HANDELINGE 20
20
Op pad na Jerusalem reis Paulus deur Griekeland en Masedonië
1Met die betoging verby, het Paulus die gelowiges#20:1 Grondteks dissipels. bymekaargeroep en hulle moed ingepraat. Daarna het hy hulle gegroet en Masedonië toe vertrek. 2Op sy reis daarheen het hy die gelowiges met baie preke bemoedig. Hy kom toe in Griekeland aan 3waar hy drie maande deurgebring het. Toe hy op die punt gestaan het om Sirië toe te vaar, het ’n komplot teen hom aan die lig gekom. Hy het toe besluit om landlangs deur Masedonië na Sirië toe terug te gaan.
4Heelwat mans het saam met Paulus gereis. Hulle was Pirrus se seun Sopater van Berea, Aristargus en Sekundus, albei van Tessalonika, Gaius van Derbe, Timoteus, en Tigikus en Trofimus, albei van die provinsie Asië. 5Hulle het vooruit gegaan en in Troas vir ons gewag.
6Na die Pasga#20:6 Grondteks die Dae van die Ongesuurde Brood. het ons per skip van Filippi af vertrek en vyf dae later by hulle in Troas aangekom. Daar het ons ’n week gebly.
Paulus vier die maaltyd van die Here saam met die gemeente in Troas
7Ons het die Sondag#20:7a Grondteks op die eerste dag van die week. bymekaargekom vir die maaltyd van die Here#20:7b Grondteks om brood te breek.. Paulus het ’n bespreking met hulle gehou, en omdat hy die volgende dag wou vertrek, het hy tot middernag aanhou praat. 8Daar was taamlik baie lampe in die bovertrek waar ons vergader het.
9Terwyl Paulus aanhou en aanhou met die bespreking, het ’n jong man met die naam Eutigus, wat op die vensterbank gesit het, in ’n diep slaap begin wegsink. Vas aan die slaap het hy uit die derde verdieping tot onder geval. Hulle het hom as ’n lyk opgetel. 10Paulus het ondertoe gegaan, op Eutigus gaan lê, sy arms om hom gesit en gesê: “Moenie julle ontstel nie. Hy lewe#20:10 Grondteks Sy lewe is immers in hom.!”
11Paulus het weer boontoe gegaan, brood gebreek en geëet. Hy het nog ’n hele ruk met hulle gepraat, tot dagbreek toe, en toe vertrek. 12Die mense het die seun lewend huis toe gevat. Dit was vir hulle ’n buitengewoon bemoedigende ervaring.
Paulus rig vir oulaas ’n ernstige woord tot die ouderlinge van Efese
13Paulus is landlangs Assus toe, maar ons is vooruit na die skip toe en het na Assus gevaar, waar Paulus afgespreek het dat hy aan boord sou gaan. 14Hy het ons daar gekry; ons het hom aan boord geneem en Mitilene toe gevaar.
15Die volgende dag het ons by Chios verbygevaar. Die dag daarna het ons by Samos aangedoen, en nog ’n dag later het ons Milete bereik. 16Paulus het reeds voorheen besluit om by Efese verby te vaar sodat hy nie nog langer in die provinsie Asië tyd hoef deur te bring nie. Hy was haastig om, as dit kon, op Pinksterdag in Jerusalem te wees. 17Maar Paulus het van Milete af ’n boodskap na Efese toe gestuur om die ouderlinge van die gemeente te ontbied.
18Toe hulle by hom kom, sê hy vir hulle: “Júlle weet dat ek die hele tyd, van die eerste dag af dat ek in die provinsie Asië gekom het, 19die Here met my hele wese in alle nederigheid gedien het, en dat dit met trane gepaardgegaan het. Dan was daar ook die beproewings wat oor my gekom het vanweë die komplotte van sommige Jode. 20Julle weet ook dat ek nooit weggeskram het van die waarheid#20:20 Of dat ek niks teruggehou het wat vir julle voordelig kon wees nie. toe ek by julle gepreek en julle in die openbaar en in julle huise onderrig het nie. 21Ek het één boodskap vir Jode én Grieke gehad: dat hulle hulle tot God moet bekeer en in ons Here Jesus moet glo.
