سایلار 9
9
پاسخا بایرامینین کچئرئلمه‌سی
1ائسرایئل اؤولادلاری مئصئر تورپاغیندان چیخدیقدان سونرا، ائکئنجی ائلئن بئرئنجی آییندا، رب سئنا صحراسیندا موسا ائله دانیشیب اونا ددی: 2«ائسرایئل اؤولادلاری پاسخا بایرامینی تعیئن اولونموش واختدا توتسونلار. 3اونو آیین اون دؤردونجو گونونده، آخشامچاغی، تعیئن اولونموش واختدا توتون؛ اونو بوتون قایدالارینا و حؤکملرئنه گؤره ساخلایین.» 4بله‌جه موسا ائسرایئل اؤولادلارینا امر اتدی کی، پاسخا بایرامینی کچئرتسئنلر. 5اونلار بئرئنجی آیین اون دؤردونجو گونونده، آخشامچاغی پاسخا بایرامینی سئنا صحراسیندا توتدولار. ائسرایئل اؤولادلاری ربّئن موسایا امر اتدئیی هر شیی یرئنه یتئردئلر.
6آمّا مِیئته توخونان نجئس آداملار وار ائدئلر کی، او گون پاسخا بایرامینی کچئرده بئلمه‌دئلر. اونا گؤره ده، او گون بو آداملار موسا و هارونون یانینا گلئب 7بله ددئلر: «گرچی اؤلویه گؤره بئز نجئسئک، آمّا نه اوچون بئز آیری ائسرایئل اؤولادلاری کئمی، تعیئن اولونموش واختدا ربّه قوربان تقدئم اتمه‌دن محروم اولاق؟» 8موسا اونلارا ددی: «دایانین، گؤروم رب سئزئن باره‌ده نه امر اده‌جک.»
9رب موسا ائله دانیشیب اونا ددی: 10«ائسرایئل اؤولادلاری ائله دانیشیب اونلارا دِه: ”اگر سئزدن و یا نسئلئنئزدن بئر نفر مِیئته توخونوب نجئس اولسا و یا اوزاق یولدا اولسا، گئنه ده ربّئن پاسخا بایرامینی توتا بئلر. 11ائکئنجی آیین اون دؤردونجو گونو آخشامچاغی پاسخا بایرامینی توتسونلار. پاسخا قوربانینی مایاسیز چؤرک و آجی گؤیَرتی ائله یسئنلر. 12اوندان صاباحا قدر هچ نه قالماسین و بئر سوموک بله قیریلماسین. پاسخایا عایید اولان بوتون قانونلاری یرئنه یتئرسئنلر. 13آمّا کئم کی، پاکدیر، اوزاق یولدا دا دیئل و پاسخانی کچئرتمئر، او آدام اؤز خالقی آراسیندان قووولسون؛ چونکی تعیئن اولونان واختدا ربّئن تقدئمئنی گتئرمه‌یئب. او آدامین گوناهی بوینوندا قالار.
14اگر سئزئنله یاشایان بئر یاد اِللی ربّئن پاسخا بایرامینی کچئرتسه، پاسخانی قایدالارینا و حؤکملرئنه گؤره بله کچئرتسئن؛ هم یاد اِللی اوچون، هم ده یرلی اهالی اوچون قایدا بئر اولسون.“»
خیمه‌نئن اوستونده‌کی بولود
(چیخ ۴۰:۳۴-۴۸)
15خیمه‌نئن قورولدوغو گون بولود خیمه‌نی یعنی شهادت چادیرینی بورودو؛ آخشامدان سحره قدر خیمه‌نئن اوستونده‌کی بولود اودا اوخشاییردی. 16دائم بله اولدو؛ گوندوز بولود خیمه‌نی بورویه‌ردی، گجه ده اود گورونوشو. 17بولود چادیرین اوستوندن قالخان زامان، ائسرایئل اؤولادلاری دا کؤچَردئلر؛ بولودون دایاندیغی یرده ده ائسرایئل اؤولادلاری دوشَرگه سالاردیلار. 18اونلار ربّئن امرئنه گؤره یولا دوشَردئلر و ربّئن امرئنه گؤره ده دوشَرگه سالاردیلار. نه قدر کی، بولود خیمه‌نئن اوستونده قالاردی، اونلار دا دوشَرگه سالدیقلاری یرده قالاردیلار.
19بولود اوزون مودّت خیمه‌نئن اوستونده دایاناندا دا ائسرایئل اؤولادلاری ربّئن ددئیئنی ساخلایاردیلار و یولا دوشمَزدئلر. 20اگر بعضن بولود خیمه‌نئن اوستونده بئر نچه گون قالاردی؛ اونلار دا ربّئن امرئنه گؤره دوشَرگه سالدیقلاری یرده قالاردیلار. سونرا گئنه ربّئن امرئنه گؤره یولا دوشَردئلر. 21بعضن ده بولود آخشامدان سحره قدر دایاناردی؛ سحر بولود قالخدیقدا یولا دوشَردئلر. ائستر گجه، ائستر گوندوز، بولود قالخدیقدا یولا دوشَردئلر. 22ائستر ائکی گون اولسون، ائستر بئر آی، یا دا بئر ائل، بولود خیمه اوستونده دایانیب قالاندا، ائسرایئل اؤولادلاری دوشَرگه سالدیقلاری یرده قالیب یولا دوشمزدئلر. لاکئن قالخان زامان یولا دوشَردئلر. 23ربّئن امرئنه گؤره دوشَرگه سالاردیلار و ربّئن امرئنه گؤره ده یولا دوشَردئلر. اونلار ربّئن ددئیئنی موسایا امر اتدئیی کئمی ساخلایاردیلار.
Currently Selected:
سایلار 9: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
