لاوئلی‌لر 4
4
گوناه قوربانی
1رب موسایا ددی: 2«ائسرایئل اؤولادلارینا بله دِه: ”اگر بئری ربّئن بویوردوقلارینین بئرئنده، بئلمه‌دن ربّئن قدغن اتدئیی بئر شی اتسه،
3اگر مسح ادئلمئش کاهئن گوناه ائشله‌دئب تقصئری خالقا گتئرسه، او گوناها گؤره ربّه گوناه قوربانی اولاراق عیبسئز بئر گامیش تقدئم اتسئن. 4گامیشی حوضور چادیرینین گئرئشئنه، ربّئن حوضورونا گتئرسئن و الئنی حیوانین باشینا قویوب، اونو ربّئن حوضوروندا کَسسئن. 5سونرا مسح ادئلمئش کاهئن گامیشین قانیندان گؤتوروب، حوضور چادیرینا گتئرسئن. 6کاهئن بارماغینی قانا باتیریب، ربّئن حوضوروندا، موقدّس یرئن پرده‌سی قاباغیندا، یدّی دفه سَپسئن. 7سونرا کاهئن حوضور چادیریندا، ربّئن قاباغیندا اولان عطئرلی بوخور قوربانگاهینین بوینوزلارینا او قاندان بئر آز چکسئن، گامیشین قانینین قالان حئصّه‌سئنی او قوربانگاهین آلتلیغینا تؤکسون کی، حوضور چادیرینین گئرئشئنده یاندیرما قوربانلاری اوچون قورولوب. 8کاهئن گوناه قوربانی اولان گامیشین پئیئنی کامئل گؤتورسون. ائچ‌آلاتی اؤرتَن پئیی و اوستونده‌کی بوتون پئیی، 9بلئنده‌کی هر ائکی بؤیره‌یی اوستونده‌کی پئیی ائله، و قارا جئیه‌رئن قویروغا بَنزه‌ر حئصّه‌سئنی. بونلاری بؤیره‌کلری ائله بئرلئکده چیخارتسین. 10بونلارین هامیسی باریش قوربانی اولان اؤکوزدن گؤتورولدویو کئمی گؤتورولسون و کاهئن اونلاری یاندیرما قوربانلاری اوچون قورولان قوربانگاهدا توستوله‌دئب یاندیرسین. 11لاکئن گامیشین دَرئسئنی، بوتون اَت و باشینی، آیاقلار و ائچ‌آلاتینی، و باغیرساغینی، 12یعنی، هر قالان حئصّه‌سئنی دوشَرگه‌دن قیراغا چیخاردیب، کول تؤکولَن پاک بئر یره گتئرسئن و اورادا اودون اوستونده اونو یاندیرسین. کول توکولَن یرده گرک یاندیریلسین.
13اگر بوتون ائسرایئل جاماعاتی سَهو اتسه‌لر و بو اونلارین نظرئندن قاچسا، و ربّئن قدغن اتدئکلرئنئن بئرئنی یرئنه یتئرئب، تقصئرکار اولسالار، 14اتدئکلری گوناه آشکارا چیخاندا، جاماعات مال-حیواندان گوناه قوربانی اولاراق بئر گامیش گؤتوروب، حوضور چادیرینین قاباغینا گتئرسئنلر. 15جاماعاتین آغساقّاللاری ربّئن حوضوروندا اللرئنی گامیشین باشینا قویوب، ربّئن حوضوروندا اونو کَسسئنلر. 16سونرا مسح ادئلمئش کاهئن گامیشین قانیندان گؤتوروب، حوضور چادیرینا گتئرسئن. 17کاهئن بارماغینی قانا باتیریب، ربّئن حوضوروندا پرده‌نئن قاباغینا یدّی دفه سَپسئن. 18کاهئن او قاندان بئر آزینی حوضور چادیریندا ربّئن قاباغینداکی قوربانگاهین بوینوزلارینا چکسئن و گامیشین قانینین قالان حئصّه‌سئنی او قوربانگاهین آلتلیغینا تؤکسون کی، حوضور چادیرینین گئرئشئنده یاندیرما قوربانلاری اوچون قورولوب. 19او گرک حیوانین بوتون پئیئنی گؤتورسون و قوربانگاهدا توستوله‌دئب یاندیرسین؛ 20گوناه قوربانی اولان گامیشا نه جور اتسه، بو گامیشا دا هَمَن جور اتسئن. بونونلا کاهئن خالق اوچون کفّاره اتسئن و خالق باغیشلانار. 21سونرا کاهئن گامیشی دوشَرگه‌دن قیراغا چیخاردیب، اَوّلکی گامیشی یاندیران کئمی، اونو دا یاندیرسین. بو، جاماعات اوچون ورئلَن گوناه قوربانی‌دیر.
