حِزِقیال 39
39
گوگون قوشونو مغلوب اولور
1سن، ای بشر اوغلو، گوگون ضئدّئنه نبئلئک ادئب دِه کی، پروردئگار رب بله دیئر: ”ای مِشِکئن و توبالین باش رهبری گوگ، #39:1 و یا «ماگوگ اؤلکه‌سئندن اولان روشون، مِشِکئن، و توبالین رهبری گوگ.» من سنئن ضئدّئنه‌یَم. 2سنی گری قایتاریب آپاراجاغام، اوزاق شئمالدان چیخارداجاغام و ائسرایئل داغلاری اوستونه گتئره‌جیم. 3سول اَلئندن کامانینی، صاغ اَلئندن اوخلارینی ووروب سالاجاغام. 4سن بوتون قوشونلارینلا، یانیندا اولان خالقلارلا بئرلئکده ائسرایئل داغلاری اوستونده هلاک اولاجاقسان. سنی یمک اولماق اوچون هر جور ییرتیجی قوشا و وحشی حیوانلارا وره‌جیم. 5آچیق چؤلده هلاک اولاجاقسان، چونکی من بونو دِمئشم.“ پروردئگار رب بله بویورور، 6”من ماگوگون و ساحئل اؤلکه‌لرئنده اَمئن-آمانلیق ائچئنده یاشایانلارین اوستونه اود گؤندَ‌ره‌جیم. او واخت بئله‌جکلر کی، رب منم. 7خالقیم ائسرایئلئن آراسیندا موقدّس آدیمی تانیداجاغام، آرتیق موقدّس آدیمین لَکه‌لَنمه‌سئنه ائجازه ورمه‌یه‌جیم. او واخت مئلّتلر بئله‌جکلر کی، من ربّم، ائسرایئلده موقدّس اولانام. 8باخ، او واخت گلئر و قطعن باش وره‌جک.“ پروردئگار رب بله بویورور: ”بو گون منئم دِدئیئم گوندور. 9او واخت ائسرایئل شهرلرئنده یاشایانلار چیخیب اود قالایاجاقلار. سئلاحلاری، قالخانلاری، سئپرلری، کامانلاری، اوخلاری، توپّوزلاری و نئزه‌لری بو اوددا یاندیراجاقلار. اونلاری یدّی ائل عرضئنده یاندیراجاقلار. 10چؤلدن اودون داشیمایاجاقلار، مِشه‌لردن آغاج کَسمیه‌جکلر، چونکی سئلاحلارلا اود قالایاجاقلار. اونلاری قارت ادنلری قارت اده‌جکلر، ماللارینی تالان ادنلری تالان اده‌جکلر.“ پروردئگار رب بله بویورور.
11”او گون دهنزئنئن شرقئنده، سیّاحلار دره‌سئنده گوگا ائسرایئلده بئر قبئرئستانلیق وره‌جیم. اورادا گوگ و بوتون قوشونو باسدیریلاجاق. بو یِره هامون-گوگ #۳۹:۱۱ «هامون-گوگ» - عئبرانی دئلئنده «گوگ جاماعاتی». دره‌سی دیئله‌جک. بو یِر، یولدان کِچَنلرئن قاباغینی کَسه‌جک. 12اؤلکه‌نی تمئزله‌مک اوچون ائسرایئل نسلی یدّی آی اونلاری باسدیرماقلا مشغول اولاجاق. 13اونلاری بوتون اؤلکه خالقی باسدیراجاق. منئم عئزّتلَندئیئم گون اونلار اوچون ائفتئخار اولاجاق.“ پروردئگار رب بویورور. 14”اؤلکه‌نی تمئزله‌مک اوچون آداملار تعیئن اولوناجاق؛ بعضئلری اؤلکه‌نی دایانمادان دولاشاجاقلار، بعضئلری ده یرده قالان جسدلری باسدیراجاقلار. یدّی آیدان سونرا آختاریشلارا باشلایاجاقلار. 15بو آداملار اؤلکه‌نئن هر یِرئنی دولاشاجاقلار. ائنسان سومویو گؤرنده یانینا بئر نئشان قویاجاقلار، او زاماناجاق کی، قبئرقازانلار اونو هامون-گوگ دره‌سئنده باسدیرسینلار. 16شهرئن آدی هامونا#39:16 «قالابالیق» معناسینا گلئر اولاجاق. بله‌جه اؤلکه‌نی تمئزلَیه‌جکلر.“
