Luke 23
23
Yesu ana vedewayauga Failato matane.
Madiu 27:1-2,11-14; Maki 15:1-5; Yoni 18:28-40
1Tu badi miYuda yadi Koniselo moya'aidi hitowamidi be Yesu Failato againe hinauwena. 2#Lu 20:20-26Ada hivebutu hihawavekoyoyena higayo, “Hidema kalivai-nadi anuhagana, Bana ime miYuda yama yo'o ginuwa'abiyedi be omi miLoma hinavekwageyemi. Gihawatama higa vaita Loma Tokaiwabu lakahina Sisa againe keke takesi anaseni. Kadu gigahe vaita Tauna Yaubada yana Tovegida Keliso, higa vaita Bana'e tokaiwabu lakahina.”
3Au Failato gitoliyena gigayo, “Ka'i O'eni miYuda adi Tokaiwabu?” Yesu gigayo, “Au ugahe amine Iya'eku.”
4Tu Failato abaveyao ana tofaisewa kikaiwabudiyao be yo'oyo'o agaidiya gigahe gigayo, “Keke tamo koyona hida kalivai-nadi againe gadanuhagani.”
5Tu badi kaliva hikwagekwageye-mo'ena higayo, “Yana vehawala againe yo'o nuwadi gisigadagadalina. Galili againe givebutu tu ginauwena Yudiya ana fafali matatabuna agaidiya au gi'ela hidedei.”
Yesu ana vedewayauga Helodi matane.
6Tu Failato hidedemi ginogalina againe, gitoliluvaluva gigayo, “Ka'i hida kalivai-nadi kwanaGalili?” 7Galili ma Helodi yana abavehimeya againe gidauda, ada ahe gihalamanena bana kwanaGalili au Helodi againe gi'iveninisena, medema tovai-nadi bana tauna Yelusalema againe gimiyami.
8 #
Lu 9:9
Helodi Yesu gi'itana againe au nuwana giyamumu lakahina, lauva tunugina nuwanuwana gina'itana fa'ina. Yesu valeyana moya'aina ginogalina ada ginuwanuwa higa nimana ana iya'iyaya sa'eyana ginafaisewana be gina'itana. 9Au toliluvaluva moya'aina Yesu againe giyakahina, tu keke gidabonalaufata. 10Abaveyao ana tofaisewa kikaiwabudiyao kadu Mosese yana vehimeya ana tovehawala himidimidi, yadi wa'ago'uga hihawahawavekoyoyena. 11Ada Helodi yana tolugaviya buye hihawave'iyoyohoyena kadu hihawavelaigena. Au vaigau yamumu-mo'ena hive'oseni-yo Failato againe giveyewana. 12Ada medema aiyetai-nadi Helodi Failato buye hiveyao, tuwaina ma hive'avenivenibaina.
Failato Yesu alika againe gihawahegena.
Madiu 27:15-26; Maki 15:6-15; Yoni 19:1-16
13Tu Helodi Yesu Failato againe giveyewana tu Failato abaveyao ana tofaisewa kikaiwabudiyao be miYuda adi tonagona velugadiyao kadu yo'o buye gikovavaga'auhidi. 14Au gigahedi gigayo, “Hidema kalivai-nadi iya agaikuya wahege'aliyena, vaita yo'oyo'o nuwadi gidasigadagadalini tu wa'ita, matamiya gatoliluveluvena ma keke tamo vita yami hawavekoyo amine Bana againe gadanuhagani. 15Meda anafaiweya Helodi yana koyona gilele-wayoge, au ime agaimeya giveyewana. Keke tamo gavadi koyona gidafaisewani tu gadamiyaluve'alikana. 16Fa'ina ganavehimeya be tolugaviya bulava againe hinalauni-yo ganayauna.”
