Lukashi 22
22
Yudashi ankupakanila yakunnimya Yesu
Mateu 26:1-5, 14-16; Malukushi 14:1-2, 10-11; Nshuwau 11:45-53
1Napanelo shikukulu shamagung'u ákave nkukumuku shavashishema Pasaka,#22:1 Shikukulu shamagung'u ákave nkukumuku shishitandeka muwakati waishumana imo ling'oto lyaliduva lya Pasaka kanji kwodamwaa vishindalundananga vashindaunganianga kushema uti Pasaka. Lola Kuma 12:1-20; Kumbukumbu 16:1-8. shishindavandikanga. 2Nadoni vanang'olo vavakulangalalela-shadaka pamo na vamwalimu vadishaliya vashindalambela dindila dyakummalididya Yesu mwaa vashindavajopa venentete. 3Napanelo Shatwani andímwinjila Yudashi wavashinshema Shikaliyote munu wamushipinga shavakwoda vake Yesu kumi na mbili avalá. 4Kutwala Yudashi kuka ndalya shemba na vanang'olo vavakulangalalela-shadaka pamo na vanang'olo vavakushunga-ing'ande ya Nnungu avalodya mwakunnimidya nae Yesu kwavanavo. 5Kutwala vanavo kupuwanga na kulivika kunnipa njuluku. 6Bai Yudashi andívaungila nkono na andílambela dindila dyakuvakamudidya Yesu shipiipii.
Yesu ankulya Pasaka na vakwoda vake
Mateu 26:17-25; Malukushi 14:12-21; Nshuwau 13:21-30
7Napanelo liduva lyashikukulu shamagung'u ákave nkukumuku livaikidíle vayuda kunshinda ngandolo wapasaka lindíwika. 8Likawike, Yesu aníntuma Patulu namu Nshuwau aashidoni, “Wena mukapanganiange shikukulu sha Pasaka tulye.” 9Vanavo kumudya, “Ulota tuke tukapanganiange kwashi?” 10Yesu kushidoni, “Lola, pamwinjila nkaja mundashingananavo munu jumo ànyukete shilongo shamedi; mwenu mwode mpaka paing'ande yalota kwinjila 11mutwale mumwaulile mwene ing'ande ayo doni, ‘Mwalimu andákudya, Shumba shani shalota kulyela shikukulu sha Pasaka na vakwoda vake?’ 12Nae anannangudya lyutu lyakulyandaula shana livenavo vinu uti; mwenu panganianga popo.” 13Vanavo pavaukile vandyánela mo mwavaulilidile Yesu; bai vanavo vandípanganianga Pasaka ayo.
Ndamu umwe Umu
Mateu 26:26-30; Malukushi 14:22-26; I Vakolintu 11:23-25
14Wakati pauwikile, Yesu andíikala pandamu pamo na vamyombe vake 15kutwala kuvaulila doni, “Iningunagwela namene kulya shikukulu sha Pasaka ashi namu mwenu nikanava kuuvauvanga. 16Ninkumwaulila doni, hangulya kavili shikukulu sha Pasaka shinji namu mwenu mpaka pashilota kutandeka shiilanianga mana ake uti muutawala wa Nnungu.” 17Muwakati wowo Yesu andítwala shikombe kunnambwalela Nnungu kutwala kushidoni, “Twala mulakalanile. 18Ninkumwaulila doni, hangukumbila kavili ugwalwa wavinyu mpaka pawida utawala wa Nnungu.”
19Namomo andítwala ligung'u kunnambwalela Nnungu, kumajanianga kuvapa vakwoda vake aashidoni, “Au ni mili wangu ujaulíka mwaa wenu mwenu. Tenda shinu ashi mungukumbukila nangu.” 20Pavamalidile kulya, andítwala shikombe kutandela momo aashidoni, “Shikombe ashi ni imbodi yaambi yamyadi vyangu vijaíka mwaa wenu mwenu.
21“Kanji mwe! Namalimya álota kungulimya nangu, apali namu nangu po pandamu apa. 22Kutangola mwiu, Mwana Wamunu ankuukila mo mwampangilidile Nnungu kanji shonde munu álota kunnimya jo!” 23Bai vanavo vandyúdyania, “Apali apa wakutenda shitendo asho?”
Vakwoda vankuudyania kavili, nyani nang'olo?
