Loma 7

Yaubada yana vehimeya tuwaina agaideya gihavaini-yo

Alu'aluwa Mahalina againe kamimiyami ma

nagi againe Folo giluvefosena.

1Tu tobohiyakweyao, omi Yaubada yana vehimeya wahalamanena-ma kalivai-mina agaimiya ganagahe. Omi makewa vehimeya ana nuwanuwa wahalamanena, higa ka'i kaliva wayawaina ginamiyami amine o bana ana wavehimeya gimimiyami ada gilubodana be vehimeya gina'itave'avina. Tu bana kalivai-nadi gina'alika amine o bana againe vehimeya ginahavaina. 2Vehimeya ana abaluvefota sa'eyana ma kwamayoku naginagidi adi vehimeya hidede amine. Moganedi aimo wayawaina ginamiyami ana toveya, kwamayoku moganedi yana abavehimeya againe hinamiya-vagata. Tu ka'i moganedi gina'alika digo, nagi ana vehimeya badi agaidiya ginahavaina. 3Ka'i moganedi aimo wayawaina ginamiyami tu hinana mali kaliva buye hinamiyami digo, badi adi egana to'udo. Nagi ana vehimeya au hidede amine. Atu ka'i moganedi gina'alika amine o mena nagi ana vehimeya badi agaidiya ginahavaina, ada ka'i mali kaliva hinanagina digo, badi keke to'udo au adifaiweya mali kaliva vavinena hinamiyami.

4 # Ga 2:19 Tobohiyakweyao, meda anafaiweya omi agaimiya gilakayemu. Kwamayoku moganedi yana abavehimeya dibune hinamiyami tu moganedi gina'alika ana toveya abavehimeyai-nadi ginahavaina amine, meda omi Yaubada yana vehimeya tuwaina dibune wamiyami tu Keliso gi'alika ana toveya vaita omi buye wada'alika be vehimeya tuwaina agaimiya gidahavaini. Vehimeyai-nadi agaimiya gihavaina fa'ina, au amifaiweya Keliso Yaubada alikeya gisivemididina-ma yana kaliva yana vevine wanamiyami be higa Yaubada fa'ine wanafifaisewa ada guwami hagihagina wanaseusena. 5#Lo 6:21Tuwaina keke Yaubada au taudeyao dibuda koyona givehimeyeda ana toveya, Yaubada yana vehimeya o yana hawata koyona ana nuwanuwa ita'italuvadigana agaideya gisilakahina be wowodeya gififaiwala ada guwada koyona kaseuseni-yo alika againe kalowoga. 6#Lo 8:2Vehimeya ana dibumuhiga keke adafaiweya fa'ina yogoyogonideyao kamiyami, atu tova adamoya Keliso buye ka'alika kadu yada koyona ana laufata Bana giwahina fa'ina, Yaubada yana vehimeya tuwaina agaideya gihavaina. E, ide yauyaugideyao kamimiyami be higa Yaubada againe kanahawahawahegeda. Keke eda tuwaina higa vehimeya tulina tulina buki againe hi'etoladina-ma amine Yaubada fa'ine kadafifaisewa. Au eda ivaguna kamuliyena be againe Alu'aluwa Mahalina gifaiwalaveleda-yo Yaubada fa'ina kafififaisewa.

Vehimeya gaitoma yamumuna tu koyona nuwahinagedeya

gidadauda fa'ina vehimeya againe koyona be alika giyemu.

7 # Yem 20:17 Hida kagahe vaita vehimeya gidadauda fa'ina, koyona gififaiwala. Gavaiyami? Ka'i kanagahe vaita Yaubada yana vehimeya tuwaina gaitoma koyona? Keke, keke-mo'a! Fa'ina mena vehimeyai-nadi againe koyona gava'adi ma ka'ayaunena. Wa'ita, tauku agaikuya abaluvefota ganalukahihiyena. Ka'i vehimeya keke gidagahe gidagayo, “Keke tobohiya yana gaitoma una'italuvadigeni” digo, kadu keke italuvadiga gadahalamaneni. 8Bana koyona ma hawata againe eda ginuhagana be italuvadiga ginasilakahina. Nuwanuwa koyona agaikuya gidadauda fa'ina, mena hawata italuvadiga fa'ina ganogalina againe nuwanuwa ita'italuvadigana tulina tulina ga'aya'ayaunena. Ka'i vehimeya o hawata keke gidadauda, kadu keke dewa koyona gadanuwenuweni. Au nuwanuwa koyona yana faiwala vaita keke. 9-10Tuwaina aimo Yaubada yana vehimeya keke gadahalamaneni ana toveya, gamiyami hagihagina. Tu muliya mena vehimeyai-nadi italuvadiga fa'ina ganogalina againe, nuwanuwa koyona agaikuya gifaiwala be alika ana eda againe galowoga. Yaubada nuwanuwana ganamiyami hagihagina fa'ina mena yana vehimeya ana hawatai-nadi gisena, tu hawata keke gada'itave'avini fa'ina yaku miya gikoyo be alika ana eda againe galowoga. 11Fa'ina bana koyona hawata againe eda ginuhagana be italuvadiga againe ginuwa'abiyeku, ada hawatai-nadi ana aiyawela againe koyona giluve'alikaku. 12#1Ti 1:8Au hidede amine koyona gififaiwala fa'ina, gavaimi kananuwanuwa Yaubada yana vehimeya fa'ina? Me vehimeya ana nuwanuwa matatabuna gaitoma mahamahalina, ada vehimeya o hawata tulina tulina kadu gaitoma mahamahalina ada eda tunutunugina kadu miya hagihagina givehawaleda.

