Zabuli 116
116
Kulonga malumbo kwa kuloholigwa kulawa kuli kubagama
1Ndangumgana Mkulu Nguluwi,
kwa vila nakanyhulika,
kwa vila nakahulika chililo cha kulanda kwa heni kwa isungu.
2Nakambichila goya ikutu,
ahyo ndomlanda mhela weng'ha hondichikala.
3Vihindo vya kubagama navinzunguluta,
kukabusa kwa isi ya wabagame nakuvaba heni,
nandali memile kusanzalima na masinzo.
4Hamba nandimlilila Mkulu Nguluwi,
“Gwa Mkulu Nguluwi, undohole.”
5Mkulu Nguluwi nakamema isungu na kutanganika,
Nguluwi wa hetwe ndo yawele na uliholile.
6Mkulu Nguluwi kanguwamilaga walingunyenyetela,
londiwele kuli magazo nakandohola.
7Usindamale, gwa nhumbula ya heni,
kwa vila Mkulu Nguluwi nakanditila ganojile.
8Nakandohola kulawa kuli kubagama na kusa mahozi ga heni,
nakanyamila leka ndeche kugwa.
9Ndojenda hali heye Mkulu Nguluwi,
kuli isi ya wanhu wawele wakomu.
10Nandali na makundo hala hondonjile,
“Nangazika lukami.”
11Mbaka nandonga kwa lunhwinhwi lwa heni,
“Wanhu weng'ha wangulonga udesi.”
12Ndimhilusile choni Mkulu Nguluwi,
kwa isungu lya heye lyeng'ha lyoyanditile?
13Ndomlavila nhambiko ya divai kwa kundohola,
ndolanda kwa itagwa lya heye Mkulu Nguluwi.
14Ndomwenezela Mkulu Nguluwi chilaho cha heni,
hali wanhu wa heye weng'ha.
15Kubagama kwa wanhu wa kukundigwa wa Mkulu Nguluwi
haiwele mbuli ndodo hali heye.
16Gwa Mkulu Nguluwi, heni nda chitumagwa wa hegwe,
nda chitumagwa wa hegwe, mwana wa mpogozi wa hegwe,
nakuvichumula vihindo vya heni vya kubagama.
17Ndokulavila nhambiko za kulonga malumbo
na kulanda kwa itagwa lya hegwe, Mkulu Nguluwi.
18Ndomwenezela Mkulu Nguluwi chilaho cha heni,
hali wanhu wa heye weng'ha,
19wowekungajize hali ng'handa ya heye,
hagati ha Yelusalemu.
Mumtogole Mkulu Nguluwi.
Currently Selected:
Zabuli 116: Chividunda
Highlight
Copy
Compare
Share
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
