متّا 2
2
موغلارین زئیارتی
1عئسا هئرود پادشاهین گونلرئنده، یهودئیه‌نئن بیت‌لِحِمئنده آنادان اولان زامان، شرقدن موغلار اورشلئمه گلئب ددئلر: 2«آنادان اولموش یهودئلرئن پادشاهی هارادادیر؟ چونکی اونون اولدوزونو شرقده گؤردوک و گلمئشئک کی، اونا پرستئش ادک.»
3هئرود پادشاه بونو اشئدن واخت پرئشان اولدو و بوتون اورشلئم اهالئسی ده اونونلا پرئشان اولدولار. 4هئرود خالقین بوتون باش کاهئنلر و دئن عالئملرئنی بئر یره ییغیب، اونلاردان مسئحئن هارادا دوغولاجاغینی سوروشدو. 5اونلار دا اونا ددئلر: «یهودئیه‌نئن بِیت‌لِحِمئنده، چونکی پیغمبرئن واسئطه‌سئله بله یازیلیب:
6و سن، ای بِیت‌لِحِم،
یهودا دئیاری،
یهودا رَیئسلرئنئن آراسیندا،
هچ ده کئچئک دیئلسن.
چونکی سندن بئر رَیئس ظوهور اده‌جک کی،
منئم خالقیم ائسرایئله چوبان اولاجاقدیر.»#2:6 مئکا ۵:۲
7او زامان هئرود موغلاری گئزلئجه چاغیریب، اونلاردان اولدوزون نه واخت چیخدیغینی بئلدی. 8و اونلاری بِیت‌لِحِمه گؤندَ‌رئب، ددی: «گدئن و اوشاغین حاقّیندا دئقّتله آختارین. اونو تاپدیغینیز زامان منه خبر ورئن کی، من ده گلئب، اونو پرستئش ادئم.»
9اونلار پادشاهین سؤزونو اشئدئب، یولا دوشدولر. شرقده گؤردوکلری اولدوز اونلارین قاباغیندا گدئردی؛ او قدر کی، گلئب اوشاغین اولدوغو یرئن اوستونده دوردو. 10اونلار دا اولدوزو گؤردوکلری زامان بؤیوک سوئنجله حددن آرتیق شادلیق اتدئلر.
11و اِوه گئرئب، اوشاغی آناسی مریمله گؤردولر و یره دوشوب، اونو پرستئش اتدئلر. و خزئنه‌لرئنی آچیب اونا قیزیل، بوخور و مور هدئیّه وردئلر. 12و رؤیادا اونلارا تاری طرفئندن ائخطار ورئلدی کی، هئرودون یانینا قاییتماسینلار. اونلار دا آیری یوللا اؤز مملکتلرئنه گتدئلر.
مئصئره قاچیش
13موغلارین گتمه‌سئندن سونرا، ربّئن بئر مله‌یی رؤیادا یوسئفه ظاهئر اولوب، ددی: «دور، اوشاق و آناسینی گؤتور و مئصئره قاچ. من سنه خبر وِره‌نه قدر، اورادا قال. چونکی هئرود اوشاغی آختاراجاق کی، اونو محو اتسئن.»
14یوسئف قالخیب اوشاق و آناسینی گجه ائله گؤتوردو و مئصئره گتدی. 15و هئرودون اؤلومونه قدر اورادا قالدی کی، ربّئن پیغمبرئنئن واسئطه‌سئله دیئلن سؤز یرئنه یتئشسئن: «اوغلومو مئصئردن چاغیردیم.»#2:15 هوشَع ۱۱:۱
16هئرود موغلارین طرفئندن آلدانمیش اولدوغونو گؤرَ‌نده، چوخ قضبلندی و آدام گؤندَ‌رئب، موغلاردان بئلدئیی واختا گؤره، بیت‌لِحِم و اونون اطرافیندا اولان بوتون ائکی یاشیندا و داها آشاغی اولان اوغلان اوشاقلارینی اؤلدورتدو. 17او واخت اِرِمیا پیغمبرئن واسئطه‌سئله دیئلن بو سؤز یرئنه یتئشدی:
18«رامادا بئر سس اشئدئلدی،
آغلاشما و بؤیوک شئون.
راحئل اوشاقلاری اوچون آغلاییر،
ائسته‌مئر ده کی، تسلّی تاپسین.
چونکی اونلار یوخ اولدولار.»#2:18 اِرِمیا ۳۱:۱۵
مئصئردن دؤنوش
19لاکئن هئرود اؤلندن سونرا، ربّئن بئر مله‌یی مئصئرده یوسئفه رؤیادا ظاهئر اولوب، 20ددی: «دور، اوشاق و آناسینی گؤتور و ائسرایئل دئیارینا گت. چونکی اوشاغین جانینی آختارانلار اؤلوبلر.»
21یوسئف ده قالخدی، اوشاق و آناسینی گؤتوروب، ائسرایئل دئیارینا گتدی. 22آمّا اشئدنده کی، آرخِلاعوس آتاسی هئرودون یرئنده یهودئیه‌یه پادشاه اولوب، اورایا گتمَیه قورخدو و تاری طرفئندن رؤیادا ائخطار ورئلئب، جلئل سمتلرئنه گتدی. 23و گلئب ناصئره آدلی بئر شهرده ساکئن اولدو کی، پیغمبرلرئن واسئطه‌سئله دیئلمئش سؤز یرئنه یتئشسئن: «او ناصئره‌لی آدلاناجاق.»
Currently Selected:
متّا 2: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.