حِزِقیال 23
23
ائکی عئفّتسئز آروادلا موقایئسه
1منه ربّئن بو سؤزو نازئل اولدو: 2«ای بشر اوغلو، ائکی آرواد وار ائدی کی، هَمَن آنانین قیزی ائدی. 3اونلار مئصئرده فاحئشه‌لئک اتدئلر. جاوانلیقلاریندا اولارکن فاحئشه‌لئک اتدئلر. اونلارین دؤشلرئنه اَل دَیدی، قیزلیق سئنه‌لرئنه اَل سورتولدو. 4بو آروادلاردان بؤیوکونون آدی اوهولا، باجیسینینکی دا اوهولئبا ائدی. اونلار منئم اولدولار، اوغوللار و قیزلار دوغدولار. آدلارینا گلئنجه، اوهولا سامئره‌‌دئر، اوهولئبا دا اورشلئمدئر.
5اوهولا منئم اولارکن فاحئشه‌لئک اتدی؛ اویناشلاری اولان قونشو آشورلولارا آلوده اولدو. 6اونلارین هامیسی لاجورد پالتار گِیئنمئش والئلر و باشچیلار، جاذئبه‌لی جاوانلار، آتلارا مئنمئش آداملار ائدئلر. 7اونلارلا فاحئشه‌لئک اتدی. اونلارین هامیسی آشورون لاپ سِچمه آداملاری ائدئلر. اوهولا کئمه آلوده اولدو، اونون بوتون بوتلری ائله اؤزونو نجئس اتدی. 8مئصئرده باشلادیغی فاحئشه‌لئیئندن اَل چکمه‌دی؛ چونکی جاوانلیغیندا کئشئلر اونونلا یاتمیشدیلار، قیزلیق سئنه‌سئنه اَل سورتموشدولر، شهوتلرئنی اونون اوستونه تؤکموشدولر. 9بونا گؤره ده اونو، آلوده اولدوغو اویناشلارینا، آشور اؤولادلارینا تسلئم اتدئم. 10اونلار اوهولا‌نین عاییبینی آچدیلار؛ اوغوللارینی و قیزلارینی اَلئندن آلدیلار، لاکئن اؤزونو قیلینجلا اؤلدوردولر. بله‌جه او، آروادلار آراسیندا روسوای اولدو، اونون حؤکمونو یرئنه یتئردئلر.
11اونون باجیسی اوهولئبا بونو گؤردو، آمّا اوهولئبا‌نین شهوتی داها آلوولانان، فاحئشه‌لئیی باجیسیندان داها بَتَر ائدی. 12او دا قونشولاری آشورلولارا، والئلره و باشچیلارا، دبدبه ائله گِیئنمئش، آتلارا مئنمئش آداملارا آلوده اولدو. اونلارین هامیسی جاذئبه‌لی جاوانلار ائدئلر. 13من گؤردوم کی، او دا نجئسله‌نئب؛ ائکئسی ده هَمَن یولو گتدئلر. 14اوهولئبا گت-گده فاحئشه‌لئیئنی آرتیردی، دووارا اویولموش ائنسان تصوئرلرئنی، 15بِل‌لرئنه قورشاق، باشلارینا بؤیوک عمّامه باغلامیش کَلدانئلرئن قیرمیزی رنگلی شکئل‌لرئنی گؤردو. اونلارین هامیسی اصئل‌لرئنه گؤره کَلده اؤلکه‌سئندن اولان بابئل سرکرده‌لرئنه بَنزه‌یئردئلر. 16اوهولئبا بونو گؤردوکده اونلارا آلوده اولدو و اونلارین یانینا، کَلده اؤلکه‌سئنه قاصئدلر گؤندَ‌ردی. 17بابئللی‌لر اوهولئبا‌نین یانینا، عئشرت یاتاغینا گلئب شهوتلری ائله اونو نجئسله‌دئلر. او اونلارلا نجئس اولاندان سونرا اونلاردان ائیره‌ندی. 18فاحئشه‌لئیئنی آشکارا چیخارتدی، عئصمتئنی گؤز قاباغینا قویدو؛ او واخت اوندان ائیره‌ندئم، نجه کی، باجیسیندان ائیره‌نمئشدئم. 19آمّا او مئصئر تورپاغیندا فاحئشه‌لئک اتدئیی جاوانلیق چاغینی یادا سالیب فاحئشه‌لئیئنی داها دا آرتیردی. 20اویناشلارینا آلوده اولدو کی، جئنسئیّت عوضولری اِششَکلرئنکی کئمی، توخوملاری آتلارینکی کئمی ائدی. 21بله‌جه سن جاوانلیق چاغیندا اتدئیئن عئفّتسئزلئیه قاییتدین. او زامان مئصئرلی‌لر سنئن سئنه‌نه اَل سورته‌رک جاوان دؤشلرئنی سیخمیشدیلار.
