Lukwu 24
24
Jizọsi lizọru n'ẹnwu
(Mat 28:1-10; Mak 16:1-8; Jọn 20:1-10)
1N'ọnu ọsisi n'ọbochi mbọm n'ikwezu, ele rinya wam gweru mọno otute wam be gwakọtaru ke nwernu ẹknarna ọma, zne ilili Jizọsi. 2Be whnụrnu nụ be vumernu akaworugwu be jiri kpusni ọnu ilili wam. 3Be bnazne nụ rime ilili, be whnụ́ge iznu Nyenwe aị Jizọsi. 4Be gwuzoru naarị nhne ka bụ, ngangam, ele rukna lawụru wogwu iwo abọchna noogbu amụma gwuzoru nụ ngeri be. 5Ogwnu tụru ele rinya wam, be dna kpu ruwhnu n'ẹli, kọvu ele rukna wam kanụ be, “Kịni kpayarụ anụ noopio nye zị bụdnu n'esilawụru ele nwụrnu ọnwu? 6Ọ zị́la hna, o hilem n'ẹnwu lizọ. Anụ chenwanya nhne ọ kannụ anụ nga ọ zị nụ Galili, 7nụ be jeegweru Nnwọ ke Badnụ nyega ele mmehie, be kpọgidne a n'ọgba, n'ọbochi ke ẹto, o jeehi n'ẹnwu lizọ.” 8Ele rinya wam chenwanya ikwu-ọnu a.
9Be hi n'ilili wam lahna, kanụ nri nụ otu badnụ ele sno apna a nụ ele berere nhne be whnụrnu. 10Ele rinya wam bụ Meri Magịdalini, nụ Joana, nụ Meri nne Jemisi, be nụ ele rinya berere kanụ ele izi wam ọka ka. 11Kọvu be kwége nhne ele rinya kwuru, be naarị nụ ọ bụ ọka etekne. 12Pita lizọ, gba ẹso zne n'ilili, o whudna, whnụ ikpe iznu, ọ zá nhne berere ọ whnụrnu. Ọ lahna ọro naarị nhne mernu.
N'apna zne Emaọsi
(Mak 16:12,13)
13N'ọbochi wam, ele sno apna a lawụru neezne ẹli Emaọsi, nhne nụ lele maịli ẹsau. 14Be nookwurita kpakara nhne mernu. 15Kpa be neezne nookwu nhne ka, Jizọsi n'iwhuru a kpayabetụru ndụndu, snornu be neezne. 16Be whnụ a, kọvu be máa nụ ọ bụ Jizọsi.
17Jizọsi sịkwa be, “Kịni bụ nhne anụ nọotnurni kpa anụ neezne?”
Be gwuzoru bii, gbarụ ruwhnu. 18Otu nụ rime be rẹwhna a bụ Kilopasi, sịkwa a, “Okwole jịwa bụ nye izne ke zị nụ Jerusẹlem nye máa nhne mernu ọbochi ele nụ ele ka wheru ewhe?”
19Jizọsi sịkwa a, “Kịni bụ nhne kọ?”
Be kaa, “Nhne gbasịri Jizọsi nye Nazarẹti, nwerukna ka bụ nye ọwhnurninya Chiokike, ọ bụ dikne n'ikwu-ọnu ma nụ ẹrnu nụ ruwhnu Chiokike ma nụ ruwhnu ele badnụ. 20Ele risi arịohna nụ ele risi aị gweru a nyee ma be kpe ikpe ẹnwu, be kpọgidne a n'ọgba. 21Kọvu a leru anya nụ ọ bụ nye jaagbahịa Izirẹli. Ke kakwo, tna bụ ọbochi ẹto a kpa nhne ka mernu. 22Agwna ele rinya aị nụ be zị kpasịri aị ogwnu tna. Be znernu n'ilili a n'ọnu ọsisi, 23kọvu be whnụ́ge iznu a. Be va kanụ aị nụ be whnụrnu ọwhnurninya ele enine izi, ke kannụ be nụ ọ zị bụdnu. 24Agwna ele aị nụ be zị znernu ilili a, whnụ masị lele kpa ele rinya wam kwuru, kọvu be whnụ́ge iznu a.”
25Jizọsi kanụ be, “Anụ bụ ele iwhnirniwhno, anụ zị́la gnarnagnarna nụ okweru nhne kpakara ele ọwhnurninya kwuru. 26Ọ zị mkpa nụ Karaịsi jaata kpakara awhnụwhnu, bna n'igwugwu a.” 27Jizọsi kọwamanu be nhne be gbarụ n'ọkwukwo nsọ gbasịri ẹhni a, hite n'ọkwukwo Mozizi nụ ele ọwhnurninya.
