamo hakwadi anafaiweya ginahawavekoyoyeda. 34#1Yn 2:1; Hi 7:25E, keke tamo hakwadi koyona ana laufata againe anafaiweya ginahegeda, fa'ina Yesu Keliso ada laufata giwahi-yo gi'alika. E, kadu gimididi-havagi be Yaubada i'atagine gimimiyami tu kadu ide fa'ideya give'ove'o'ola. 35#2Ko 4:8-11Keliso yana nuwanuwa agaideya lakahina, lakahi-mo'ena keke-mo'a ginahavaini. Gavadi ginalakayemu-yo Keliso nimane ginalemada? Keke, keke tamo. Ka'i vita tulina tulina agaideya ginalakayemu, ka'i ase'u'aulolo o ada kivekoyo kaliva nimadiya, o mafulauga o yada lifi keke, o abagilagi o luve'alika, ka'i mena vitai-dina agaideya hinalakayemu, au keke-mo'a Keliso nimane hinalemada. 36#Sam 44:22Mena vitai-dina fa'idiya kaliva sa'eyana Veyao Tuwaina ana bukiya gigahe gigayo,
Mala gilauna gina mala gibogi ime O ya yo'o fa'ina nuwanuwadi hinaluve'alikama.
Higahe higayo, Sifi kayogodi amine,
badi kanayogodi be kanaluve'alikadi.
37Mena vitai-dina Keliso nimane keke-mo'a ginalemada. Au Bana'e ide agaideya Tauna gihawahegena amanadi gifaiwalaveleda-yo vitai-dina moya'aidi agaidiya kafaiwala-mo'a, e tofaiwalahega-mo'a kamimiyami. 38-39#Yo 10:38Fa'ina Yaubada ginuwanuwa lakahina ide agaideya yo yada Kaiwabu Yesu Keliso gi'iveninisena be ide fa'ideya gi'alika. E, Yaubada yana nuwanuwa agaideya lakahina, lakahi-mo'ena ada iya ganuwave'avina vaita keke tamo gavadi o keke tamo hakwadi Yaubada nimane anafaiweya ginalemada. Ka'i kana'alika o ka'i wayawaida kanamiyami, au Bana nimane kanamiyamiya-vagata. Badi lobama ana tovenuwa'ata o ka'i balauma o ka'i lobama hinafana ana tofaiwala keke-mo'a adifaiweya Yaubada nimane hinalemada. Kadu keke tamo gavadi tova adamoya gidadauda o aimo tova mulina ginalakayemu amanadi, kadu keke tamo gavadi wesei getane o gava dibune, e keke tamo gavadi gaitoma moya'aidi i'ibubunidi agaidiya Yaubada nimane ginalemada, keke keke-mo'a.
Currently Selected:
Loma 8: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
Loma 8
8
Keke dibuda koyona ana nuwanuwa amine kanamiyami, au
Yaubada Alu'aluwana ana nuwanuwa amine kanamiyami.
1Tu Yesu Keliso yana alika againe yada koyona ana laufata giwahina fa'ina, ide gaveyao tova adamoya Yesu Keliso buye kave'atutamo'aida medema ada matahiwadi keke, keke-mo'a. 2Gavadi-yo ada matahiwadi keke? Me tuwaina koyona be alika ana abavehimeya againe yogoyogonideyao kamiyami, tu tova adamoya Yesu Keliso giyauda be Yaubada Alu'aluwana yana abavehimeya againe wayawaida ivaguna Bana againe give'inuba-ma kamimiyami. 3-4#Ga 5:16Kadu tuwaina dibuda koyona ana nuwanuwa ka'itave'avina fa'ina, Mosese yana vehimeya keke adafaiweya kadamuliyeni-yo vehimeyai-nadi anafaiweya gida'ihagihagiyeda. Tu tova adamoya Yaubada gi'ihagihagiyeda. Tauna Natuna gi'iveninisena ada ide kaliva koyodeyao ada nuya gi'osena be yada koyona ana aiyawela fa'ina gi'alika. Ma Mosese yana vehimeya ana nuwanuwa tunutunugina hidede amine, higa Yaubada tokoyona yadi koyona ginalaufata. Tu Yaubada Tauna Natuna wowone yada koyona gilaufata be higa koyona ana laufata ide agaideya ahe'i, mena vehimeya ana nuwanuwa tunutunugina ahe gilakayemu agaideya, ide gaveyao keke dibuda koyona ana nuwanuwa amine kadahuluhuluva au Yaubada Alu'aluwana yana nuwanuwa amine kahuluhuluva-ma kalivai-dana.
