سایلار 13
13
کَنَعان اؤلکه‌سئنئن تَفتئشی
(تثنئیه ۱:۱۹-۳۳)
1سونرا رب موسا ائله دانیشیب اونا ددی: 2«آداملار گؤندَر کی، ائسرایئل اؤولادلارینا وره‌جَیئم کَنَعان تورپاغینی تجسّوس اتسئنلر؛ آتالارینین هر قبئله‌سئندن بئر رهبر گؤندَر.»
3موسا ربّئن امرئنه گؤره پاران صحراسیندان اونلاری گؤندَ‌ردی؛ هامیسی ائسرایئل اؤولادلارینین باشچیلاری ائدئلر. 4آدلاری بونلار ائدی:
رِعوبئن قبئله‌سئندن زَکّور اوغلو شَمّوعه؛
5شَمعون قبئله‌سئندن خوری اوغلو شافاط؛
6یهودا قبئله‌سئندن یِفونّه اوغلو کالئب؛
7یئسّاکار قبئله‌سئندن یوسئف اوغلو یئگال؛
8اِفرایئم قبئله‌سئندن نون اوغلو هوشِعه؛
9بِنیامئن قبئله‌سئندن رافو اوغلو پَلطی؛
10زِبولون قبئله‌سئندن سِودی اوغلو گَدّی‌اِل؛
11یوسئف قبئله‌سئندن، یعنی مِنَسّه قبئله‌سئندن سوسی اوغلو گَدّی؛
12دان قبئله‌سئندن گِمَل‌لی اوغلو عَمّی‌اِل؛
13آشِر قبئله‌سئندن مئکایئل اوغلو سِتور؛
14نَفتالی قبئله‌سئندن ووفسی اوغلو نَخبی؛
15جاد قبئله‌سئندن ماکی اوغلو گِعواِل.
16اؤلکه‌نی تجسّوس اتمک اوچون موسانین گؤندَردئیی آداملارین آدلاری بله‌دئر: لاکئن موسا نون اوغلو هوشِعه‌یه یوشَع آدینی وردی.
17او زامان کی، موسا اونلاری کَنَعان تورپاغینی تجسّوس اتمک اوچون گؤندَ‌رئردی، اونلارا بله ددی: «بو یولدان نِگِبه گدئن، سونرا داغلیغا چیخین. 18اؤلکه‌نئن نجه اولدوغونو گؤرون. گؤرون اورادا یاشایان خالق گوجلودور یا ضعئف، آزدیر یا چوخ؟ 19یاشادیقلاری شهرلری اؤلکه نجه، یاخشیدیر یا پئس؟ شهرلری نجه، حاصارلی‌دیر یا حاصارسیز؟ 20تورپاق نجه، محصوللو یا محصولسوز؟ اورادا آغاجلار وار یا یوخ؟ چالیشین اؤلکه‌نئن میوه‌سئندن بئر آز گتئره‌سئنئز.» او زامان اوزوم یِتئشَن مؤوسوم ائدی.
21اونلار یولا دوشدولر و سئن صحراسیندان لِبو-خَماتداکی رِخوبا قدر اؤلکه‌نی تجسّوس اتدئلر. 22نِگِبه چیخدیلار و خِبرونا چاتدیلار؛ اورادا اَناقلی اَخئمَن، شِشه‌ی و تَلمه‌ی یاشاییردی. خِبرون مئصئرده‌کی صوعَن شهرئندن یدّی ائل قاباق تئکئلمئشدی. 23سونرا اِشکول دره‌سئنه چاتدیلار و اورادان بئر تَنَک بوداغی کَسدئلر. اوستونده بئر سالخیم اوزوم وار ائدی و آداملارین ائکئسی بئر نِچه نار و اَنجئرله بئرلئکده تَنَک بوداغینی آرالاریندا بئر دئرَکده آپاردیلار. 24ائسرایئل اوغوللارینین اورادان کَسدئکلری سالخیما گؤره او یره اِشکول#13:24 عئبرانی دئلئنده یعنی «سالخیم» دره‌سی دیئلدی.
25قیرخ گوندن سونرا اؤلکه‌نئن تجسّوسوندن قاییتدیلار. 26پاران صحراسینداکی قِدِشه، موسا ائله هارونون و بوتون ائسرایئل اؤولادلاری جاماعاتینین یانینا گلدئلر. اونلارا و بوتون جاماعاتا خبر گتئردئلر، سونرا اؤلکه‌نئن میوه‌سئنی اونلارا گؤرستدئلر. 27موسایا بله تشرئح ادئب ددئلر: «اؤلکه‌یه گتدئک و بئزی گؤندَ‌ردئیئن یِره چاتدیق. حقئقتن ده، اورادا سود و بال آخیر. باخ بو دا او تورپاغین میوه‌سی‌دئر! 28لاکئن اورادا یاشایان خالق گوجلودور. شهرلر ائستِحکاملی و چوخ بؤیوکدور. بوندان علاوه، اورادا عَناق نسلئنی ده گؤردوک. 29نِگِب اؤلکه‌سئنده عَمالِقلی‌لر، داغلیقدا خئتلی‌لر، یِبوسلولار و اِمورلولار، دهنز کناریندا و اوردون چایی ساحئلئنده ده کَنَعانلی‌لار یاشاییرلار.»
30کالئب موسانین قاباغیندا جاماعاتی ساکئتلَشدئرئب ددی: «گدئب اورانی اَله کچئردک. چونکی بئز یقئن اونا قالئب گله‌جَیئک.» 31آمّا اونونلا گِدن آداملار ددئلر: «او خالقا هوجوم اده بئلمه‌رئک، چونکی اونلار بئزدن گوجلودورلر.» 32بله‌جه اونلار تجسّوس اتدئکلری تورپاق حاقّیندا ائسرایئل اؤولادلارینا پئس خبر گتئرئب ددئلر: «گتدئیئمئز و تجسّوس اتدئیئمئز تورپاق اؤز اَهالئسئنئن باشینی یئیَن تورپاقدیر. اورادا گؤردویوموز هر کس اوجا بویلو کئشئلر ائدی. 33اورادا نِفئل‌لری ده گؤردوک. (عَناق خالقی دا نِفئللی‌لردندئر.) اونلارین یانیندا اؤزوموزو چَیئرتکه کئمی حئسّ اتدئک، اونلارا دا اِله گؤروندوک.»
Currently Selected:
سایلار 13: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