28Kpa be vaduru ẹli wam be neezne, Jizọsi mee lele o neewhe ruwhnu, 29be sigidne a, kaa, “Snornu aị dazịri, ọbochi zneminem.” O snornu be dazịri.
30O snornu be dazịri ẹli n'ikpechi wiri, o gweru brẹdi, tụ mmamma, nyawama a, bete neenye be. 31Anya be kpume, be mahịa a, kọvu o whume n'anya be. 32Be kwukwarita n'ẹhni be, “Ọ nụ lele nụ bẹkwnu neerne nụ mkpọma aị nga o nookwunu aị ọka n'apna, nọokowanu aị ọkwukwo nsọ.”
33Be lizọ ngangam lahna Jerusẹlem. Be whnụ ele sno apna a nri nụ otu wam, hne be gbakọgwu nụ otu nụ ele berere. 34Be naakaa, “Ọ bụ n'ezi, Nyenwe aị hilem n'ẹnwu lizọ, o mernu Saịmoni whnụ a anya.” 35Badnụ lawụru wam kọwanu be nhne mernu n'apna, nụ kpa be jiri mahịa Nyenwe aị nga ọ nyawarụ brẹdi.
Jizọsi mernu ele sno apna a whnụ a anya
(Mat 28:16-20; Mak 16:14-18; Jọn 20:19-23; Ẹrnu 1:6-8)
36Kpa be zị nookwu ọka ka, Jizọsi gwuzoru n'esilawụru be, kanụ be, “Udno zịnu anụ.”
37Ogwnu tụru be k'agịda, be che nụ be whnụrnu rẹnwu. 38Jizọsi kanụ be, “Kịni mernu ogwnu nọotu anụ? Kịni mernu anụ neenwe mkpọma lawụru nụ mkpọma anụ? 39Anụ le aka m lawụru nụ ọchi m lawụru. Ọ bụ mawa. Anụ kpatụ m aka whnụrnu, rẹnwu nwée anọ-ẹhni nụ ọkpukpu, lele kpa anụ whnụrnu me nwernu.”
40Nga o kwuru ka, o gesi be aka a lawụru nụ ọchi a lawụru. 41Be nwée rikne kweru kwnornu ovu ọso n'ọnu nụ ọtun'anya, ọ sịkwa be, “Anụ nwernu wiri o riri hna?” 42Be nyee a otu aznụ be siri esi, 43o gweru a ri nụ ruwhnu be.
44Ọ kanụ be, “Ka bụ nhne me kannụ anụ nga me nụ anụ zị. Kpakara nhne be gbarụ n'ọkwukwo nsọ gbasịri m n'iwu Mozizi jeeme, ma ke ele ọwhnurninya nụ Eri Ọma.”
45O kpume echiche be ma be ghọhia nhne be gbarụ n'ọkwukwo nsọ. 46Ọ kanụ be, “Ka bụ nhne be gbarụ n'ọkwukwo nsọ, nụ Karaịsi jaatarịri awhnụwhnu, nụ o jeehi n'ẹnwu lizọ n'ọbochi ke ẹto, 47nụ be jeeji rẹwhna a kpọ okwo ọtuhnasna mkpọma nụ rime kpakara mba, ma Chiokike gbarụ mmehie be. Be jeehite nụ rime Jerusẹlem panịzo nọokpo okwo. 48Anụ bụ ele akebne kpakara nhne ka. 49M jeeziyanu anụ nhne Nda m kweru nụ mkwna, kọvu anụ dazịri nụ Jerusẹlem tem rikne ke hi n'oligwe dnakwasị anụ.”
Jizọsi larụ n'oligwe
(Mak 16:19,20; Ẹrnu 1:9-11)
50Jizọsi duru be whọga zne n'ẹli Bẹtani, ọ chịlizo aka lawụru olu, gọzi be. 51Kpa ọ zị nọogozi be, be gwelizọ a la n'oligwe. 52Be kpọnu a risi ẹli, lahna Jerusẹlem, snarnịma jihịa mkpọma be. 53Be dazịgidne n'Ọro Nsọ Chiokike nọotunu Chiokike mmamma.
Currently Selected:
Lukwu 24: ikwNT
Highlight
Share
Copy
Want to have your highlights saved across all your devices? Sign up or sign in
© 2010, The Nigeria Bible Translation Trust and Wycliffe Bible Translators, Inc. All rights reserved.