5Gaveyao dibudi koyona ana nuwanuwa amine hihuluhuluva, medema dibudi koyona ana nuwanuwa againe nuwadi hisena. Atu gaveyao Yaubada Alu'aluwana yana nuwanuwa amine hihuluhuluva, medema Yaubada Alu'aluwana ana nuwanuwa againe nuwadi hisena. 6#Ga 6:8Ka'i dibuda koyona againe nuwada kanasena, alika kananuhagana. Ka'i Yaubada Alu'aluwana againe nuwada kanasena, wayawaida ivaguna kadu yada wa'aseniwalova kanamiyami. 7Fa'ina hai kaliva dibuna koyona ana nuwanuwa againe nuwana gisena, medema Yaubada givenibainena. Dibuna koyona ana nuwanuwa nuwana gi'abina fa'ina, bana Yaubada yana vehimeya keke gida'idibumuhigeni kadu keke anafaiweya gina'idibumuhigeni. 8Ada badi dibudi koyona givehimeyedi-ma keke-mo'a adifaiweya Yaubada nuwana hinakiveyamumuni.
9 #
1Ko 3:16
Hai kaliva nuwahinagene Keliso Alu'aluwana keke gidamiyami, medema keke Keliso yana kaliva. Tu omi'iyao ma ka'i Yaubada Alu'aluwana Tauna nuwahinagemiya makewa gimimiyami digo, dibumi koyona keke gidavehimeyemi au Alu'aluwa Mahalina givehimeyemi. Hai kaliva nuwahinagene Keliso Alu'aluwana Tauna keke gidamiyami, medema keke Keliso yana kaliva. 10Koyona fa'ina wowomi gina'alika, atu ka'i Keliso Tauna nuwahinagemiya gimimiyami, au Bana Alu'aluwana yawai-vagahimi givelemi, fa'ina Yaubada gisemi yegayegamiyao Bana matane. 11Ada ka'i Yaubada Yesu alikeya gisivemididina-ma Alu'aluwana Tauna nuwahinagemiya gimimiyami, au Bana Yaubadai-nadi kadu omi wowomi aimo gina'alika-ma ginakiveyawayawana. E, Bana Alu'aluwana Tauna nuwahinagemiya gimimiyami-ma yana faiwaleya ginasivemididimi.
Gaveyao Yaubada Alu'aluwana hivenovenogalena,
medema Bana natuneyao.
12Omi tobohiyakweyao yaku gahe Yaubada Alu'aluwana fa'ina wananuwenuwena. Gilubodada be Yaubada Alu'aluwana givehimeyeda amine kanahuluhuluva. Keke gidalubodada be dibuda koyona ana nuwanuwa amine kanahuluhuluva. 13#Ga 6:8Fa'ina ka'i dibumi koyona ana nuwanuwa amine wanahuluhuluva, au wana'alika. Atu ka'i Yaubada Alu'aluwana yana faiwala againe yami dewa koyodi wanaluve'alikadi, au wayawaimi ivaguna wanamiyami. 14Gaveyao Yaubada Alu'aluwana hivenovenogalena, medema Bana natuneyao. 15#2Ti 1:7; Ga 4:6Tuwaina matauta againe wave'agetoga tu Yaubada Alu'aluwana givelemi keke vaita Bana gina'ivematauhimi be matauta againe wanave'agetoga-havagi. Au Yaubada Bana Alu'aluwana givelemi be Yaubada natuneyao watubuyemu. Ada Yaubada Alu'aluwana ide sa'eyana sa'eyana ada ayauna giveleda be kakova kagayo, “Baba, Kamaku.” 16#1Yn 4:13Ide Yaubada natuneyao ma taudeyao ka'ayaunena ada Yaubada Alu'aluwana alu'aluwadeya gi'alakakila gigayo, “E, o Yaubada natuna.” 17#Ga 4:7; Ha 21:7Kadu'e ide Yaubada natuneyao fa'ina, aimo gavadi gavadi Yaubada badi natuneyao adi du'u fa'ina gisevehailena, medema kananuhagana, kadu gavadi gavadi Yaubada Keliso ana du'u fa'ina gisevehailena, medema ide Keliso buye kananuhagana. Gavaimi-yo Keliso ana du'u ide Bana buye kananuhagani? Me ka'i ve'umagigi Keliso ginuhagana-ma amine meda ide Bana buye kananuhagana, au kadu ide Bana buye kanakaiwabu.
