سایلار 30
30
نذئرلر
1موسا ائسرایئل اؤولادلارینین قبئله باشچیلاری ائله دانیشیب اونلارا ددی: «ربّئن امر اتدئیی سؤز بلهدئر: 2اگر بئر کئشی ربّه نذر ادئر، یا دا آند ائچئب بوینونا بئر تکلئف گؤتورور، وردئیی سؤزو پوزمامالیدیر؛ آغزیندان چیخان هر شیی گرک یرئنه یتئرسئن.
3اگر آتاسینین اِوئنده یاشایان جاوان قیز ربّه نذر ادئب بوینونا بئر تکلئف گؤتورور، 4و آتاسی اونون نذئرئنی و گؤتوردویو تکلئفی اشئدئر و هچ بئر شی دِمئر، قیزین اتدئیی بوتون نذئرلر و گؤتوردویو تکلئفلرئن هامیسی قووّهده قالار. 5آمّا اگر آتاسی بونلاری اشئدن گون مانع اولسا، قیزین اتدئیی نذئرلر و گؤتوردویو تکلئفلر قووّهدن دوشر. رب اونو باغیشلایار، چونکی آتاسی اونا مانع اولوب.
6اگر قیز نذر اتدئکدن، یا دا دوشونمهدن بوینونا بئر تکلئف گؤتوردوکدن سونرا اَره گتسه، 7اگر اَری بونو اشئدن واخت، اشئتدئیی گون اونا هچ بئر شی دمهسه، اونون اتدئیی نذئرلر و گؤتوردویو تکلئفلر قووّهده قالار. 8آمّا اگر اَری بونو اشئدن گون مانع اولسا، گلئنئن اتدئیی نذر و گؤتوردویو تکلئف قووّهدن دوشر. رب اونو باغیشلایار.
9آمّا دول و یا بوشانان آروادینین نذئری و گؤتوردویو هر تکلئف قووّهده قالار.
10اگر آرواد اَرئنئن اِوئنده نذر ادئر، و یا بوینونا بئر تکلئف گؤتورور، 11و اَری بونو اشئدنده اونا بئر شی دمهیئب مانع اولمور، آروادینین بوتون نذئرلری و یا گؤتوردویو تکلئفلرئن هامیسی قووّهده قالار. 12آمّا اگر اَری بونلاری اشئدن گون اونا حقئقتن مانع اولسا، آروادینین بوتون نذئرلری و گؤتوردویو تکلئفلر قووّهدن دوشر. اَری مانع اولدوغو اوچون رب آروادی باغیشلایار. 13اَر، آروادینین اؤزونو محروم اتمک اوچون اتدئیی هر نذئری و یا آند ائچهرک بوینونا گؤتوردویو هر تکلئفی تصدئق یا دا اونا مانع اولا بئلر. 14آمّا اگر اَری بئر گون ائچئنده بو بارهده اونا هچ بئر شی دمهسه، بوتون نذئرلرئنی و یا تکلئفلرئنی تصدئقلهمئش اولور. اونلاری اشئدن گون آروادا هچ بئر شی دمهمکله تصدئقلهمئش ساییلار. 15اگر اونلاری اشئتدئکدن بئر مودّت سونرا مانع اولسا، آروادینین جزاسینی اَری چکر.»
16کئشی ائله آروادی، آتاسی ائله اونون اِوئنده یاشایان جاوان قیزی آراسیندا اولان موناسئبت بارهده، ربّئن موسایا امر اتدئیی قایدالار بونلاردیر.
Currently Selected:
سایلار 30: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
