Afositolo 27

Folo tolugaviya hi'ita'itave'avina-ma buye hiyage

be hinana Loma againe.

1Tu Fesito givehimeya be wakeya anayage anana Loma againe fafali ana egana Itali. Givehimeya-yo yana kalivamomo Folo kadu filisina velugadiyao buye hihegenauwedi togiyomatana sa'eyana againe, ana egana Yuliyasi, be bana gina'itave'avidi. Bana Yuliyasi Loma Tokaiwabu yana ame adi togiyomatana sa'eyana. 2Ada Adalamitiumi ana waka sa'eyana againe ayage, wakai-nadi taliya ana melaleya ginanulukuluku Esiya ana fafaliya. Kadu kaliva sa'eyana gimiyami, ana egana Alisitako, kwanaTesalonaika, medema melala fafali ana egana Masedoniya againe. Ada au bana ime buye ayage be alowoga.

3 # Af 24:23 Anauna tu aiyeta anavelu againe Saidoni avaina. Ada bana Yuliyasi Folo ginuwakabubuyena fa'ina gihawahegena be ginahobu tobohiyaneyao gina'itadi, ada badi anaga kadu yana gava'adi nuwanuwana ma hinavelena. 4Kadu ayage Saidoni ahege tu alaka ma bolimana giluveyeveyewama fa'ina, himula ana egana Saifilasi aiwa'una anuve'uyena. 5Anauna be fafali ana egana Silisiya ahegena, kadu anauna fafali ana egana Famifiliya ahege tu melala ana egana Maila avaina, medema fafali ana egana Laisiya againe. 6Ada medede againe yama togiyomatana Alekisanidiya ana waka sa'eyana ginuhagana, medema tova kabi'ona ginalowoga fafali ana egana Itali againe ginana. Ada au ime giveyagevedamama be alowoga. 7Ada aiyeta gavaiyehi ma'inuwameyao anauna tu bolimana gilulutunetunema fa'ina, vaita keke amafaiweya Naidasi anavaini. Tu anauna anauna Naidasi liline ayemu tu meda bolimana giluveyeveyewama fa'ina, keke amafaiweya mala wamatane anana. Hidema fa'ina ma'i anuviviya, himula ana egana Kelita aiwa'una anuve'uyena be kabuna ana egana Salamone amine a'ela anuwaliliuga. 8Au taliya liline anauna tu bolimana fa'ina keke amafaiweya adamadunauna, au ma'inuwameyao abaluku sa'eyana avaina, ana egana Abahiwaga Yamumuna, medema melala ana egana Lasiya liline.

9-10Tu medede againe aiyeta a gavaiyehi amiyami tu tova yamumuna ahegena, au ka'i adanu-havagi digo, yamana au vitana. Mala koyona ana aituha giluveda'ufo, fa'ina miYuda yadi tafalolo lakahina ahe gihavaina, tafalolo-nadi againe Koyona ana Aba'aiyawela hinuwa'udu'uduna. Mala koyona ana aituha giyemu fa'ina, bana Folo givenuwa'atadi gigayo, “Kaliva, keke kanana. Yadana vitana ma ga'ayaunena. Ka'i kanana digo, lokoloko kanave'alugena, waka kanakivekoyona kadu ide ka'i tufoida kana'alika.” Hidedemi Folo gigahe. 11Tu togiyomatana Folo yana gahe keke gidavenogaleni, au badi waka ana tovehimeya kadu toniwaka higahe vaita hinana-ma bonadi hi'abina. 12Bolimana ana aituheya abahiwaga againe amiyami-ma waka yana miya keke gidalubodani. Hidema fa'ina kaliva tufoidi moya'aidi nuwanuwadi hinatalalaka be hinagaluvaluva ka'i Finikesi againe hinana. Finikesi, medema abahiwaga himula ana egana Kelita againe, ada ana aba'ita keke wabolimaneya au niwalova wa'amine. Au hidede againe adifaiweya hinamiyami bolimana ana aituheya.

Mala koyona hinuhagana.

13Tu mala dikudikukuna wabolimaneya gitowa fa'ina, kaliva hinuwanuwa vaita Finikesi againe adifaiweya hinana hinayemu. Au lomu hisilakahina digo Kelita taliyeya-mo'aya amadubala. 14Aimo keke adana lauva tunugina tu mala koyona ana egana lauhanaga himula amine gilaka'ela. 15Giyemu waka gi'abina ada ave'etolakalaka-wayoga, keke amafaiweya. Au a'ilova tu bolimana gibibima. 16Gibibima digo himula kabi'ona ana egana Koda aiwa'une anuwaliliuga. Himula aiwa'une anauna tu avegavegala, waka kabi'ona ataitaina higa adasilakahina ada keke lefo ginayavalini fa'ina. 17Au imolata hivegavegalena tu waka tabone hisilakahini-yo bulava o'olina againe waka lakahine hi'ubibina be keke lefo ginaluyavalini fa'ina. Kadu himatamatauta ka'i waka aimo lelega againe ginalaka, lelegai-nadi ana egana Saitasi. Hidedemi himatauta fa'ina naya hikakilina be bolimana waka gibibina. 18Ada mala koyona keke ma'i gida'a'atagoni fa'ina tova anavelu againe hivebutu lokoloko hihebana. 19Tu tova anaveto againe waka ana lokoloko taudiyao nimadiya hihebana. 20Kadu aiyeta a gavaiyehi anauna tu keke ma'ita kauwana ada'itani, kadu ibadibadi keke ma'ita ada'itani fa'ina ha'amine ha'amine anauna ma keke adahalamaneni. Kadu'e bolimana aimo gimadumadu toyogina tu ime avaita ada'alika.

