Amosi 8
8
Kulota kuwala chikowe cha mafuza
1Mkulu Nguluwi nakandajila kahi kulota. Nambona chikowe chimemile mafuza ga chipalangule. 2Naye Mkulu Nguluwi nakambuza, “Amosi, kwangona choni?” Heni nandimwidichila, “Ndanguchona chikowe cha mafuza ga chipalangule.” Hamba Mkulu Nguluwi nakandonjela, “Kuduma nakuwafichila wanhu wa heni wa Isilaeli. Sikwimilila kahi wihe wa hewo.”
3Mkulu Nguluwi kangulonga, “Kuli zuwa alyo, nzimbo za ng'handa ya Nguluwi zowa ndo kulombocheza.
Kowa na mitufi minji,
najo jotozigwa kunze.
Kowa tulu ng'hatu.”
Nguluwi koigaza Isilaeli
4Mhulichize hemwe mlinguwabunza ng'hochele
na kuwegalila kubagama wazunwa wa isi.
5Mwangilonjela mnhumbula za hemwe,
“Mnvina ya kulawa kwa nyelezi yomala nili
leka twaluche kahi kuguza nyhule za hetwe?
Zuwa lya Kwesela lyomala nili leka tuguze ngano ya hetwe?
Topungula vipimilo na konjeza bei,
ahyo towahada wanhu kwa vipimilo vyohaviwele goya,
6na kuguza miwewezi jiwele hamwe na ngano.
Toweza kuwagula wazunwa kwa sendi,
na wawele na magazo kwa makwamba.”
7Mkulu Nguluwi, Nguluwi wa Isilaeli, nakelaha,
“Ndikomya, sigasemwa madito ga hemwe gehile.
8Ahyo, isi yokakama na chila munhu kuli isi kolombocheza.
Isi yeng'ha yotigasika,
yokwina na kudulika,
kota vyogalingumema na kuka mazi ga lwanda lwa Naili!”
9Mkulu Nguluwi kangulonga,
“Zuwa alyo ndolidita isanya lizinje nemisi,
na kuidita nemisi iwe na jiza.
10Mnvina za hemwe ndozidita kuwa chililo,
na lwimbo lwa hemwe lwa kusangalala kuwa kulombocheza.
Ndowadita weng'ha mvale migunila kwa masinzo
na kubeya mnvili za kumutwi kwa hemwe,
kota ndo kulombocheza kwa kubagama kwa mwana wa udewele,
na zuwa lya kuduma lyowa lya usungu ukulu.
11Mhela wanguya uwele ndoigala nzala kuli isi.
Ila haiwele nzala na ng'halu ya chilyo na mazi,
yowa nzala ya kuhulika ulonzi wa Mkulu Nguluwi.
12Wanhu wolubaluba kulawa bahali mbaka bahali,
kulawa ubanzi wa kasikazini mbaka kolilawilaga isanya.
Wobilima aku na ako wopala ulonzi wa Mkulu Nguluwi,
ila hawowona.
13Zuwa alyo, mbaka wasongolo na wahinza wawele na mong'ho,
wowa habehi kubagama kwa ng'halu.
14Wala walingilaha kwa mlungu wa Samaliya,
na kulonga, ‘Kwa muhe wa mlungu wa hegwe, gwa Dani,
na kwa muhe wa mlungu wa Beeli-sheba,’
weng'ha wogwa na hawokwima kahi mazuwa gose.”
Currently Selected:
Amosi 8: Chividunda
Highlight
Share
Copy
Want to have your highlights saved across all your devices? Sign up or sign in
New Testament © 2014 Pioneer Bible Translators and The Word for the World
Old Testament books © 2018 Pioneer Bible Translators