22“En nou is ek op pad Jerusalem toe, gebind#20:22 Of daartoe gedring. deur die Gees. Wat dáár met my gaan gebeur, weet ek nie. 23Wat ek wel weet, is dat die Heilige Gees my in elke stad verseker dat gevangenskap en vervolging voorlê. 24Al is my lewe kosbaar, ag ek dit van geen waarde as ek nie my lewenstaak en my bediening wat ek van die Here Jesus gekry het, kan klaarmaak nie: Om die Goeie Nuus te verkondig dat God mense liefhet sonder dat hulle iets hoef te doen om dit te verdien.#20:24 Grondteks Om die Goeie Nuus van God se genade te verkondig.
25“En nou is dit duidelik: Ek weet dat nie een van julle my weer sal sien nie – julle onder wie ek rondgegaan en die koningsheerskappy#20:25 Of koninkryk. van God verkondig het. 26Daarom stel ek dit vandag duidelik aan julle dat dit nie my skuld is as enigeen van julle verlore gaan nie#20:26 Grondteks dat ek onskuldig is aan julle almal se bloed., 27want ek het nie weggeskram daarvan om die volle plan van God aan julle te verkondig nie.
28“Pas julleself op en die hele kudde oor wie die Heilige Gees julle as ouderlinge#20:28a Grondteks toesighouers. aangestel het. Julle moet as herders die kerk van God versorg, dié kerk wat Hy vir Hom verkry het deurdat sy eie Seun gesterf het#20:28b Grondteks wat Hy vir Hom verkry het deur die bloed van sy eie Seun.. 29Self weet ek dat daar ná my vertrek wrede wolwe onder julle sal indring, en hulle sal die kudde nie spaar nie#20:29 Of dat daar ná my vertrek vals leraars onder julle sal indring, en hulle sal soos wrede wolwe die kudde nie spaar nie.. 30Selfs uit julle eie geledere sal daar mense na vore kom wat, deur verdraaide dinge te verkondig, die gelowiges#20:30 Grondteks dissipels. sal probeer verlei om hulle te volg. 31Daarom: Wakkerloop! Onthou dat ek vir drie jaar lank sonder ophou vir elkeen van julle die regte koers aangedui het, dag en nag, en met trane.
32“En nou vertrou ek julle aan God toe en aan die boodskap van die genade wat Hy aan mense bewys#20:32a Grondteks aan die woord van sy genade.. Dié boodskap is in staat om julle op te bou en julle in die seëninge te laat deel wat Hy aan al die gelowiges as erfporsie belowe het#20:32b Of en julle ’n erfporsie te gee onder almal wat aan God toegewy is..
33“Ek het niemand se silwer of goud of klere begeer nie. 34Julle weet self dat hierdie twee hande van my voorsien het in my behoeftes en in die behoeftes van dié wat saam met my was. 35In alles het ek vir julle ’n voorbeeld gestel dat ons só hard moet werk dat ons die armes kan help. Onthou die woorde van die Here Jesus: ‘Dit is meer geseënd om te gee as om te ontvang.’”
36Toe Paulus klaar gepraat het, het hy saam met hulle almal gekniel en gebid. 37Almal het baie gehuil en Paulus omhels en hom gesoen. 38Hulle was veral hartseer oor sy stelling dat hulle hom nie weer sou sien nie. Toe het hulle hom skip toe gevat.
Currently Selected:
HANDELINGE 20: NLV
Highlight
Share
Copy
Want to have your highlights saved across all your devices? Sign up or sign in
2006 Christlike Uitgewersmaatskappy, Posbus 1599, Vereeniging, 1930, Eerste uitgawe 2006, Tweede uitgawe 2011