Loma 12
12
Wowoda be nuwada Yaubada againe kanahawahegena.
1 #
Lo 6:13
Siule tobohiyakweyao, Yaubada ginuwadogeda lakahina be giseda yegayegadeyao Bana matane ma ana nuwanuwa a galukahihiyena. Hidede amine gihinekalikaliyeda fa'ina, gagahegahevagadonemi be wowomi kadu nuwami Yaubada againe wanahawahegena. Kaliva yomuyomu yadi abahawahega fa'ina Yaubada againe hi'aliyena amine, meda omi wayawaimi ivaguna wamimiyami-ma kalivai-mina taumiyao Yaubada againe wanahawahawahegemi ada Bana fa'ine sevesevehailamiyao wanamiyami be Bana nuwana wanakivedivedigagina. Omi kaliva vevine wanuwamiyao ma gilubodami be hidede amine Yaubada wanahawadavadavana. 2#Ef 4:22-24, 5:17Badi kaliva hida babi ana nuwanuwa amine hihuluhuluva-ma adi ita amine omi keke wananuwanuwa. Au wanahawahegemi be Yaubada nuwami ginakive'ivaguni-yo ami ita tulina amine wanavenuya. Ada Yaubada nuwami ginakive'ivaguni-yo amifaiweya yana nuwanuwa wanahalamanena, higa gavadi gilubodani kadu gavadi nuwana gina'ivedivedigagini kadu gavadi hagihagi-mo'ena Bana matane ma wanahalamanena.
3 #
Ef 4:7
Yaubada aku vehimeya giveleku fa'ina, omi sa'eyana sa'eyana agaimiya ganagahe. Keke o tauni nuwahinageniya unakilakahi vaita o tauni ya wafaiwala yo Yaubada fa'ine ufifaisewa. Au tauni fa'iniya unanuwanuwahagihagi, ya vetumagana hami ana tubuga Yaubada gifolakena amine yo Yaubada yana faisewa u'abina. 4#1Ko 12:12Wa'ita, ide sa'eyana sa'eyana wowoda talaina moya'aina gidadauda, ada talaida tulina tulina yana faisewa tulina tulina. 5Meda anafaiweya ide Keliso yana kaliva yana vevine ma vaita Keliso wowona talaina. Ide au moya'aida tu Keliso buye kave'atutamo'aida fa'ina, ide Bana wowona sa'eyana kamimiyami. Ada kaliva wowona talaina tulina tulina buye give'ahavihavi amine ide Keliso wowona talaina buye kave'ahavihavi. 6#1Ko 12:7-10; 1Fi 4:10-11Yaubada ide sa'eyana sa'eyana yana abavetala tulina tulina giveleda-yo ada vehimeya kavaina. Ada yada faiwala hami ana tubuga amine agaideya gifolakena, gilubodada be medede amine kanafifaisewa. Wa'ita, yana abavetala sa'eyana ma ka'i ada vehimeya vaita Alu'aluwa Mahalina yana venuwa'ata gitunevehabalutugida-ma kana'awatalatalainena, au gilubodada be yada vetumagana hami ana tubuga amine medemi kana'awatalatalainena. 7Kadu sa'eyana ma ka'i ada vehimeya vaita tovetumagana adi veluga, au gilubodada be tovetumagana adi veluga againe kanafifaisewa. Ka'i kaliva adi vehawala digo, gilubodada be kaliva adi vehawala againe kanafifaisewa. 8Kadu ka'i ada vehimeya vaita kaliva adi lau'age, au gilubodada be kaliva adi lau'age againe kanafifaisewa. Ka'i yada lokoloko ana folaka digo, gilubodada be yada wa'asehawahega kanafolafolaka. Ka'i kaliva adi itave'avina digo, gilubodada be yada wa'idibumuhiga kana'itave'avidi. Ka'i koyokoyo adi hinekalikali digo, gilubodada be yada wavemwamwala kanahinekalikaliyedi.
Mali kaliva fa'idiya wanahawahawahegemi.
9 #
1Fi 1:22
Siule tobohiyakweyao, mali kaliva fa'idiya wanahawahawahegemi tu keke wanave'uma'ala. Nuwanuwa koyona wanavenikohiyena tu nuwanuwa hagihagina wanakidonena. 10Omi Keliso yana yo'o agaidiya wavetobohiyana. Au buye wanave'ahawahawahega vaita tobohiyami velemo'ena amine. Tobohiyamiyao adi egana wanamadukilakahina vaita hidakaiwabuhegemi. 11#Kl 3:23Yami dibumuhiga againe keke wanawowologilogi. Au nuwami yana wagakahikahi Kaiwabu fa'ine wanafifaisewa. 12#1Te 5:16-18Aimo Yaubada omi fa'imiya gavaimi ginaga-ma fa'ina walulauboda. Mene yami walulauboda wamimiyami fa'ina, wanavemwamwala. Vita tulina tulina kaliva nimadiya wananuhagana againe, wana'atuvefa'ila. Yami ve'ove'o'ola againe wana'idibumuhiga. 13Hai Yaubada yana kaliva o yana vevine tamo gavadi againe hikali'uho, medema agaidiya wanafolakena. Wakawaka yami manuweya wanamaduvega'auledi.
Kaliva yadi koyona keke wanalaufata.
14 #
Md 5:44; Lu 23:34 Kadu'e kaliva hinakivekoyomi againe, Yaubada wanave'o'olena be ginanuwakabubuyedi. Adi nuwakabubu fa'ina wanave'o'ola, keke adi hawave'avina. 15Gaveyao hivemwavemwamwala, medema wanavemwamwalavaisedi. Gaveyao hitagitagi, medema wanatagivaisedi. 16#Lo 14:19; Fl 2:2-3Veyao againe wanamiyami yami nuwanuwa sa'eyana. Keke wananuwalaka au agetoga yana faisewa againe wanahawahegemi. Keke taumiyao nuwamiya wanakilakahimi vaita omi halamanimiyao.
17 #
1Te 5:15
Kadu'e, ka'i tamo hakwadi ginakivekoyomi, keke koyona againe yana koyona wanafatani. Gavaimi gilubodana moya'aidi matadiya, medemi wanahuluva. 18Hami amifaiweya kukuya againe kaliva moya'aidi buye wanamiyami, au medede amine wanamiya. 19#2Veh 32:35; 2Te 1:6-7Omi tobohiyakweyao, kaliva yadi koyona keke wanalaufata. Au wanamiya tu ka'i Yaubada nuwanuwana amine o Bana ginalaufata. Meda tuwaina Yaubada Veyao Tuwaina ana bukiya gigahe gigayo,
Laufata yaku abavehimeya. Iya kaliva yadi koyona ganafatana.
Au hidedemi Kaiwabu gigahe. 20E, keke omi wanalaufata tu Veyao Tuwaina ana buki gigahe amine wanahuluva. Gigayo,
Ka'i ami tokivekoyo mafu gilauna, au wanave'ana.
Ka'i agona gitaina, bwai wanaveyuna.
Ka'i hidede amine wananuwakabubuyena,
au vaita wadalukufuwani be yana wowomumu ginayemu.
21Keke tokivekoyo yadi koyona ginavehimeyemi higa vaita wanafatani. Au taumiyao yadi koyona wanavehimeyena be nuwakabubu againe wanaluvekwe'una.
Currently Selected:
Loma 12: viv
Highlight
Share
Compare
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