13Gavaiyami? Ka'i vaita kadagahe kadagayo, “Mena gaitoma hagihagina againe iya alika ganuhagana?” Keke, keke-mo'a! Au koyona againe alika ganuhagana. Bana koyona vehimeya hagihagina givaina be yaku alika gifaisewana be higa yaku nuwanuwa koyona ana ita koyona ma kabu'avane ginayemu. Ada au ide Yaubada yana vehimeya kanahalamaneni-yo yada nuwanuwa koyona fa'ina kanagahe kanagayo, “Wona velemona yaku koyona ana ita koyo-mo'ena.”

Nuwanuwa koyona kadu nuwanuwa hagihagina

nuwahinagedeya hive'asitaineda.

14Ide kahalamanena vehimeya Yaubada againe give'inuba, ada alu'aluwada yana miya hagihagina fa'ina vehimeya giveleda. Tu iya'eku ma kaliva wawowoku ada wowoku ana nuwanuwa amine gahuluhuluva be koyona againe gave'agetoga. 15Gavaimi yaku huluva keke gadahalamaneni. Fa'ina dewa hagihagina nuwanuwaku ma keke gadahuluvini, au dewa iya gavenikohiyena-ma gahuluhuluvina. 16Ka'i dewa keke nuwanuwaku ma gahuluvina amine, au vaita nuwakuya gadagahe gadagayo, “Yaubada yana vehimeya Mosese awane giyemu-ma vehimeya hagihagina.” 17Au keke vaita dewa keke nuwanuwaku ma iya tauku gadahuluvini, au nuwanuwa koyona agaikuya gidadauda-ma dewai-nadi gihuluvina. 18Iya gahalamanena keke tamo nuwanuwa yamumuna agaikuya higa dibuku koyona againe gidadauda. Fa'ina nuwanuwaku dewa hagihagina ganahuluvina tu gaga-wayoga, keke akufaiweya. 19Dewa hagihagina nuwanuwaku ganahuluvina-ma keke gadahuluvini. Au dewa koyona keke nuwanuwaku ganahuluvini, medema gahuluvina. 20Ka'i dewa keke nuwanuwaku tu gahuluvina digo, keke iya tauku gadahuluvini au bana nuwanuwa koyona agaikuya gidadauda-ma dewai-nadi gihuluvina.

21Ma hidema ana nuwanuwa gavaiyami? Aku ayauna hidede amine higa ka'i iya nuwanuwaku dewa hagihagina ganahuluvina againe, dewa koyonaga akufaiweya. 22Nuwahinagekuya nuwanuwaku lakahina Yaubada yana vehimeya. 23#Ga 5:17; Ye 4:1Tu wowokuya nuwanuwa tulina ga'ayaunena, ada nuwanuwai-nadi koyona againe gitaiku tu mena nuwanuwa nuwakuya gidadauda-ma Yaubada yana vehimeya ana itave'avina againe gitaiku, au hive'asitaineku. Ada au nuwanuwa wowokuya gifaiwala-mo'a be koyona wowokuya gidadauda-ma giyogoku. 24Ho, yaku miya gikoyo-mo'a! Koyona wowokuya giyogoku be alika againe galowoga. Hakwadi hida alika ana wowo againe ginakibababaleku? 25#1Ko 15:57Bana yada Kaiwabu Yesu Keliso aku Tokibababala ada Bana fa'ine Yaubada againe gavesiule, siule-mo'a!

Ma yaku gahe dobona hidede amine. Iya tauku nuwakuya Yaubada yana vehimeya againe gahawahegeku be gamuliyena. Nuwakuya Yaubada againe gahawahegeku nonogana dibuku koyona wowokuya gifaiwala-ma againe koyona yana vehimeyeya gahawahegeku be gamuliyena.

Currently Selected:

Loma 7: viv

Highlight

Copy