وحی 21

تزه اورشلئم

1او واخت تزه بئر گؤی و تزه بئر یر گؤردوم، چونکی اوّلکی گؤی و اوّلکی یر کچئب گتمئشدی، دهنز ده آرتیق یوخدور. 2و موقدّس شهری، تزه اورشلئمی گؤردوم کی، گؤیدن، تارینین یانیندان انئر؛ او، اؤز اَری اوچون حاضیرلانمیش بزکلی بئر گلئن کئمی ائدی. 3تختدن اوجا بئر سس اشئتدئم کی، دیئردی: «باخ، تارینین خیمه‌سی ائنسانلار آراسیندادیر و تاری اونلارین آراسیندا ساکئن اولاجاق. اونلار اونون خالقی اولارلار و تاری اؤزو اونلارین آراسیندا اولاجاق. 4اونلارین گؤزلرئندن هر یاشی سئله‌جک و اؤلوم آرتیق اولمایاجاق. آرتیق نه قوصّه اولاجاق، نه آغلاشما، یا دا درد. اوّلکی شیلر کچئب گدئب.»

5تختده اوتوران ددی: «باخ، من هر شیی تزه‌لَندئرئرم.» و ددی: «یاز، چونکی بو سؤزلر صادئق و دوغرودور.» 6سونرا او منه ددی: «تامام اولدو! ”اَلئف“ و ”ی“، ”باشلانیش“ و ”آخیر“ منم. من، سوسوز اولانا، حیات سویونون بولاغیندان موفته سو وره‌جه‌یم. 7قالئب گلن بو شیلری مئراث آلاجاق. من اونون تاریسی اولاجاغام، او دا منئم اوغلوم اولاجاقدیر. 8آمّا قورخاقلارین، ائمانسیزلارین، ائیرنجلرئن، قاتئل‌لرئن، عئفّتسئزلرئن، سحربازلارین، بوتپرستلرئن و بوتون یالانچیلارین پایی اود و گوگوردله یانان گؤلده اولاجاق کی، ائکئنجی اؤلومدور.»

9سونرا یدّی ملکلردن بئری کی، آخیرکی یدّی بلالاردان دولو یدّی پئیالا‌سی وار ائدی، گلدی و منئمله دانیشیب ددی: «بورایا گل، من سنه گلئنی، قوزونون آروادینی گؤرسده‌جه‌یم.» 10و روحدا منی بؤیوک و اوجا بئر داغین اوستونه آپاردی و منه موقدّس شهر اورشلئمی گؤرستدی کی، گؤیدن، تارینین یانیندان انئردی 11و تارینین شؤوکتی اوندا ائدی. اونون شفقی چوخ قئیمتلی بئر داشا، بولورلاشان یَشَم داشینا اوخشاییردی.

12اونون بؤیوک و اوجا بئر دوواری، اون‌ائکی دروازاسی، دروازالارین یانیندا دا اون‌ائکی ملک وار ائدی. قاپیلارین اوستونده اون‌ائکی آد یازیلمیشدی کی، ائسرایئل اوغوللارینین اون‌ائکی قبئله‌سئنئن آدلاریدیر. 13شرق سمتئنده اوچ قاپی، شئمال سمتئنده اوچ قاپی، جنوب سمتئنده اوچ قاپی، قرب سمتئنده اوچ قاپی وار ائدی. 14شهر دووارینین اون‌ائکی بونؤوره داشی و اونلارین اوستونده ده قوزونون اون‌ائکی حوارئسئنئن اون‌ائکی آدی وار ائدی. 15منئمله دانیشان مله‌یئن بئر آرشین قیزیل آغاجی وار ائدی کی، اونونلا شهری، اونون دروازالارینی و اونون دووارینی اؤلچسون.

16شهر دؤردبوجاق شکلئنده‌دئر و اوزونلوغو، اِنی قدردئر. ملک شهری آرشین آغاجی ائله اؤلچدو؛ اوزونلوغو اون‌ائکی مئن اوخ آتیمی#21‏:16 کئتابین اصل دئلی یونانی‌ده «۱۲۰۰۰ ستادیا» گلئب کی، چوخ احتئمالا گؤره ۲۲۰۰ کئلومِتر اولار.؛ اوزونلوغو، اِنی و بویو دا برابردئر. 17اونون دووارینی دا اؤلچدو؛ ائنسان اؤلچوسونه موطابئق یوز قیرخ دؤرد قول اوزونلوغو#21‏:17 کئتابین اصل دئلی یونانی‌ده «۱۴۴ کوبئت» گلمئشدئر. چوخ احتئمالا گؤره ۶۵ مِتر اولار. کی، مله‌یئن ائشلتدئیی اؤلچودور ده. 18دووار یَشَم داشیندان تئکئلمئشدی، شهر صاف شوشه کئمی خالئص قیزیلدان ائدی. 19شهر دووارینین بونؤوره‌لری هر جور قئیمتلی داشلارلا بزه‌دئلمئشدی. بئرئنجی بونؤوره داش یَشَم ائدی، ائکئنجئسی صافئر، اوچونجوسو آلا‌عقئق، دؤردونجوسو زومرود، 20بشئنجئسی آغ عقئق، آلتینجیسی قیرمیزی عقئق، یدّئنجئسی ساری یاقوت، سکّئزئنجئسی گؤی زومرود، دوقّوزونجوسو زبرجد، اونونجوسو ساری زومرود، اون بئرئنجئسی گؤی یاقوت و اون ائکئنجئسی ده مور یاقوت. 21اون‌ائکی دروازا، اون‌ائکی مئرواری ائدی؛ دروازانین هر بئری، بئر مئرواری ائدی. شهرئن کوچه‌سی شفّاف شوشه کئمی خالئص قیزیلدان ائدی. 22اورادا معبد گؤرمه‌دئم، چونکی اونون معبدی هر شیه قادئر اولان رب تاری و قوزودور. 23شهرئن نه گونه، نه ده آیا احتئیاجی وار کی، اونا ائشیق ساچسین، چونکی تارینین جلالی اونو ائشیقلاندیریب، شهرئن چیراغی دا قوزودور. 24مئلّتلر اونون ائشیغیندا گزه‌جکلر، یر اوزونون پادشاهلاری دا شؤوکتلرئنی اونا گتئره‌جکلر. 25گوندوزلر دروازالاری اصلا باغلانمایاجاق؛ چونکی اورادا گجه اصلا اولمایاجاقدیر 26و مئلّتلرئن شؤوکت و حؤرمتئنی اونون ائچئنه گتئره‌جکلر. 27اونون ائچئنه ناپاک بئر شی، ائیرنج ائش گؤرن و یالان دانیشان هچ کئم اصلا گئرمز، آنجاق اونلار کی، آدلاری قوزونون حیات طوماریندا یازیلیب.

Currently Selected:

وحی 21: موقدس کتاب

Highlight

Copy