ठुङ् 1
1
जम्बुलिङदेन मु स्होबा
1जम्मान भन्दा ङाच्छा परमेश्वरसे मुदेन जम्बुलिङ स्होजी। 2थे धुइरी जम्बुलिङला तिगै रुप आरेबा ओच्छे सुनसान मुबा। जम्मान ग्लारी क्युइनोन क्युइ मुबा ओच्छे धोपधोप मुबा। थे क्युइथोरी परमेश्वरला आत्मा कोर्मुबा।
3ओच्छे परमेश्वरसे “य्हाल तउ” भिसी सुङ्जी। जमाहेन्से य्हाल तजी। 4परमेश्वरसे य्हालदा स्हीजी, थे ज्यबा मुबा। जमाहेन्से परमेश्वरसे य्हालदेन धोपदा फेजी। 5ओच्छे परमेश्वरसे य्हालदा “धिन” धोपदा “म्हुन” भिसी मिन थान्जी। धोप तजी ओच्छे य्हाल तजी। चु ङाच्छालाकुनु मुबा।
6ओच्छे परमेश्वरसे “क्युइला गुङ्री खाली ग्ला गिक तगै थे ग्लासे क्युइदा भो न्ही लगै” भिसी सुङ्जी। 7परमेश्वरसे थे खाली ग्ला स्होसी खाली ग्ला दिलादेन थोला क्युइदा फेजी। जमाहेन्से थेह्रङ्नोन तजी। 8परमेश्वरसे थे खाली ग्लादा “मु” भिसी मिन थान्जी। धोप तजी ओच्छे य्हाल तजी। चु न्हीरेलाकुनु मुबा।
9ओच्छे परमेश्वरसे “मु धिरी मुबा जम्मान क्युइदा ग्ला गिकरी पोप तगै ओच्छे खार्बा स म्राङ्गै” भिसी सुङ्जी। ओच्छे थेह्रङ्नोन तजी। 10परमेश्वरसे खार्बा सदा “जम्बुलिङ” ओच्छे ग्ला गिकरी पोप तबा क्युइदा “समुद्र” भिसी मिन थान्जी। थे म्राङ्सी परमेश्वर ताङ्जी। 11जमाहेन्से परमेश्वरसे चुह्रङ् भिसी सुङ्जी, “थरीथरीला अन्नगदेदेन गेडा मुबा थरीथरीला रो रोबा ल्हानान थरीला दोङगदे जम्बुलिङरी फुइगै” ओच्छे थेह्रङ्नोन तजी। 12चुह्रङ् लसी ल्हानान थरीला दोङगदे जम्बुलिङरी फुइजी, थे जम्मान म्राङ्सी परमेश्वर ताङ्जी। 13धोप तजी ओच्छे य्हाल तजी, चु सोमरेलाकुनु मुबा।
14ओच्छे परमेश्वरसे चुह्रङ् भिसी सुङ्जी, “धिनदेन म्हुन फेबाला लागिरी मुरी लनी, धिनीदेन सारगदे तगै, थेनीगदेसे धुइ, धिनदेन दिङ् फेबा गे लगै। 15ओच्छे जम्बुलिङरी य्हाल तना लबारी थेनीगदेसे मुग्याम य्हाल पिन्गै।” जमाहेन्से थेह्रङ्नोन तजी। 16परमेश्वरसे लनीदेन धिनी स्होजी, धिनी चा धिनथोरी शासन लबारी लनी चा म्हुनथोरी शासन लबारी स्होजी। ओच्छे सारगदेएनोन स्होजी। 17परमेश्वरसे थे लनीदेन धिनीदा जम्बुलिङथोरी य्हाल तना लबारी, 18धिनदेन म्हुनथोरी शासन लबाला लागिरी ओच्छे य्हालदेन धोप फेबाला लागिरी मुरी थान्जी। थे जम्मान म्राङ्सी परमेश्वर ताङ्जी। 19धोप तजी ओच्छे य्हाल तजी, थे ब्लिरेलाकुनु मुबा।