22باشچیلاردان بئری بئلمه‌دن گوناه ائشله‌دنده و سَهوَن تاریسی ربّئن قدغن اتدئیی بئر ائش گؤروب تقصئرکار چیخاندا، 23ائشلَتدئیی گوناه اؤزونه آشکار اولان واخت، تقدئمی اوچون بئر اِرکَک و عیبسئز کِچی قوربان گتئرسئن. 24اَلئنی اِرکَک کِچئنئن باشینا قویوب، اونو ربّئن حوضوروندا، یاندیرما قوربانلار کَسئلَن یرده کَسسئن. بو، گوناه قوربانی‌دیر. 25سونرا کاهئن بارماغی ائله گوناه قوربانینین قانیندان بئر آز گؤتوروب، یاندیرما قوربانلاری اوچون قورولان قوربانگاهین بوینوزلارینا چکسئن. قانین قالان حئصّه‌سئنی ده او قوربانگاهین آلتلیغینا تؤکسون کی، یاندیرما قوربانلاری اوچون قورولوب. 26سونرا او حیوانین بوتون پئیئنی باریش قوربانینین پئیی کئمی قوربانگاهدا توستوله‌دئب یاندیرسین. بونونلا کاهئن او آدام اوچون گوناهینی کفّاره اتسئن، و او باغیشلانار.
27اگر خالقدان بئر نفر سَهوَن ربّئن قدغن اتدئکلرئنئن بئرئنه عَمل ادئب، اؤزونو تقصئرکار چیخارتسا، 28ائشلَتدئیی گوناه اؤزونه آشکار اولاندا، او گوناهینا گؤره عیبسئز بئر دئشی کِچی اؤزو اوچون قوربان گتئرسئن، 29و اَلئنی گوناه قوربانینین باشینا قویوب، بو گوناه قوربانینی یاندیرما قوربانلاری کَسئلَن یرده کَسسئن. 30سونرا کاهئن بارماغی ائله قوربانین قانیندان بئر آز گؤتوروب، یاندیرما قوربانلاری اوچون قورولان قوربانگاهین بوینوزلارینا چکسئن؛ قانین قالان حئصّه‌سئنی ده قوربانگاهین آلتلیغینا تؤکسون. 31سونرا حیوانین بوتون پئیئنی باریش قوربانینین پئیئنی چیخارتدیغی کئمی چیخاردیب، اونو ربّئن خوشونا گلن عطئرلی قوربان کئمی قوربانگاهدا توستوله‌دئب یاندیرین. بونونلا کاهئن او آدام اوچون کفّاره اتسئن و او، باغیشلانار.
32اگر آدام گوناه قوربانی اولاراق قوزو گتئرسه، قوی او قوزو عیبسئز دئشی حیوان اولسون. 33و اَلئنی گوناه قوربانینین باشینا قویسون و اونو یاندیرما قوربانلاری کَسئلَن یرده کَسسئن. 34سونرا کاهئن بارماغی ائله گوناه قوربانینین قانیندان بئر آز گؤتوروب، یاندیرما قوربانلاری اوچون قورولان قوربانگاهین بوینوزلارینا چکسئن؛ قانین قالان حئصّه‌سئنی ده قوربانگاهین آلتلیغینا تؤکسون. 35سونرا او آدام قوزونون بوتون پئیئنی باریش قوربانی اولان قویونون پئیئنی کئمی چیخارتسین و کاهئن اونو ربّه تقدئم ادئب قوربانگاهدا توستوله‌دئب یاندیرسین. بونونلا کاهئن او آدام اوچون، ائشلَتدئیی گوناهی کفّاره اتسئن، و او باغیشلانار.
Currently Selected:
لاوئلی‌لر 4: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