24Napanelo pakati pavakwoda undyúmilila ntau valota vammanye nyani áshivaikila kuva nang'olo pakati pave. 25Yesu kutwala kushidoni, “Vaumu vashilambo ashi vankulitumbudya kwavenentete vave na avalá vakamulidíle madalaka vankulivika kuva vanu vakutandedya wambone kwavenentete. 26Kanji mwenu hamunave davo; nang'olo pakati penu alitende kuva kenga ndyoko uti na nanangalaledi ave kenga ntumika. 27Mwenu! Da nang'olo shana ava aijá ánaikala pandamu kwali aijá ánavatumikila vaikalénge pandamu? Da hanava aijá ánaikala pandamu? Kanji napanelo nangu pakati penu nguvelé kenga aijá ánavaangaikangila vanu pandamu.
28“Mwenu ni múnapagwa ngwengwe namu nangu mumauvilo angu. 29Napavedoni ninkunkamudya utawala kenga mo mwangukamudididye nangu Atata 30pakulota mulye na mukumbile pandamu wangu muutawala wangu na mwikale muviteng'u muukumu makola kumi na mbili amwe Ishilaeli.”
Patulu anankana Yesu
Mateu 26:31-35; Malukushi 14:27-31; Nshuwau 13:36-38
31Yesu kavili kushidoni, “Simoni, Simoni, ngwigwa. Shatwani andijugwa ampate mwenu pakulota ampete kenga ngano. 32Kanji nangu ndikujugwila kwambangidya likulupililo lyako halinajaike. Napanelo wako paunguujila po, vanonowange vanung'unumunu.” 33Patulu kushidoni, “Nang'olo, nangu nguvelé tayali kwinjila namu wako nkalaboshi na kupela namu wako.” 34Umu kutwala kushidoni, “Patulu, ninkukwaulila doni, nelo ng'uku ntandi akanava kukangavela wako unangukana myanda mitatu.”
Yesu vanantenda kuva nkalau
35Kutangola kavili kushidoni, “Panintumile pamukanyukata njuluku, lipeta kwali vilatu, dashi shindípagwa shimwovíte?” Vanavo do, “Hashipagwite.” 36Yesu kushidoni, “Napanelo aijá ávenavo njuluku na ávenavo lipeta anyukate. Ákave na lyambila, ashulushe likoti lyake ashume lyambila. 37Ninkumwaulila doni, ambi apa vilota kutandeka avilá vyandikíke doni, ‘Vanimpambanianga mushipinga shavaungave-lilamulo.’ Mwaa uti vyavaandike vingwamba nangu, mwiu vindatandeka.” 38Vanavo, “Nang'olo, lola! Apa tunkuvanavo maambila mavili.” Nae kushidoni, “Ing'ano ai tuleke.”
Palishinga Lyamilandi Vyaulivela
Mateu 26:36-46; Malukushi 14:32-42
39Napanelo Yesu andyúma kuka kenga lidyavalelo lyake ku Lishinga Lyamilandi Vyaulivela, vakwoda vake kumwoda. 40Pawikile palyutu, andívaulila vakwoda vake kushidoni, “Shwali kwambangidya hamunainjile mukutubigwa.” 41Nae kuvaleka kuka shitamba shamadodo salasini doni ndaguguvala kushwali 42aashidoni, “Atata! Ukalota nyemya pamili pangu luwene alu#22:42 Luwene lwámba Yesu mana ake ni shitundi sha Nnungu shavavikila avalá vaténda vyamadambi mushilambo. Lola Dimu 75:8; Ishaiya 51:17, 22. ila hainave mwangulatela nangu, ive mwaulatela wako umwene.” [ 43#22:43-44 Mumaandiko matandi anji ashigalegu dinamba mbili adi 43 namu 44, hadipali.Popo po, andyúmilila njelo wakwalakela kuwa kwida nannonowanga. 44Yesu nkati mukuvauvanga kwake, andíshwali na dimongo namene na lyuduku lyashuma ligwilangila pai kuva kenga matweni makumene amyadi.] 45Patakatwike pashishwali akauke kwavakwoda vake, andívakodya vàlalenge mwaa wamatuva 46kutwala nae kuvaudya, “Mwaa shani mundilalanga? Takatukanga mushwali pakulota hamunainjile mukutubigwa.”
