Salmo 49
49
Say Andi-kakanaan a Panagmatalek ed Kayamanan#49:1-20 SAY TITULO ED TIKSTON HEBREO: Salmo na boleg nen Core.
1Dengel yo ya, amin yon katoowan!
Dengel kayo, amin yon manaayam ed inerman a pasen,
2atagey o abeba may kipapasen yo,
mairap-bilay man o mayaman kayo.
3Malinew iray kanunotan ko;
ibalikas ko ray salita na kakabatan.
4Salitaen koy nipaakar ed saray probirbio,
tan ipaliwawak so kabaliksan da leleg kon manotogtog na arpa.
5Ag ak antakot no panaon na kaatapan,
no aliktub ak na saray kalaban ko,
6saray totoon manmamatalek ed kayaryan da,
tan ilalastug day dakel a kayamanan da.
7Ag nayariay too a dondonen toy sikaton dili;
ag to nabayaran ed Dios so bilay to,
8ta mabmablin tuloy so dondon na bilay na too.
Say nayarian ton ibayar et kulang ni
9a pakapaliis tod lobuk,
tan pakapambilay ton anggad angga.
10Nanenengneng na anggan siopa ya ompapatey met iray totoon makabat,
saray luko-luko tan saray makulang-kulang,
tan ititilak dad saray kabyangay boleg da iray kayamanan da.
11Saray lobuk#49:11 Diad pigaran dagdaan a patalus Saray lobuk; diad tikston Hebreo Saray aralem a kanunotan. so panabungan dad anggad angga;
diman ira manayam ed amin a panaon,
anggaman a wala ray dalin dan dili nen saman.
12Anggan matalonggaring so sakey a too,
ag mansiansian mambilay;
ompatey nin siansia a singa saray ayayep.
13Nengneng yoy nagagawa ed saray manmamatalek ed sikaran dili,
say pansusumpalan da ray#49:13 Diad sakey a dagdaan a patalus say pansusumpalan da ray; diad tikston Hebreo a singa saray. napepenek lad kayamanan da
14nigetar iran ompatey a singa saray karniro,
tan say Patey so magmaliw a pumapastol da.
Taloen ira na saray totoon matonung
leleg a naboboluk iray laman da ed panaayaman da ray inaatey ya arawi ed kaabungan da.
15Balet dondonen ak na Dios;
ilaban to ak ed pakayari na patey.
16Ag kayo nagugunigon no onyayaman so sakey a too,
tan no nanaaruman lan nanaarumay kayamanan to;
17ag to lamlamang naawit no ompatey;
ag milad sikato ed lobuk so kayamanan to.
18Anggan maliket so sakey a too ed sayan bilay,
tan nidadayew lapud maaligwas,
19mitipon met lamlamang ed saray lalaki to no ompatey,
diad pasen a kawalaay bilonget ya ag mangangga.
20Anggan matalonggaring so sakey a too ag mansiansian mambilay,
ompatey nin siansia a singa saray ayayep.
Currently Selected:
Salmo 49: PnPV
Highlight
Copy
Compare
Share
Want to have your highlights saved across all your devices? Sign up or sign in
Philippine Bible Society New Testament © 1977, Bible © 1983