Aimo tova mulina Yaubada natuneyao hinakaiwabu.
18 #
2Ko 4:17
Tu iya ganuwanuwa vaita aulolo tagiya tova adamoya kawahiwahina-ma gaitoma kabi'ona. Mena kaiwabu aimo tova mulina Yaubada ginaveleda-yo Bana buye kanakaiwabu-ma gaitoma lakahina, lakahi-mo'ena. Keke adafaiweya aulolo tagiya agaidiya kanahawaluveluveni. 19E, ide Yaubada natuneyao Keliso buye kanakaiwabu, ada Yaubada yana aibubuna matatabudi nuwanuwadi lakahina Bana Yaubada badi natuneyao yadi wakikaiwabu gina'ivemogatalidi ada natuneyao adi ivemogatala fa'ina gaitoma moya'aidi i'ibubunidi hibodaboda. 20#Aba 3:17-19Boi tuwai-lokalokana Yaubada gaitoma moya'aidi i'ibubunidi fa'idiya gigayo, “Hida hima hinakoyo be hinave'iyohoyoho.” Keke taudiyao yadi nuwenuweya hidave'iyohoyoho, au babi koyona ana vita givaini-yo Yaubada givehimeya be gaitoma moya'aidi i'ibubunidi hive'iyohoyoho. Atu keke hidave'iyohoyoho-vagata. 21#Ha 21:1Tova adamoya gaitoma moya'aidi i'ibubunidi hikoyokoyo ada havahavaidi. Tu tova mulina Yaubada mena yadi dewa havahavaina ginadabana. Ide Yaubada natuneyao babi ana vita againe ginayauda be yada wakikaiwabu kanamiyamiya-vagata amine, meda Yaubada yana aibubuna matatabudi ginayaudi be yadi wakikaiwabu hinaduva-vagata.
22Ide kahalamanena tuwai-lokalokana be hinunauwena tova adamoya gaitoma moya'aidi i'ibubunidi hiyawayawai'ohi, vaita kwamayoku yadi venatuna ana yawai'ohi amine. 23#2Ko 5:2-4Atu keke gaitoma moya'aidi i'ibubunidiga hidayawayawai'ohi. Au kadu ide taudeyao Yaubada Alu'aluwana agaideya gihawahegena be againe gisetagoda-ma nuwahinagedeya kayawayawai'ohi lakahina tu Yaubada fa'ina kalulauboda kagayo, “Ho gava tova-yo Yaubada ana unuma agaidiya ginavega'auleda be Bana natuneyao wawowoda ivaguna kanamiyami?” 24Yaubada yada koyona agaidiya gikibababaleda ana toveya, ide kavebutu ada vega'aula ana unuma agaidiya be wowoda ivaguna ana nauhaga fa'ina kalulauboda. Ka'i tamo gavadi ahe kanuhagana-ma fa'ina aimo kalulauboda, medema keke velemo'ena lulauboda. Keke tamo hakwadi yana nuwanuwa sa'eyana ahe ginuhagana-ma fa'ina aimo ginalulauboda, fa'ina ahe ginuhagana. 25Atu ka'i yada nuwanuwa mena ada ihagihagi fa'ina aimo keke kadanuhagani-ma kalulubodena, au yada wa'atuvefa'ila kabodaboda.
Alu'aluwa Mahalina yana veluga be Yaubada yana inuba.
26Kadu'e ide nuwadeya kagakowakowa tu Alu'aluwa Mahalina giveluvelugada. Gavaimi gilubodada be kanave'o'ola ma keke kadahalamaneni, tu Alu'aluwa Mahalina nuwahinagedeya ve'o'ola toyogina gi'alaveleveleda, ana ayauna ma vaita yawai'ohi lakahina keke ana wahifufu. 27#Sam 139:1Bana Yaubada ide kaliva nuwada gi'itafolena-ma Alu'aluwa Mahalina yana nuwanuwa gihalamanena. Ada Alu'aluwa Mahalina gihalamanena gavaimi Yaubada nuwanuwana ginagugai. Medema fa'ina Alu'aluwa Mahalina giveluvelugada be ve'o'ola toyogina Yaubada yana nuwanuwa amine nuwahinagedeya gi'alaveleveleda.