17سن، ای بشر اوغلو، پروردئگار رب بله دیئر: ”هر جور قوشا و هر جور وحشی جانلی مخلوقا دِه: ییغیلین، گلئن. سئزئن اوچون کَسه‌جیئم قوربانین یانینا ییغیلین، ائسرایئل داغلاری اوستونده‌کی بؤیوک قوربانین یانینا هر طرفدن ییغیلین کی، اورادا اَت یِیئب قان ائچه‌‌سئنئز. 18سئز ائگئدلرئن اَتئنی یِیئب یِر اوزونون رهبرلرئنئن قانینی ائچه‌جکسئنئز؛ اِله بئل کی، باشانین بَسلَنمئش حیوانلارینین، قوچلارینین، قوزولارینین، کِچئلرئنئن و گامیشلارینین اَتئنی یِیئب قانینی ائچئرسئنئز. 19سئزئن اوچون کَسدئیئم قورباندان دویونجا یاغ یئیه‌جکسئنئز، مست اولونجا قان ائچه‌جکسئنئز. 20سوفرَمده آتلاردان، آتلی‌لاردان، ائگئدلردن و هر جور عسگردن بول-بول یِیئب دویاجاقسینیز.“ پروردئگار رب بویورور.
21”شؤوکتئمی مئلّتلر آراسیندا گؤرسده‌جیم. بوتون مئلّتلر اونلارا وردئیئم جزانی و اوستلرئنه قویدوغوم اَلئمی گؤره‌جکلر. 22بو گوندن سونرا ائسرایئل نسلی بئله‌جک کی، اونلارین تاریسی رب منم. 23مئلّتلر بئله‌جکلر کی، ائسرایئل نسلی اؤز تقصئرلرئندن اؤتری اسئرلئیه گتدی. چونکی اونلار منه خیانت اتدئلر و من اونلاردان اوز دؤندَ‌ردئم. بله‌جه اونلاری دوشمنلرئنه تسلئم اتدئم و هامیسی قیلینجلا هلاک اولدولار. 24نجئسلئکلرئنه و عوصیانلارینا گؤره اونلارلا رفتار اتدئم و اونلاردان اوز دؤندَ‌ردئم.“
25بونا گؤره پروردئگار رب بله دیئر: ”یعقوب نسلئندن اسئر اولونانلاری ائندی گری قایتاراجاغام، بوتون ائسرایئل نسلئنه مرحمت ادئب موقدّس آدیمین خاطئرئنه قیرت گؤرسده‌جیم. 26تورپاقلاریندا اَمئن-آمانلیق ائچئنده یاشایاندا، اونلاری قورخودان بئر کس اولمایاندا روسواچیلیقلارینی و منه اتدئکلری بوتون خیانتلری یاددان چیخارداجاقلار. 27اونلاری مئلّتلر آراسیندان گری قایتاریب دوشمن اؤلکه‌لردن ییغدیغیم زامان، اونلارین واسئطه‌‌سی ائله بئر چوخ مئلّته موقدّسلئیئمی گؤرسده‌جیم. 28او واخت بئله‌جکلر کی، اونلارین تاریسی رب منم. چونکی اونلاری مئلّتلر آراسینا اسئرلئیه گؤندَ‌ردئم. و سونرا تزه‌دن اونلاری اؤز تورپاقلارینا قایتاردیم. آرتیق هچ بئرئنی قالدیغی اؤلکه‌سئنده قویوب گتمیه‌جیم. 29بئر داها اونلاردان اوز دؤندَ‌رمیه‌جیم، چونکی ائسرایئل نسلی اوستونه اؤز روحومو تؤکه‌جیم.“ پروردئگار رب بله بویورور.»
Currently Selected:
حِزِقیال 39: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
