Valoma 15

Indivaikila tuvanonowange vanji

1Napanelo wetu tuvakunanopa po indituvaikila tulipililile kudabadabanga kwa avalá vákananopa na i pakulota itunagwele wewe tuvene. 2Kula munu pakati petu antadye nshitanonomwagwe innagwele kwauwambone wake jo mwene pakulota annonowange. 3Mwaa ata Klistu halinnagwaladidye jo mwene kanji kenga indyandikigwa, “Kutukana kwa avalá vantukána mwenu, kuningugwilila nangu.”#15:3 Lola Dimu 69:9.

4Mwenu, uti avilá vyandikígwe kunantandi, vindyandikigwa pakulota vitupundishe kwambangidya dashi kwaindila yakulipililila na yakupambadyangigwa kwamaandiko tuvenavo lilindilililo. 5Napane Nnungu jo áing'a kulipililila na kupambadyanga, antadye mukumbukile shinu shosho pakati penu kwodananavo amulá mumwe Klistu Yesu 6kwambangidya kwantima umo na lidi limo, mumupe lishangelo Nnungu umwe Umu wetu Yesu Klistu jo Tatamunu wake nae. 7Nadoni kalibishania kenga Klistu mwenu aninkalibisha, tenda davo po kwalishangelo lyake Nnungu.

Klistu ni lilindilililo lyavayuda na vamidi

8Mwenu, nangu ninkumwaulila doni, Klistu andilitenda kuva ntumika wa avalá vakumulígwe likumbi kwamwaa waumwiu wake Nnungu pakulota atandedye kulivikila kwavanyakalamunu 9kwambangidya vamidi vamupe lishangelo Nnungu kwamwaa washididi shake kenga indyandikigwa,

“Napavedoni nangu ndakutumbyanga pakati pavamidi,

ndaimba ngutumbyanga lina lyako.”#15:9 Lola II Samuwele 22:50; Dimu 18:49.

10Kutwala kavili kushidoni,

“Puwanga mmamidi pamo na venentete vake.”#15:10 Lola Kumbukumbu 32:43.

11Kavili doni,

“Ntumbyange Umu, uti mwenu mmamidi,

indivaikila venentete uti vantumbyange.”#15:11 Lola Dimu 117:1.

12Kutwala Ishaiya nanae ankushidoni,

“Lundapandukanga lushija kumwe Yeshe,

lwanavo lundatakatuka kuvatawala vamidi,

kwalwanavo, vamidi vandavika lilindilililo lyave.”#15:12 Lola Ishaiya 11:1, 10.

13Napane Nnungu walilindilililo amuumbadye lipuwilo uti pamo na amani nkati mukukulupila pakulota kwaindila yadimongo dya Imumu Wanashwe, muumbaligwe na lilindilililo.

Utumika umwe Paulu kwavamidi

14Mmanung'unumunu nangu nimwene ninkuvanavo wakika kenga mwenu mundyumbaligwa na wambone mùumbaligwidye na limanyilo uti muulula kupundishania shivanavene. 15Kanji napane mumyaa vinji nimwandikila pandikajugulanga shinu pakulota ninkumbuwange. Nditenda davo kwamwaa waumonyo wangupele Nnungu 16wakuva nintumika umwe Yesu Klistu kwavamidi mukutumika ntenga wambone wa Nnungu muunashilangola wakupalakedya shadaka kwambangidya vamidi vatandegwe kuva shadaka shinnagwéla Nnungu,#15:16 Kwali: …kwambangidya shadaka shavamidi shikubaligwe. shadaka shitandégwe kuva shakwilimyanga kwa Imumu Wanashwe.

17Napavedoni nkati mumwe Klistu Yesu, nangu ninkulitamangila kwa avilá vivéle kwa Nnungu. 18Mwenu, hangunalyalaveka shinu kutangola shoeshoe pashikava ashilá shatandile Klistu Yesu kwaindila yangu yakuvaidanavo vamidi mukwigwilila; kwalilove na kwashimadengo, 19kwadimongo dyavimanyikilo na vyakutikinikanga, kwadimongo dya Imumu wa Nnungu. Nadoni kwangu nangu apa, kutunduvangila pa Yelusalemu na indila uti mpaka ku Ililiku ndivalanganga ngala ntenga wambone umwe Klistu. 20Doni, shabaa yangu ni kuvalanganga ntenga wambone apalá pavakanava kwigwa lina limwe Klistu kwambangidya dashi, hangunadenge pashanya shitunduvangilo shamunu junji 21kenga indyandikigwa,

“Avalá vákaigwite vammalanganga, vandamwona

na avalá vákamwigwite, vanammanya.”#15:21 Lola Ishaiya 52:15.

Nnugu umwe Paulu wakuka ku Loma

22Ni ashi shíshingudingadinga pakulota hangunaide kwenu. 23Kanji pakuva hanguvenavo lyutu kavili mudisemu adi lyakukola madengo na kwoda myaka vyoe nguvanavo lilotelo lyakwida nannola, 24pangutwala mwanda kuka ku Eshipanya ngupita ako, ninkulindila kunnola na mwenu mungupwashele mushimwanda shangu shakwanavo ling'oto lyakupuwanga padyoko namu mwenu. 25Ambi napane ninkuma kuka ndavatumika vakwilimyanga ku Yelusalemu. 26Mwaa ku Makedoniya na ku Akaya indivanagwela kutenda nshango kwamwaa wavakave pashinu pakati pavakwilimyanga va ku Yelusalemu. 27Indivanagwela kutenda davo na kwaumwiu vanavo ni vakudaigwa kwaupande wave. Mwaa ikava kenga vamidi vandiliinjidyanga muvinu vyaimumu vyave, indivavaikila momo vavatumike mushipato shave. 28Nadoni pangulota kumalila shimadengo asho na kuvakamudya aulá nshango utandéke kwamwaa wavanavo, ndapita ninnola mwenu nguka ku Eshipanya. 29Ninkumanya kenga pangulota kwida kwenu ndaida nguumbaligwidye kwalaligwa kumwe Klistu.

30Ninkunnaililila mmanung'unumunu kwaindila imwe Umu wetu Yesu Klistu na kwalinagwaledyo lya Imumu doni, ling'e dimongo namu nangu mukushwali munjugwa Nnungu kwamwaa wangu 31pakulota dashi, nangu nguposhegwe kwa avalá vákaigwilila vavéle ku Yudeya na pakulota utumika wangu ku Yelusalemu witikilike na vakwilimyanga 32kwambangidya Nnungu akalota, ngwide ninnole na lipuwilo ngutwale ngupagwe namu mwenu ngupumula. 33Nnungu waamani apagwe namu mwenu uti. Ame.

Currently Selected:

Valoma 15: kde

Highlight

Compare

Copy