A Matiye Sõng 5
5
A Zezi Kẽedba pʋɩɩr — Tãng zug karõngo
(Lk 6,20-23)
1A Zezi sẽn yãe zãma wã, b rʋʋ tãnga zugu. B zĩndame tɩ b karen-biisa na n kolg-ba. 2A Zezi kõ-b la koɛɛga n yetẽ:
3«Sũ-noog rãmba la sẽn teeg-b Wẽnd bala tɩ Wẽnnaam Rĩunga yaa bãmb soolem.
4 #
Iz 61,2. Sũ-noog rãmba la nin-bʋgse tɩ tẽnga na n yɩɩ bãmb soolem.
5 #
Yɩ 37,11. Sũ-noog rãmba la sũ-beed sẽn tar b rãmba, tɩ b na n paama belgda.
6 #
Iz 55,1-2. Sũ-noog rãmb la sẽn yãbd-b sõmblem kom la ko-yũudu, tɩ b na n tɩgame.
7Sũ-noog rãmb la sẽn zoet-b b taab nimbãanega, tɩ b na n zoee bãmb me nimbãanega.
8 #
Yɩ 24,3-4. Sũ-noog rãmb la pʋ-peelem dãmba tɩ b na n yãee Wẽnnaam.
9Sũ-noog rãmb la sẽn mi-b sugri, tɩ b na n boola bãmb tɩ Wẽnd kamba.
10 #
1P 3,14. Sũ-noog rãmba la sẽn sakd-b namsgo b tʋʋm sõma yĩnga, tɩ Wẽnd Rĩunga yaa bãmb soolem.
11 #
1P 4,14. Yãmb la sũ-noog rãmba b sã n wa tʋʋsd-y la b namsd-y la b rõt-y rõadg buud fãa mam tũudma yĩnga. 12#2Nar 36,16; Tv 7,52. Noog-y y sũuri la y kɩdem tɩ y pʋɩɩr na n yɩɩ kãseng arzãna. Ad-y yɩɩ boto la bãngdba nams pĩnda.
A Zezi kẽedba yaa dũni yamsem la dũni vẽenem
(Mk 9,50; Lk 14,34-35)
13Yãmb yaa mooga yamsem. Yamsem sã n sãbge, bõe n tõe n le wa ne a noosem? A ka le be yõod ye la a sẽn tog yaa b lob-a yɩnga tɩ neb tabe.
14 #
Zã 8,12; 9,5. Yãmb yaa dũni vẽenem; tẽng sẽn zao tãng zug ka tõe n solg a meng ye. 15#Mk 4,21; Lk 8,16; 11,33. Fitil ka widigdi n dɩk koglg n lill-a ye, b ningd-a la zĩig ninga a sẽn na n tõog n kõ zaka rãmb vẽenem. 16#1P 2,12. Woto me yãmb vẽenema tog n yãga y taab nini tɩ b yãe y tʋʋm sõma n tõog n pẽg y Ba sẽn be arzãna.
17Da ning-y y yamẽ tɩ m waame n na n sɛɛs Noora ne bãngdbã sẽn wilga ye; m waame n na n maneg n baase. 18#Lk 16,17. Sɩd-sɩda m yet-y lame tɩ gomde, gomd pɛdg meng kõn zĩnd Wẽnnaam noora pʋgẽ n pa taase tɩ saaga la tẽnga ket n be b zĩigẽ ye. 19Dɩlla ned ning fãa sẽn na n tõdg-a, ba noor sẽn ya bilfu, Wẽnnaam noya sʋka la a wilg a taab tɩ b tõdg wa yẽnda, b na ges yẽ soab me wa nin-bila, Wẽnd Rĩunga pʋgẽ. Ned ninga sẽn na n deeg-ba la a zãms a taab tɩ b maan wa yẽ, b na ges yẽ soab wa nin-kãsenga Wẽnnaam Rĩunga pʋgẽ.
Pĩnd la marsã yelle
20M yet-y lame, tɩ y sõmblem sã n pa yɩɩd sẽn karen-ba-n-sikã la Farizẽ rãmba rẽnna, y kõn kẽ Arzãn ye.
21 #
Ey 20,13; Yao 5,17. Y wʋmame tɩ b yeela pĩnd dãmba: da kʋ ned ye, la sẽn kʋ-a a to bɩ b kẽes-a bʋʋdo; la mam yet-y lame tɩ ned ning fãa sẽn na n puuga sũuri ne a to, dẽ seka bʋʋd kẽesgo. 22La ned sã n yeel a to tɩ yalma, dẽ sekda a wa bʋʋd-bɛda rãmb taoore. La a sã n yeel-a tɩ pʋlum-sãamda, yẽ soab paalgda a meng bugum bʋʋdo. 23Dɩlla fo sã n wa ne f kũuni maanda zĩigẽ, n tẽeg tɩ bũmb n be foo ne f to sʋka, 24bɩ f bas f kũuna maanda zĩigẽ la f lɛɛg tɩ y tɩ zems taaba tɩ f na yaool n wa kõ f kũuna. 25Fo sã n seg f zabd-n-taaga, bɩ f ning pãng tɩ y zems taaba sora zugu, sã n ka rẽ a wat n bool-f la bʋʋdo tɩ bʋʋda soab paalg-f ne gũudã, tɩ gũuda yõk fo n pag roogo. 26Sɩd-sɩda, mam yet-f lame tɩ f kõn tõog n yi roogã, samd pɛdg meng sã n ket f zug ye.