Kunnimya kumwe Yesu
Mateu 26:47-56; Malukushi 14:43-50; Nshuwau 18:1-11
47Napanelo Yesu akuno atangola kuwika imbumba yavanu wakulangalela kuva Yudashi munu wamushipinga sha avalá kumi na mbili; nae andyúka mpaka pavéle Yesu nankumbatila. 48Yesu kanji kushidoni, “Yudashi, unnimya Mwana Wamunu kwaindila yakumwambatila?” 49Napanelo avalá vavéle namu Yesu vakamanye víshilota kutandeka avilá vandímudya, “Nang'olo, tuvabyae maambila?” 50Munu jumo pakati pave kumwangenneu lyatu lyankanakono ntumika wake nkúlangalalela-shadaka nkumene. 51Yesu napane kushidoni, “Bai, leka.” Nae kukamula lyatu alilá kumponia. 52Kutwala apo, andívaudya vanang'olo vavakulangalalela-shadaka, vanang'olo vavakushunga-ing'ande ya Nnungu pamo na vanang'olo vamuukidíle nankamula avalá kushidoni, “Kenga nkalau shamwida na maambila pamo na dilungu? 53Nangu panishipagwa ngwengwe namu mwenu mwing'ande ya Nnungu, mwenu hamunguungile. Kanji au ni wakati wenu, wakati wamadalaka akushii.”
Patulu ankunkana Yesu
Mateu 26:57-58, 69-75; Malukushi 14:53-54, 66-72; Nshuwau 18:12-18, 25-27
54Bai vanavo vanínkamula kumuukanavo kwing'ande yankúlangalalela-shadaka nkumene; Patulu andyúka amwoda mwakushu. 55Vanavo vandíkong'a moto wave shing'ati lugwani vene kwikalanga nanae Patulu kuka ndaikala popo. 56Napanelo ntumika jumo mwali anínnola Patulu ndoo kutwala kushidoni, “Munu aju momo andípagwa namu Yesu.” 57Patulu doni, “Gwee! Nangu munu ajo hanimmanyite.” 58Kutima padyoko munu junji pakati pave kunnola Patulu nanae kushidoni, “Nawako momo uvelé mpinga wowo.” Patulu do, “Wako! Nangu nkati mo, hangupali.” 59Ikapite isaa kenga imo doni munu junji anímmalanganga kavili aashidoni, “Mwiu, munu aju momo andípagwa mpinga wowo mwaa nanae aju, ngalileya.” 60Nae do, “Jii! Nangu shautangola wako sho, hangumanyite.” Bai Patulu akuno atangola, ng'uku kukangavalenneu 61kutwala Umu kushiliuka kunnola Patulu, Patulu kukumbukilinneu malove ake Umu amwaulidíle kushidoni, “Nelo ng'uku ntandi akanava kukangavela wako unangukana myanda mitatu.” 62Bai Patulu andyúmila panda ndatumbula ing'uto.
Yesu vankumwiludyanga
Mateu 26:67-68; Malukushi 14:65
63Napanelo vanu váshinnaledya Yesu vaníntukana, vanínkanyola 64namomo vandímunga lilesho kumevo vamudya, “Valanga, akukanywelé nyani?” 65Vovo vo vashinantangalela malove anji oe akumwabolanga.
Yesu paikamati
Mateu 26:59-66; Malukushi 14:55-64; Nshuwau 18:19-24
66Napanelo wiku paushwenge, nkodyanio wavanang'olo vavenentete kutunduvangila vanang'olo vavakulangalalela-shadaka pamo na vamwalimu vadishaliya vandíikala nguguvale kuntwala Yesu kumwimidya paikamati yave. 67Vanavo kumudya, “Wako ukava Klistu, twaulila!” Kanji nae kushidoni, “Ndikamwaulila ata hamukulupila 68na ndikamudya hamungujang'ula ata padyoko. 69Kanji kutunduvangila ambi apa Mwana Wamunu andaikala kunkanakono kwake Nnungu Wadimongo-uti.” 70Vanavo uti kumudya, “Da napanelo wako po umwanagwe Nnungu?” Nae kushidoni, “Mwenu ni múnguvalanganga.” 71Vanavo do, “Shapo tulambela ushuda shani kavili? Da i tundimwigwa tuvene vyatangwele?”
Currently Selected:
Lukashi 22: kde
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.