تئطوسا 3

تارییا لایئق بئر حیات

1اونلارا خاطیرلا کی، ریئسلر و ائقتئدار صاحئبلرئنه موطئع اولسونلار، ائطاعت اتسئنلر و هر جور یاخشی ائش اوچون حاضیر اولسونلار. 2هچ کئمه ائفتئرا آتماسینلار، داعواچی اولماسینلار، حلئم اولوب بوتون ائنسانلار قاباغیندا تواضؤعکار اولسونلار. 3چونکی بئز ده بئر زامان آنلاقسیز، ائطاعتسئز، آلدانمیش، جوربه‌جور شهوتلر و عیشلره اسئر ائدئک و حیاتیمیزی خباثت، پاخیلّیق و نئفرتده کچئردئب، بئربئرئمئزدن نئفرت ادئردئک. 4آمّا او زامان کی، قورتاریجیمیز تارینین مهرئبانلیغی و اونون ائنسانلارا اولان محبّتی ظاهئر اولدو، 5او بئزی صالحلئکده اتدئیئمئز عمللرئن اساسینا یوخ، اؤز مرحمتئنه گؤره تزه خئلقتئن یوماغی و موقدّس روحون تزه اتدئیی ائله نئجات وردی. 6او روحو، قورتاریجیمیز عئسا مسئحئن واسئطه‌سی‌ائله اوستوموزه بول-بول تؤکدو 7کی، اونون فیضی‌ائله صالح ساییلیب، ابدی حیاتینین اومئدئنه گؤره وارئث اولاق. 8بو سؤز، اعتئمادا لایئقدئر؛ و بو شیلرئن حاقّیندا سندن ائسته‌یئرم کی، یقئنلئکله دانیشاسان، اِله کی، تارییا ائنانانلار یاخشی ائشلره مشغول اولسونلار. بو ائشلر ائنسانلار اوچون یاخشی و فایدالی‌دیر. 9لاکئن عاغیلسیز موناقئشه‌لردن، نسئل‌نامه‌لردن، داعوادان و شرئعت اوستونده اولان موباحئثه‌لردن اؤزونو اوزاق ساخلا. چونکی فایداسیز و دَیَرسئزدئر. 10فئرقه یارادان آدامی بئرئنجی و ائکئنجی ائخطاردان سونرا ردّ ات. 11بئلئرسن کی، بله آدام یولونو آزیب و اؤز-اؤزونو محکوم ادئب، گوناه ادئر.

12آرتئماس یا دا تئخئکوسو سنئن یانینا گؤندَردئیئمده چالیش کی، نئکوپولئسده منئم یانیما گله‌سن، چونکی قیشی اورادا کچئرتمه‌یه قرار ورمئشم. 13دئقّت ات کی، وکئل زئناس و آپّولوس یولا چیخارکن هچ بئر شیلری اَسکئک اولماسین. 14قوی بئزئمکئلر ده اؤیر‌نسئنلر کی، ضروری احتئیاجلاری رفع اتمک اوچون یاخشی ائشلره مشغول اولسونلار کی، بله‌جه ثمره‌سئز اولماسینلار. 15منئمله اولانلارین هامیسی سنه سالام گؤندَ‌رئر. بئزی ائماندا سِوَنلره سالام یتئر.

فیض سئزئن هامینیزلا اولسون.

Currently Selected:

تئطوسا 3: موقدس کتاب

Highlight

Copy