[ 17Tu miLoma adi vehimeya sa'eyana ma tafalolo ana egana lobama ana tovenuwa'ata yana Abamaduviviya againe yogoyogonina sa'eyana gidayauyauna be miYuda agaidiya gidahawahawahegena.] 18Au moya'aidi tamotamo'aine hikova higayo, “Wadema kalivai-nadi uluve'alikani tu Balaba uyau.” 19Bana Balaba ma tobohiyaneyao buye Yelusalema againe hive'atalalakalaka be kaliva hiluve'alikadi, ada medema fa'ina Balaba deliya hisena.
20Failato nuwanuwana Yesu ginayauna fa'ina yo'oyo'o gigahe-havagiledi. 21Tu hihawahawaya'ala higayo, “Wanakivekelosena, wanakivekelosena.”
22Au tova anaveto gigahedi gigayo, “A! Gavadi yana koyona? Keke tamo gadanuhagani tu gadamiyaluve'alikana. Au ganavehimeya be hinalauni-yo ganayauna.”
23Tu higahegaheya'aya'ala agodi lakahina againe hikovakova higa vaita kelose againe gina'alika. Au yadi kovadona-luya'aya'ala againe Failato bonadi gi'abina. 24Au gihawahegedi be yadi ve'o'ola amine givehimeya. 25Kaliva vekwageya luve'alika fa'ina deliya hisena-ma giyauna, bana'e hive'o'olena kalivai-nadi, tu Yesu givetalaiyena be gavaimi hinuwanuwa amine hinahuluvina.
Yesu kelose againe hitutuvefosena.
Madiu 27:32-43; Maki 15:21-32; Yoni 19:17-24
26Tu Yesu hinauwena. Hinauna tu kaliva sa'eyana, kwanaSailini ana egana Saimoni himaduhagana. Bana wala'aiya gitauya be Yelusalema againe ginauna. Au hikive'avina digo kelose hive'avalani tu higayo, “Ulau'avala be Yesu muline una.”
27Ada yo'o lakahina hivebwa'uliyena, vevine buye'i. Ada badi vevine ase'asedi hi'atu'atutagona tu Yesu fa'ine hitagitagi'awafatafata. 28Yesu badi agaidiya gihagavilana gigayo, “MiYelusalema vevine, keke Iya fa'ikuya wanatagiya. Au taumiyao fa'imiya wanatagi, kadu natumiyao fa'idiya wanatagi. 29Wanogali! Aimo tova vitana ginayemu be wanagahe wanagayo, Badi kakalidiyao ma hagihagidiyao! Vevine keke hidavenatuna keke hidavehuvehuhu-ma hagihagidiyao! 30#Hos 10:8; Ha 6:16Au hinavebutu oya agaidiya hinagahe hinagayo, Ho oya, wadadobomi be wadavetalabodama. Kadu oya kabi'odi agaidiya hinagayo, Wadasevauyema. 31Ka'i Iya vaita ai mahi'ina amine aku vita keke ma hidedemi hinahuluviku, aimo miYelusalema vaita ai bouna amine adi vita lakahina ma hinakivekoyo-mo'edi.”
32Kadu kaliva adi'iselu tokoyona-mo'a ma buye hinauwedi be hinaluve'alikadi. 33Ada ahe oya ana egana Utouto againe hiyemu-yo Yesu hikivekelosena, kadu tokoyona-mo'a buye'i, sa'eyana wa'i'atagine, sa'eyana wa'i'imawane. 34#Sam 22:18; Md 5:44Ada Yesu gigahe gigayo, “Kamaku, yadi koyona keke unalaufata, badi hima fanifanidiyao.” Au kabala hihegelakahina be gava iya'iyaya higaheyena-ma ginalakayemu, medema kalivai-dina Yesu ana kaleko hinavaina.
35 #
Sam 22:7-8
Ada yo'o himidimidi hilulauboda tu adi tonagona hihawaluvetonovena higayo, “Wa'ita, mali kaliva gikibababaledi. Ka'i bana velemona Keliso, Yaubada givegidena-ma digo, Tauna gidakibababalena!” Hidemi higahe.
36-37 #
Sam 69:21
Kadu tolugaviya hihawahawavelaigena, hi'ela'ela vaita oine golagolana hidaveleni higayo, “Ka'i O'eni miYuda adi Tokaiwabu digo, Tauni unakibababale.”