20ओच्छे परमेश्वरसे चुह्रङ् भिसी सुङ्जी, “क्युइ थरीथरीला जन्तुगदेसे प्लिङ्गै, ओच्छे चरागदे चा मुरी फ्याङ्गै।” 21चुह्रङ् लसी परमेश्वरसे क्युइरी चिबा घ्रेन घ्रेन जन्तुगदे, जम्मान थरीला जन्तुगदेदेन जम्मान थरीला चरागदे स्होजी। थे जम्मान म्राङ्सी परमेश्वर ताङ्जी। 22ओच्छे परमेश्वरसे थेनीगदेदा “छार्बान ल्हेबान समुद्र नाङ्नोन तसी निउ, ओच्छे चरागदेएनोन जम्बुलिङ नाङ्नोन ल्हेबान निगै” भिसी मोलम पिन्जी। 23धोप तजी ओच्छे य्हाल तजी, थे ङ्हारेलाकुनु मुबा।
24जमाहेन्से परमेश्वरसे चुह्रङ् भिसी सुङ्जी, “जम्बुलिङरी थरीथरीला सुल्सी भ्रबा जन्तुगदे, दिमरी न्हबा जन्तुगदेदेन ह्रिरी चिबा जन्तुगदे तगै,” ओच्छे थेह्रङ्नोन तजी। 25परमेश्वरसे जम्बुलिङरी थरीथरीला सुल्सी भ्रबा जन्तुगदे, दिमरी न्हबा थरीथरीला जन्तुगदेदेन ह्रिरी चिबा थरीथरीला जन्तुगदे स्होजी थे जम्मान म्राङ्सी परमेश्वर ताङ्जी।
परमेश्वरसे म्हिदा ह्राङ ह्रङ्बान स्होजी
26परमेश्वरसे दोःसी चुह्रङ् भिसी सुङ्जी, “दाहेन्से य्हाङसे म्हिदा य्हाङलान रुपरी य्हाङ ह्रङ्बान स्होइ। थेनीगदेसे समुद्रला तार्ङागदे, मुरी फ्याङ्बा चरागदे ओच्छे जम्बुलिङरी मुबा सुल्सी भ्रबा जन्तु, दिमरी न्हबा जन्तुदेन ह्रि जन्तुथोरी शासन लगै।” 27थेतबासेलमा परमेश्वरसे म्हि य्हुलदा ह्राङलान रुपरी स्होजी। परमेश्वरसे ह्रेम्बोकोलादेन म्रिङ्कोला न्हीनोन स्होजी। 28परमेश्वरसे म्हिदा चुह्रङ् भिसी मोलम पिन्जी, “एला ल्हानान झा झामे तगै, ओच्छे एला सन्तानसे जम्बुलिङ प्लिङ्गै, ओच्छे जम्बुलिङथोरी शासन लउ। थेह्रङ् लसीन समुद्रला तार्ङागदे, मुरी फ्याङ्बा चरागदेदेन जम्बुलिङरी मुबा जम्मान जन्तुगदेथोरी शासन लउ।” 29जमाहेन्से परमेश्वरसे चुह्रङ् भिसी सुङ्जी, “च्यागो, जम्बुलिङरी जम्मान ब्लु फुइबा दोङगदेदेन रोरीन ब्लु मुबा जम्मान थरीला रोगदेला दोङ पिन्बा मुला, थे एनीगदेदा चबाला लागिरी हिन्ना। 30ओच्छे जम्बुलिङरी मुबा जम्मान थरीला जन्तुगदेदेन मुरी फ्याङ्बा जम्मान थरीला चरागदे, जुन जन्तुगदेला सा मुला, थेनीगदेदा चबाला लागिरी ङाइ पिङ्गै छेगदे पिन्बा मुला” ओच्छे थेह्रङ्नोन तजी। 31ह्राङसे स्होबा जम्मान स्हेदा म्राङ्सी परमेश्वर ल्हानान ताङ्जी। धोप तजी ओच्छे य्हाल तजी, थे ढुरेलाकुनु मुबा।
Currently Selected:
ठुङ् 1: TAJ
Highlight
Copy
Compare
Share
Want to have your highlights saved across all your devices? Sign up or sign in
© 2026 Eastern Tamang Language Team and Wycliffe Bible Translators, Inc.