27 #
Ey 20,14; Yao 5,18. Yãmb wʋmame tɩ b yeelame: Da ro f to pag ye. 28La mam yet-y lame: Ned ninga sẽn gesa a to pag ne raabo, a soab zoe n yoo ne-a a sũurẽ. 29#Mt 18,9; Mk 9,47. F rɩtg nif sã n kʋɩɩbd-fo, bɩ f kɩdg-a n lob yɩɩga; fo yĩnga wilg a ye bõne, são yĩnga tõr sẽn na n lob bugmẽ. 30#Mt 18,8; Mk 9,43. F nug rɩtg sã n kʋɩɩbd-fo, bɩ f kʋʋg-a n lob yɩɩga; fo yĩnga wilg a ye bõne, são yĩnga tõr sẽn na n lʋɩ bugmẽ.
31 #
Yao 24,1-4; Mt 19,7; Mk 10,4. B yeelame yɛsa: Ned ninga sẽn yiisa pag tog n kõ-a-la a rigb sebre. 32#Mt 19,9; Mk 10,11-12; Lk 16,18; 1Ko 7,10-11. Mam yet-y lame tɩ sã n ka pagã n bao ned a to, ned ninga sẽn yiis-a wã wilgd-a-la yoob sore. Ned ninga me sẽn na n dɩk pʋg kãnga, yaa yoob la a maanda.
33 #
Man 19,12; Ss 30,2; Yao 23,21. Yãmb le wʋma b sẽn yeel pĩnd dãmbã: Da sãam f pʋlong ye, la pids kãabg ning fãa f sẽn kãab Soaalã. 34#Zak 5,12; Iz 66,1; Mt 23,22. Mam yet-y lame: da wẽen ba bilfu, da wẽen ne yĩngr tɩ yaa Wẽnd zaoore. 35#Iz 66,1; Yɩ 48,2. Da wẽen ne tẽnga tɩ yaa Wẽnd nao palgr zĩiga. Da wẽen ne Zerizalɛɛm tɩ yaa Na-kãseng tẽnga. 36Da wẽen ne f zugu tɩ f ka tõe tɩ f zoobg a ye pelg bɩ sob ye. 37Y sã n tog n leok tɩ N-yẽe! Bɩ y leok tɩ N-yẽe! Sã n tog n leok tɩ Ayoo! Bɩ yɩ Ayoo! Sẽn zʋʋg rẽ yita yam-beeda soab nengẽ.
38 #
Ey 21,24; Man 24,20; Yao 19,21. Yãmb wʋmame tɩ b yeelame: Nif n dond nifu, yẽnd n dond yẽnde. 39Mam yet-y lame tɩ y ra rok y sũur ne y bɛ ye. Ned sã n wẽ f rɩtg yɛgdg pɛka bɩ f wẽneg f goabgã n tees-a; 40a sã n dat n kẽes-f bʋʋdo n deeg f fu woko, bɩ f paas-a f fu taoko. 41Ned sã n modg-f tɩ f yãag-a naoyakem tusr bala, bɩ f yãag-a naoyakem tus a yiibu. 42Ned sã n kos foo bɩ f kõ-a; a sã n dat n peng bɩ f ra zãgs ye.
Bɛɛb nonglem
(Lk 6,27-28, 32-36)
43 #
Man 19,18. Yãmb wʋmame tɩ b yeela pĩnda: Nong f zoa la f kisg f bɛyã. 44Mam yet-y lame: nong-y y bɛɛba la pʋʋs-y sẽn namsd-b yãmba yĩnga. 45Woto yãmb na n yɩɩ Ba ning sẽn be-a arzãna kamba, tɩ b basda b wĩndg t'a pukd nin-sõma la nin-wẽnse, la b basda b saaga t'a niid nin-sõma la nin-wẽns yĩnga. 46Yãmb sã n nong sẽn nong-b yãmb bala, bõe rolb la y na n le gũ yɛsa? Sẽn deesd-b fadga ka maan dẽ sɩda? 47Yãmb sã n pʋʋsd y saam-biisa bala, bõe la toogo, bu-zẽmba ka maand boto sɩda? 48#Man 19,2; Yao 18,13. Yãmb me modg n yɩ sõma wa y yĩngr Ba wã sẽn ya sõmb zãngã.
Currently Selected:
A Matiye Sõng 5: SSDC98
Highlight
Share
Copy
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.