38Kadu Bana u'una getane hida hifufu hi'etoladina, “Hidevama miYuda adi Tokaiwabu.”
Tokoyona luhei kelose againe Yesu buye hilukahihi.
Madiu 27:44; Maki 15:32; Yoni 19:18
39Tokoyona sa'eyana kelose againe hitutuvefosena-ma, givebutu gihawaluvetonovena gigayo, “Vaita Yaubada yana Tovegida O'eni. Au Tauni unakibababale, kadu ama'iselu buye'i!”
40Tu bana velugana tobohiyana gidakeyena gigayo, “Ka'i keke Yaubada udamatauseni? Moya'aida kelose againe kanagilagi. 41Ada'iselu ma yada dewa ana vita kawahiwahina tu hidema kalivai-nadi keke tamo gavadi koyona gidagani.” 42Au Yesu againe gigahe gigayo, “Ho Yesu, tovai-nadi ya wakikaiwabu unayemu, udanuwa-nunauyeku.”
43Yesu gigayo, “Gagahe velemo'ena againiya, adamoya o'eni Iya buye Yaubada yana abamiyami Faladaisi againe kanamiyami.”
Yesu gi'alika.
Madiu 27:45-56; Maki 15:33-41; Yoni 19:28-30
44 #
Lu 18:31; Emo 8:9 Ada au kauwana getadiya gilaka tu umalovana babi moya'aina gi'uyuyubodena be ginauwena mala gilavina bai tohiye amine, kauwana gikibodana fa'ina. 45#Hi 9:2-3,6-8Ada manuwa-tafalolo vetawana-tabu ana abaseboda kaleko gi'ahailugana be higa vaita abaluku Yaubada againe gi'ayauna. 46#Sam 31:5Au Yesu gikova'awafatafata gigayo, “Kamaku, alu'aluwaku nimaniya ganasena.” Gigahe-yo yawaina gihavaina.
47Tu togiyomatana gavadi gilakayemu-ma gi'itana againe, givebutu Yaubada gihawadavadavana gigayo, “Wona velemona hidema kalivai-nadi yegayegana.” 48Kadu yo'oyo'o moya'aidi medede againe matawabuwabu fa'ina hivaga'auta-ma huluvai-nadi hi'itana againe, hiyewayewadi ase'asedi hi'atu'atutagona. 49Ada Yesu tobohiyaneyao moya'aidi kadu vevine Galili againe hitauya be hivebwa'uliyena-ma, himidilauva gaitomai-dina hilakayemu-ma hi'itadi.
Kaliva Yesu tomohuyehuyeya hihuyana.
Madiu 27:57-61; Maki 15:42-47; Yoni 19:38-42
50Tu kaliva sa'eyana ana egana Yosefa gimiyami kwanaAlimadiya, medema Yudiya melalina. Ada bana miYuda yadi Koniselo kalivana tu bana kaliva hagihagina yana dewa tunutunugina. 51Tu Koniselo yadi vevai be yadi dewa Yesu yana alika fa'ina keke gidavenogaleni. Au Yaubada yana Tovegida Tauna yana ela fa'ina gibodaboda. 52Bana kalivai-nadi gina Failato againe Yesu wowona give'o'olena. 53Au gikakilina digo kaleko kwayakwayana againe gifafana au tomohuyahuya boi kuga hinagene hiyalana-ma againe gisena, medede againe keke tamo to'alika boi hidaseni. 54Tafalolo ana abakidewadewa ana aiyeta gihavahavaina tu sabati kabisona ginavebutu.
55Au Yosefa Yesu wowona gihuyana againe vevine hivebwa'uliyena, badi boi Galili againe Yesu buye hitauya. Tomohuyahuya hi'itana kadu gavaiya'amine Yesu wowona gisena-ma hi'itana. 56Hi'ita-yo au hiyewadi manuweya, vanedimodimo bunama buye hikidewedewena. Tu sabati againe hiveyawai, Yaubada yana vehimeya amine.
Currently Selected:
Luke 23: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.