قالاتئیالی‌لارا 2
2
اورشلئم شوراسی
1اون دؤرد ائل سونرا، بارنابا ائله بئرلئکده گئنه اورشلئمه گتدئم، تئطوسو دا اؤزومله آپاردیم. 2بئر وحیه گؤره ائدی کی، گتدئم. و اونلارا قیرییهودئلر آراسیندا وعظ اتدئیئم ائنجئلی تقدئم اتدئم. لاکئن بونو اعتئبارلی اولانلارا خوصوصی بئر شکئلده اتدئم کی، مبادا عبث قاچیب و یا قاچمیش اولوم. 3حتّا یانیمدا اولان تئطوس دا، یونانلی اولان حالدا، ختنه اولونماغا مجبور ادئلمه‌دی. 4آمّا بو، گئزلئجه آرامیزا سوخولان یالانچی قارداشلار اوزوندن اولدو کی، مسئح عئسادا اولان آزادلیغیمیزی گودوردولر، اله کی، بئزی قوللوغا چکسئنلر. 5اونلارا بئر ساعات دا اولسا، باش اَیئب تسلئم اولمادیق کی، ائنجئلئن حقئقتی سئزئنله ثابئت قالسین. 6آمّا اعتئبارلی توتولانلار (منه فرق اِتمز کی، اونلار نه ائمئشلر. تاری طرفدارلیق اتمز.) منه بئر شی آرتیرمادیلار. 7عکسئنه، او زامان کی، ختنه‌سئزلر#2:7 مقصد قِیری‌یهودئلردئر. اوچون ائنجئلئن منه تاپشیریلماسینی گؤردولر، نجه کی، ختنه‌لی‌لر#2:7 مقصد یهودی‌لردئرلر اوچون پطروسا تاپشیریلمیشدی. 8(چونکی ختنه‌لی‌لره حواری اولماسی اوچون پطروسدا ائشله‌ین، قیرییهودئلر اوچون منده ده ائشله‌دی.) 9و منه عطا اِدئلن فیضی تشخئص وِرَنده، سوتونلار ساییلان یعقوب، کئفا، و یوحنّا صاغ اللرئنی رفاقت اوچون منه و بارنابایا وردئلر کی، بئز قیری‌یهودئلرئن آراسینا گدک، اونلار دا ختنه‌لی‌لرئن. 10آنجاق بئزدن ائسته‌دئلر کی، یوخسوللاری یاددان چیخارتمایاق؛ اِله همن شیی کی، من ده اونو اتمه‌یه جان آتیردیم.
پولوس پطروسو مذمّت ادئر.
11لاکئن پطروس انطاکئیه‌یه گلنده، اونون اوزونه ضئدّ دوردوم، چونکی تقصئرلی ائدی. 12اونا گؤره کی، یعقوبون طرفئندن بعضی آداملار گلمه‌دن قاباق، قیری‌‌یهودئلر‌له یمک ییئردی. آمّا اونلار گلندن سونرا، ختنه حزبئنئن قورخوسوندان اونلاردان چکئنئب، اؤزونو آیری ساخلاییردی. 13اؤزگه یهودئلر ده رئیاکارلیقدا اونا قوشولدولار، بله کی، حتّا بارنابا دا اونلارین رئیاکارلیغینا توتولدو. 14لاکئن او زامان کی، اونلارین ائنجئلئن حقئقتئنه دوزگون رفتار اتمه‌دئکلرئنی گؤردوم، هامینین حوضوروندا کئفایا ددئم: «اگر سن، یهودی اولان حالدا، یهودئلر کئمی یوخ، قیرییهودئلر کئمی یاشاییرسان، نجه قیری‌‌یهودئلری مجبور ادئرسن کی، یهودئلر کئمی یاشاسینلار؟!» 15بئز آنادان گلمه یهودئیئک و قیرییهودئلر آراسیندان اولان گوناهکارلار دیئلئک؛ 16لاکئن بئلئرئک کی، ائنسان شرئعتئن عمل‌لری ائله یوخ، مسئح عئسایا اولان ائمان واسئطه‌سی‌ائله صالح ساییلیر. حتّا بئز ده مسئح عئسایا ائناندیق کی، شرئعتئن عمل‌لری ائله یوخ، مسئحه اولان ائمان واسئطه‌سی‌ائله صالح ساییلاق. چونکی شرئعتئن عمل‌لری ائله هچ بئر ائنسان صالح ساییلماز. 17اگر بئز، مسئحده صالح ساییلماغیمیزی آختاران ائکن، گوناهکار دا چیخساق، اوندا آیا مسئح گوناهین خئدمتچئسی‌دئر؟ حاشا. 18چونکی اگر من اوّلجه ییخدیغیمی گئنه تئکئرم، اؤزومون تقصئرلی اولدوغومو ائثبات ادئرم. 19چونکی من شرئعتئن واسئطه‌سی‌ائله شرئعته اؤلدوم کی، تاری اوچون یاشاییم. 20من مسئحله چارمیخا چکئلمئشم و یاشایان آرتیق من دیئلم، مسئحدئر کی، منده یاشاییر. و بدنده یاشادیغیم بو حیاتی، تارینین اوغلونا اولان ائمان واسئطه‌سی‌ائله یاشاییرام کی، منی سِودی و منئم اوچون اؤزونو تسلئم اتدی. 21تارینین فیضئنی باطئل اتمئرم. چونکی اگر صالحلئک شرئعتئن واسئطه‌سی‌ائله مومکون اولسایدی، دمه‌لی مسئح عبث یره اؤلدو.
Currently Selected:
قالاتئیالی‌لارا 2: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
