Matayo 4
4
Kugezigwa kwa Yesu
(Maluko 1:12-13; Luka 4:1-13)
1Abaho Loho Yang'alile kamulongoza Yesu yachole kuluwala yakagezigwe na Mwenembago. 2Kakala kuko siku malongo mane imisi na ikilo bila kuja. Viyamambukize siku azo, Yesu kona nzala. 3Abaho Mwenembago kamcholela kamulongela, “Kamba gweye kwa Mwana wa Imulungu kweli galagize mabwe gano gagaluke magate.”
4Lakini Yesu kamwidika, “Maandiko Gang'alile golonga, ‘Munhu hawa mgima kwa kuja kwiiyeka, lakini kwa kila mbuli ilawa mmulomo wa Imulungu.’ ”
5Abaho Mwenembago kamsola Yesu mbaka Yelusalemu buga ding'alile, kamwika mna ikiswili cha Ing'anda ya Imulungu. 6Abaho kamulongela Yesu, “Kamba kweli gweye kwa Mwana wa Imulungu, ilagaze mwenyego hasi, kwavija Maandiko Gang'alile golonga,
‘Imulungu kowalagiza wasenga zake wa kuulanga mbuli ya gweye,
nao okusola mmakono gao,
sikuuilumize magulu gako mgamabwe.’ ”
7Yesu kamwidika, “Vivija Maandiko Gang'alile golonga, ‘Sikuumgeze Mndewa Imulungu wako.’ ”
8Abaho Mwenembago kamsola Yesu mbaka uchanha ng'hani kulugongo lutali na kamulagusila undewa wa mwiisi yose na unovu wake. 9Mwenembago kamulongela, “Vino vose nokugwaa, kamba wahanifugamila na kunitambikila.”
10Yesu kamulongela, “Segela kumwangu Mwenembago! Kwavija Maandiko Gang'alile golonga, ‘Mtambikile Mndewa Imulungu wako, na umsang'hanile heyo yaiyeka!’ ”
11Baho Mwenembago kamuleka Yesu, na wasenga wa kuulanga weza wamsang'hanila.
Yesu kosonga sang'hano yake ako Galilaya
(Maluko 1:14-15; Luka 4:14-15)
12Yesu viyahulike Yohana Mbatizaji kagodekigwa kukifungo, kachola isi ya Galilaya. 13Hakalile Nazaleti lakini kachola kukala Kapelinaumu kudibuga dili behi na lamba da Galilaya, kuzimbaka za isi ya Zabuloni na Nafutali. 14Mbuli ino ilawilila kamba vija viyalongile mtula ndagu wa Imulungu Isaya,
15“Isi ya Zabuloni na isi ya Nafutali
nzila ya kucholela mbahali, umwambu uyagwe wa lwanda lwa Yolidani
Galilaya, isi ya wanhu haweli Wayahudi!
16Wanhu wakalile mdiziza
wawona mulenge wa ukombola wa Imulungu
Waja wose okala mwiisi ya sisila da ifa
mulenge uwamwemwesela.”
17Kulawa kipindi acho Yesu kasonga kuwapetela usenga wake, “Lekeni nzambi zenu, kwavija Undewa wa kuulanga wammabehi.”
Yesu kowakema wavula somba wane
(Maluko 1:16-20; Luka 5:1-11)
18Yesu viyakalile kobita kumgwazo wa lamba da Galilaya, kawavika munhu na mkulu wake ovula somba. Wakala Simoni yakemigwe Petulo na mdodo wake Andeleya, wakala ovula somba mna dilamba na mizavu yao. 19Yesu kawalongela, “Nikwelelezeni na niye nowatenda muwe wavulaji wa wanhu.” 20Bahaja waileka mizavu yao, wamkweleleza.
21Kagenda kumwande kawavika ndugu wabili wayagwe. Yakobo na Yohana wanage Zebedayo. Wakala mwiingalawa hamoja na tatao Zebedayo oitanda mizavu yao. Yesu kawakema, 22bahaja waileka ingalawa na tatao, na wamkweleleza Yesu.
Yesu kowapetela wanhu na kuwahonya
(Luka 6:17-19)
23Yesu kachola mwiisi yose ya Galilaya, kafundiza mzing'anda za kumpula Imulungu na kawapetela wanhu Mbuli Inogile ya Undewa wa Imulungu na baho kawahonya wanhu wakalile na mitamu na magayo gose. 24Mbuli zake zenela mwiisi yose ya Siliya, avo wanhu wamgalila wanhu wose wakalile watamu, waja odununzika na kila utamu, weli na vinyamkela, na visango na waja waholole na Yesu kawahonya wose. 25Wanhu wengi wamkweleleza Yesu kulawa Galilaya na Dekapoli,#4:25 Dekapoli Fambulo jake mabuga longo kulawa Yelusalemu na Yudea na isi ya mwambu uyagwe wa lwanda lwa Yolidani.
Currently Selected:
Matayo 4: King'hutu
Highlight
Share
Copy
Want to have your highlights saved across all your devices? Sign up or sign in
NT: © 2014 Pioneer Bible Translators and The Word for the World
OT: © 2019 Pioneer Bible Translators