حِزِقیال 26
26
صور شهرئنئن ضئدّئنه نبئلئک
1اسئرلئیئمئزئن اون بئرئنجی ائلئنده، آیین بئرئنجی گونو منه ربّئن بو سؤزو نازئل اولدو: 2«ای بشر اوغلو، اورشلئمئن ضئدّئنه صور بله دیئب: ”نه یاخشی کی، خالقلارین قاپیسی اولان شهر داغیلدی، دروازالاری منئم اوچون آچیلدی. ائندی کی، او داغیلیب، من وارلاناجاغام.“ 3بو سؤزلره گؤره پروردئگار رب بله دیئر: ”باخ، ای صور، من سنئن ضئدّئنه گلئرم. دهنز نجه شپه‌لرئنی جوشدورور، من ده اِله‌جه چوخ مئلّتی سنئن اوستونه جوشدوراجاغام. 4اونلار صورون دووارلارینی داغیداجاقلار و بورجلرئنی اوچورداجاقلار؛ تؤکونتولرئنی سئلئب سوپوره‌جیم، اونو چیلپاق بئر قایایا چِوئره‌جیم. 5صور دهنزئن اورتاسیندا تورلارین سَرئلدئیی بئر یِر اولاجاق، چونکی من بونو دِمئشم، پروردئگار رب بویورور. صور مئلّتلر اوچون قارت مالی اولاجاق. 6اونون ساحئلئنده اولان قیز شهرلری، قیلینجلا اؤلدوروله‌جکلر. او واخت بئله‌جکلر کی، رب منم.“
7پروردئگار رب بله دیئر: ”من پادشاهلار پادشاهی اولان بابئل پادشاهی نِبوکَدنِصّری آتلار، دؤیوش عارابالاری، آتلی‌لار و چوخلو خالقدان عئبارت اولان قوشونلا بئرلئکده شئمالدان صورون اوستونه گتئره‌جیم. 8او سنئن ساحئلئنده اولان قیز شهرلرئنده یاشایان قیزلارینی قیلینجلا اؤلدوره‌جک، سنئن ضئدّئنه موحاصئره دووارلاری، تورپاق قالاغی قوراجاق و سئپرئنی سنئن ضئدّئنه قالدیراجاق. 9مانجاناقلار قوراجاق کی، سنئن دووارلارینی ووروب دَلسئن. بالتاری ائله بورجلرئنی اوچوراجاق. 10آتلارینین چوخ اولدوغوندان اونلارین توزو سنی اؤرته‌جک؛ او زامان کی، او، سنئن دروازالاریندان حاصاری ییخیلمیش بئر شهر کئمی گئرئر، دووارلارین آتلی‌لارین، یوک عارابالارینین و دؤیوش عارابالارینین گورولتوسوندن تئتره‌یه‌جک. 11او اؤز آتلارینین دیرناقلاری ائله سنئن بوتون کوچه‌لرئنی تاپدالایاجاق، خالقینی قیلینجلا اؤلدوره‌جک؛ مؤحکم سوتونلارین یِرله بئر اولاجاق. 12اونلار ثروتئنی تالان اده‌جکلر، تئجارت ماللارینی قارت اده‌جکلر. سنئن دووارلارینی داغیداجاقلار، گؤزل اِولرئنی اوچورداجاقلار، داشلارینی، تاختالارینی و تؤکونتولرئنی سویا آتاجاقلار. 13بله‌جه اوخودوغون نغمه‌لرئن سَسئنه آخیر قویاجاغام. طنبورلارینین صداسی آرتیق اِشئدئلمیه‌جک. 14سنی چیلپاق بئر قایایا چِوئره‌جیم؛ تورلارین سَرئلدئیی بئر یِر اولاجاقسان. بئر داها تئکئلمیه‌جکسن.“ چونکی من رب بونو دِمئشم. پروردئگار رب بله بویورور.
15پروردئگار رب صورا بله دیئر: ”سنده قیرغین اولاندا، یارالی‌لار ناله چکنده داغیلماغینین گورولتوسوندن مگر ساحئل خالقلاری تئتره‌میه‌جک؟ 16بوتون دهنز اؤلکه‌لرئنئن رهبرلری تختلرئندن اِنه‌جکلر، لئباسلارینی چیخارداجاقلار، الوان ناخیشلی پالتارلارینی سویوناجاقلار. اونلار دهشته بورونه‌جکلر؛ یِره اوتوراجاقلار، هر آن تئتره‌یئب سنئن باره‌ده حیرتدن مات قالاجاقلار. 17اونلار سنئن اوچون مرثئیه اوخویوب دئیه‌جکلر:
ای دهنزچئلرئن یاشادیغی مشهور شهر،
سن نجه محو اولدون؟
دهنزده گوجلو ائدئن.
سن و سنئن اهالئن
ساحئلده یاشایانلارین هامیسینی
دهشته سالمیشدینیز.
18ائندی داغیلدیغین گون ساحئل اؤلکه‌لری تئتره‌یئرلر،
بلی، ساحئل خالقلاری سنئن ییخیلماغیندان حیرته دوشور.“
19پروردئگار رب بله دیئر: ”سنی ساکئنسئز قالمیش شهرلر کئمی خارابا بئر شهره چِوئردئیئم زامان، لاپ درئن دهنزلرله سنی قرق اتدئیئم واخت، درئن سولار سنی اؤرتَن زامان، 20سنی قَبئره اِنَنلرله بئرلئکده اِندئره‌جیم، قدئم زامانلارین خالقینین یانینا! سنی یِرئن لاپ اسفلئنده ساکئن اده‌جیم، قدئم خارابالیقلار کئمی، او آداملارلا کی، قویویا اِنئرلر. اِله کی، بئر داها سنده هچ کس ساکئن اولمایاجاق؛ لاکئن شؤوکتی دئرئلر یاشایان اؤلکه‌یه قویاجاغام. 21سنئن باشینا دهشتلر تؤکه‌جیم و آرتیق اولمایاجاقسان. سنی آختاراجاقلار، لاکئن سنی بئر داها تاپمایاجاقلار.“ پروردئگار رب بله بویورور.»
Currently Selected:
حِزِقیال 26: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