28 #
Ef 1:11
Kadu'e kahalamanena ide gaveyao yada nuwanuwa Yaubada againe kasena amanadi gavadi gavadi agaideya gilakayemu, Yaubada medema vitai-dina yada yamumu fa'ina ginakiviladi, ide Yaubada yana inuba fa'ina gikovada-ma kalivai-dana. 29#1Yn 3:2Fa'ina gaveyao tuwai-lokalokana Yaubada givenuwadadane-vagahidi, medema kadu givegide-vagahidi be Natuna ana ita'ita amine hinavenuya be higa Bana tawadi kikaiwabu-mo'ena wai ginanagona tu badi taineyao moya'aidi Bana buye hinamiyami. 30#2Te 2:13-14Ada badi givegide-vagahidi ma kadu gikovadi. Ada badi gikovadi-ma kadu gisedi yegayegadiyao Bana matane. Ada badi gisedi yegayegadiyao Bana matane ma kadu yana kaiwabu giveledi be Bana buye hikaiwabu.
Yaubada yana nuwanuwa agaideya gavatubuga!
31Hida Yaubada yana inuba ana nuwanuwa tulina tulina ide yana kaliva yana vevine fa'ideya kalukahihiyena. Gavaiyami? Yaubada ide gilulugolegoleda fa'ina, badi hivenibaineda-ma yadi faiwala gaitoma-kawowo keke-mo'a adifaiweya hinafaiwalahegeda. 32Yaubada Tauna Natuna keke gidanuwaloloneni, au moya'aida fa'ideya alikeya gihawahegena. Natuna gihawahegena fa'ina, kadu makewa abahawahega tulina tulina Bana buye ginaveleda. 33Ide Yaubada giluwafada be yana yo'ogaga agaidiya kaluku-ma hai ada tohawavekoyo? Yaubada ahe giseda yegayegadeyao Bana matane fa'ina, keke tamo hakwadi anafaiweya ginahawavekoyoyeda. 34#1Yn 2:1; Hi 7:25E, keke tamo hakwadi koyona ana laufata againe anafaiweya ginahegeda, fa'ina Yesu Keliso ada laufata giwahi-yo gi'alika. E, kadu gimididi-havagi be Yaubada i'atagine gimimiyami tu kadu ide fa'ideya give'ove'o'ola. 35#2Ko 4:8-11Keliso yana nuwanuwa agaideya lakahina, lakahi-mo'ena keke-mo'a ginahavaini. Gavadi ginalakayemu-yo Keliso nimane ginalemada? Keke, keke tamo. Ka'i vita tulina tulina agaideya ginalakayemu, ka'i ase'u'aulolo o ada kivekoyo kaliva nimadiya, o mafulauga o yada lifi keke, o abagilagi o luve'alika, ka'i mena vitai-dina agaideya hinalakayemu, au keke-mo'a Keliso nimane hinalemada. 36#Sam 44:22Mena vitai-dina fa'idiya kaliva sa'eyana Veyao Tuwaina ana bukiya gigahe gigayo,
Mala gilauna gina mala gibogi ime O ya yo'o fa'ina nuwanuwadi hinaluve'alikama.
Higahe higayo, Sifi kayogodi amine,
badi kanayogodi be kanaluve'alikadi.
37Mena vitai-dina Keliso nimane keke-mo'a ginalemada. Au Bana'e ide agaideya Tauna gihawahegena amanadi gifaiwalaveleda-yo vitai-dina moya'aidi agaidiya kafaiwala-mo'a, e tofaiwalahega-mo'a kamimiyami. 38-39#Yo 10:38Fa'ina Yaubada ginuwanuwa lakahina ide agaideya yo yada Kaiwabu Yesu Keliso gi'iveninisena be ide fa'ideya gi'alika. E, Yaubada yana nuwanuwa agaideya lakahina, lakahi-mo'ena ada iya ganuwave'avina vaita keke tamo gavadi o keke tamo hakwadi Yaubada nimane anafaiweya ginalemada. Ka'i kana'alika o ka'i wayawaida kanamiyami, au Bana nimane kanamiyamiya-vagata. Badi lobama ana tovenuwa'ata o ka'i balauma o ka'i lobama hinafana ana tofaiwala keke-mo'a adifaiweya Yaubada nimane hinalemada. Kadu keke tamo gavadi tova adamoya gidadauda o aimo tova mulina ginalakayemu amanadi, kadu keke tamo gavadi wesei getane o gava dibune, e keke tamo gavadi gaitoma moya'aidi i'ibubunidi agaidiya Yaubada nimane ginalemada, keke keke-mo'a.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.