21 # Af 27:9-10 Tu kaliva lauva tunugina keke ma'i a'a hida'u'ani-yo Folo gitowamidi gigahedi gigayo, “Kaliva, vaita bonaku wada'abini-yo Kelita keke kadahegeni. Ka'i kadamiya digo, hida lokoloko moya'aina kadu waka keke kadahegedi. 22Tu omi wanogali! Wana'asevatu fa'ina keke tamo hakwadi agaideya gina'alika, au wakagaga gina'alu'alugena. 23-24#Af 23:11Hidema gahalamanena, fa'ina bogi againe yaku Yaubada gahawadavadavana-ma yana tovenuwa'ata iya agaikuya gi'ela gigahe gigayo, Folo, keke unamatauta. Aimo Loma Tokaiwabu Sisa matane unamidi be ginavedewayaugi. Kadu'e Yaubada tonuwakabubu fa'ina, au ginanuwakabubuye be keke tamo hakwadi wakeya buye wananauna-ma gina'alika. Au hidedemi yaku Yaubada yana tovenuwa'ata gigaheku. 25Tobohiyakweyao, hidema fa'ina wana'asevatu. Bana Yaubada gavetumaganena be yana tovenuwa'ata gigaheku amine, velemo'ena kananuhagana. 26#Af 28:1Ide keke kana'alika tu aimo hai himula sa'eyana againe bolimana ginalulakahida.” Hidedemi Folo gigahe.

Aiyeta fotini hinu-kawowo tu taliya liline bolimana gibibidi.

27Tu bogi fotini ahegedi tu aimo bolimana ha'amine ha'amine gibibaidadanema, lehaga againe anauna-ma ana egana Ediliya. Ada bogi nafone imolata hi'ayaunena taliya sa'eyana liline ayemuyemu. 28Ada hidema fa'ina hitutuluva be lehaga ana tunuga hiwavana, nimada ana wava foti (40). Himiya kabisona kadu hitutuluva-havagi ada lehaga nimada ana wava teti (30) hinuhagana. 29Au himatauta higayo, “Ka'i yama waka lai againe ginatula.” Au lomu fowa waka ulene hisehobuyena, ada yadi viviluwa agaidiya hive'ove'o'ola be higa mala gidamadulauna. 30Ada imolata waka kabi'ona lehageya hisehobuyena higa waka lakahina hida'otayabuyabuna. Hive'alololo higayo, “Lomu waka mudune anasehobuyena.” 31Tu bana Folo togiyomatana kadu yana tolugaviya agaidiya gigahe gigayo, “Ka'i hida imolata keke wakeya hinamiya digo, aimo keke amifaiweya yawayawamiyao wanamiyami, au lehageya wana'alika.” 32Hidedemi gigahe fa'ina, tolugaviya bulava againe waka kabi'ona hiluhifona-ma hitalagolohina ada au hive'alugena.

33Tu mala kabi'ona ginawedala ma Folo gigaheya'aya'alidi be a'a hina'ana gigayo, “Aiyeta fotini wamiyami yami wamatauta, keke ma'i a'a wada'u'ani, au mafu gilaumi. 34#Af 27:22Fa'ina gave'o'olemi toyogina ma'i a'a wada'ana. Ka'i keke wana'a yami faiwala keke, au wana'alika. Tu gagahemi keke tamo hakwadi agaimiya u'una sa'eyana gina'agolohini.” 35Ada Folo hidemi gigahe-yo, au tauna a'a givaina digo moya'aidi matadiya Yaubada againe givesiule, gikihinena be givebutu gi'a. 36Au moya'aidi hi'asevatu be kadu ma'i a'a hi'ana. 37Ada ime kaliva wakeya amiyami-ma ama kilagalaga 276. 38Ada au moya'aidi hi'ahiyauwa-yo a'a wakeya hidodona-ma lehageya hi'iyauyaulena be waka ginalu'aihaya fa'ina.

Lelega againe waka gitula.

39Tu mala gilauna imolata gava himula againe ayemu-ma hifaniyena, tu hukuna sa'eyana hi'itana, ana taliya makamakamina. Ada au hivevai be medede againe waka hinabilakahina. 40Au tufoidi lomu hitalagolohina, kadu tufoidi bulava wayaisi ana sive'avina hiyauna. Hiyauna gihavaina, naya waka mudune hisilakahina be bolimana waka ginalutunetunena fa'ina. Ada taliya amine waka ginauna. 41Tu waka lelega againe gitula. Waka muduna gilo'a, keke adifaiweya hinakakini tu ulena ma lefo lakahina be giluyaweyawelina.

42Tu tolugaviya hivevai higa filisina hinaluve'alikadi be keke tamo hakwadi taliyeya hinakayolaka-yo hina'ota fa'ina. 43Tu togiyomatana nuwanuwana Folo ginalugolegolena fa'ina gihawatadi. Au givehimeya be gaveyao adifaiweya hinakayo, medema hinamidi'auhifu be taliyeya hinakayolaka. 44#Af 27:22-25Velugadiyao kayo keke hidahalamaneni-ma ai againe o ka'i waka yogona againe hinakive'avina be taliyeya hinalaka. Ada au hidede amine moya'aima taliyeya alaka-'owoga, keke tamo hakwadi vita gidanuhagani.

Currently Selected:

Afositolo 27: viv

Highlight

Copy