تئطوسا 1

1اؤزونو تارییا قول اتمئش و عئسا مسئحئن حوارئسی پولوسدان، تارینین سِچئلمئشلرئنئن ائمانی و حقئقتئن معرئفتی اوچون کی، دئندارلیغا موطابئقدئر، 2ابدی حیاتین اومئدئنده کی، یالان دانیشا بئلمه‌ین تاری اونو چوخ عصرلردن قاباق وعده وردی. 3لاکئن موعیّن زاماندا اؤز کلامینی وعظده ظاهئر اتدی کی، قورتاریجییمیز تارینین امری ائله منه امانت ورئلدی.

4موشترک ائماندا منئم حقئقی اوغلوم تئطوسا: آتا تاریدان و قورتاریجیمیز مسئح عئسادان سنه فیض و باریش اولسون.

آغساقّاللار حاقّیندا

5سنی اونون اوچون کرئتده قویوب گتدئم کی، قالان ائشلری تاماملاییب هر شهرده سنه تاپشیردیغیم کئمی آغساقّاللار تعیئن اده‌سن. 6او گرک قینانیلماز بئر کئشی اولسون، بئر آروادین اَری، سفاهتلئک و یا عوصیانچیلیق تؤهمتی آتیلان اؤولادلارین آتاسی یوخ، ائمانلی اؤولادلارین آتاسی اولسون. 7چونکی ناظئر گرک تارینین موباشئری اولاراق، قینانیلماز اولسون. عئنادکار، تز حئرصله‌نَن، شراب اسئری، زور دئین، و یا حاقسیز قازانجین دالینجا قاچان اولماسین. 8لاکئن قوناق‌سِوَن، یاخشیلیغی سِوَن، تمکئنلی، عادئل، اؤزونو وقف اتمئش و نفسئنه حاکئم اولان بئری اولسون. 9تعلئمله موطابئق اولان امئن کلامی جئدّئیّتله توتسون کی، هم اساس تعلئملرده تشوئق اِده بئلسئن، هم ده ضئدّ دورانلاری توبئخ اده بئلسئن. 10چونکی عاصی، بوش‌بوغاز و حئیله‌گر آداملار چوخدورلار، خوصوصَن ختنه اولونانلار آراسیندا 11کی، اونلارین آغزی گرک باغلانسین. اونا گؤره کی، عایئله‌لری تامامن کؤکوندن ییخیب، حاقسیز قازانج اوچون اِله تعلئملر ورئرلر کی، گرک ورمه‌سئنلر. 12اونلارین اؤز پیغمبرلرئندن بئری بله دیئب: «کرئتلی‌لر همئشه یالانچی، شرور جاناوارلار و تنبل قارینپالاردیرلار.» 13بو شهادت دوغرودور. بو سببدن اونلاری جئدّی توبئخ ات کی، ائماندا صحئح اولسونلار 14و یهودی افسانه‌لره و حقئقتدن اوز دؤندَ‌رَن آداملارین احکامینا قولاق آسماسینلار. 15پاک اولانلار اوچون هر شی پاکدیر. لاکئن ناپاک اولموشلار و ائمانسیزلار اوچون هچ بئر شی پاک دیئل. امّا اونلارین هم فئکئری هم ده وئجدانلاری نجئس اولوب. 16اونلار ائدّئعا ادئرلر کی، تارینی تانی‌ییرلار، لاکئن عمل‌لری ائله اونو ائنکار ادئرلر. اونلار مکروه و ناموطئعدئرلر، هچ بئر یاخشی ائشه ده یارامازلار.

Currently Selected:

تئطوسا 1: موقدس کتاب

Highlight

Copy