JESAJA 32
32
Israel se groot redding
1Kyk, daar kom ’n koning
wat regverdig sal wees!
En leiers sal eerlik oor die volk regeer.
2Hy sal Israel beskerm
teen die wind en die storm.
Hy sal hulle verfris
soos ’n rivier in die woestyn
en soos die koel skaduwee
van ’n groot rots
in ’n verlate land.
3Dan sal almal wat kan sien,
God raaksien.
En almal wat kan hoor,
sal na sy stem luister.
4Selfs die heethoofdiges
onder hulle
sal kalm raak en verstaan.
Die mense wat onseker hakkel,
sal gemaklik kan praat.
5’n Dwaas sal nie meer
as eerbaar beskou word nie,
en ’n skurk sal nie meer
gerespekteer word nie.
6Almal sal dwase
raaksien vir wat hulle is.
Hulle versprei liegstories
oor die Here.
Hulle steel honger mense se kos.
Hulle gee nie water
vir mense wat dors is nie.
7Die skelmstreke van skurke
sal onthul word.
So ook al die liegstories
wat hulle vertel het
om arm mense in die howe
te verdruk.
8Maar eerbare mense
het eerbare planne.
Hulle sal eerbaar
behandel word.
9Luister, vroue
wat selfvoldaan lewe.
Luister na my,
julle wat so selfversekerd is!
10Binnekort,
oor ’n bietjie meer as ’n jaar,
sal julle wat nou so sorgeloos is
skielik iets hê om oor te bewe.
Want julle vrugte-oes
sal vergaan.
Daar sal geen oes wees nie.
11Bewe, onbesorgde vroue.
Raak ontslae
van julle onbesorgdheid.
Trek uit julle mooi klere.
Dra klere van sak oor julle smart.
12Slaan op julle borste van smart.
Want julle oorvloedige plase
is een van die dae daarmee heen.
So ook julle vrugbare wingerde.
13Want julle land
sal oorgroei word
met dorings en dissels.
Julle vrolike huise
en gelukkige stede
sal weg wees.
14Die paleis en die stad
sal verlate lê.
Besige dorpe sal leeg wees.
Troppe donkies en bokke
sal op die heuwels wei
waar julle uitkyktorings
eers gestaan het.
15Dit sal so bly
totdat die Gees uit die hemel
oor ons uitgestort word.
Dan word die woestyn
’n vrugbare veld.
En die vrugbare veld
word ’n welige woud.
16Regverdigheid
sal in die woestyn heers,
en geregtigheid
in die vrugbare veld.
17Reg sal veroorsaak
dat daar vrede sal wees.
En geregtigheid sal veroorsaak
dat almal rustig
en veilig sal bly.
18My volk sal veilig bly,
rustig in hulle huise.
Hulle sal vrede hê.
19Ook al vernietig hael die woud
en word die stad platgevee,
20met julle
sal dit geseënd gaan.
Waar julle ook al saai,
sal goeie oeste volg.
Julle beeste en donkies
sal die wêreld vol wei.
Currently Selected:
JESAJA 32: NLV
Highlight
Share
Copy
Want to have your highlights saved across all your devices? Sign up or sign in
2006 Christlike Uitgewersmaatskappy, Posbus 1599, Vereeniging, 1930, Eerste uitgawe 2006, Tweede uitgawe 2011