22بونا گؤره ده، ای اوهولئبا، پروردئگار رب بله دیئر: ”باخ، ائیره‌ندئیئن اویناشلارینی سنئن ضئدّئنه قالدیراجاغام، اونلاری هر طرفدن سنئن اوستونه گتئره‌جیم. 23بابئللی‌لرله بوتون کَلدانئلری، پِقود، شوعَع و قوعَع خالقینی، و بوتون آشورلولاری اونلارلا گتئره‌جیم؛ هامیسی جاذئبه‌لی جاوانلار، والئلر، باشچیلار، سرکرده‌لر و مشهور آداملار، هامیسی دا آتلارا مئنمئش. 24اونلار سئلاحلارلا، دؤیوش و یوک عارابالاری ائله، چوخ دؤیوشچو بئر قوشونلا اوستونه گله‌جکلر، سئپرلرله، قالخانلا، دَبئلقه ائله هر طرفدن سنئن ضئدّئنه دوزوله‌جکلر. حؤکم اتمک ائختئیارینی اونلارا وره‌جیم و اونلار اؤز رسملرئنه موطابئق سنی موحاکئمه اده‌جکلر. 25قیرتئمی سنئن ضئدّئنه چِوئره‌جیم کی، سنئنله قضبله رفتار اتسئنلر. اونلار سنئن بورنونو و قولاقلارینی کَسه‌جکلر، صاغ قالانلارین قیلینجلا هلاک اولاجاقلار. اوغوللارینی و قیزلارینی اسئر آلاجاقلار، صاغ قالانلارینی اود یاندیریب محو اده‌جک. 26سنئن پالتارلارینی دا سویوندوراجاق، گؤزل بَزَکلرئنی آلاجاقلار. 27بله‌جه مئصئر تورپاغیندان گتئردئیئن عئفّسئزلئیئنه و فاحئشه‌لئیئنه آخیر قویاجاغام، اِله کی، بو شیلرئن حسرتئنی بئر داها چکمه‌یه‌‌سن، مئصئری ده بئر داها یادا سالمایاسان.“ 28چونکی پروردئگار رب بله دیئر: ”باخ، سنی نئفرت اتدئیئن آداملارا تسلئم اده‌جیم، او آداملارا کی، اؤزون ده اونلاردان ائیره‌نئرسن. 29اونلار سنئنله نئفرتله رفتار اده‌جکلر، بوتون زحمتئنئن بهره‌سئنی اَلئندن آلاجاقلار، سنی لوت و چیلپاق قویاجاقلار. بله‌جه فاحئشه‌لئیئنئن عاییبی، هم عئفّتسئزلئیئن هم ده فاحئشه‌لئیئن اوزه چیخاجاق. 30بونلار سنئن باشینا گله‌جک، چونکی باشقا مئلّتلرله زئنا اتدئن، اونلارین بوتلری ائله اؤزونو نجئس اتدئن. 31اؤز باجینین یولو ائله گتدئن. بونا گؤره ده اونون کاساسینی سنئن اَلئنه وره‌جیم.“
32پروردئگار رب بله دیئر:
”سن باجینین کاساسیندان ائچه‌جکسن.
او، درئن و گِنئشدئر.
سنه گولوب، سنی ائستِهزا اده‌جکلر،
کاسا دوپ‌دولودور.
33کِفلی‌لئک و کَدَرله دولاجاقسان.
باجین سامئره‌نئن کاساسی
دهشت و وئرانه‌لئک کاساسی‌دیر.
34بو کاسادان ائچه‌جکسن،
اونو آخیراجاق ائچه‌جکسن.
کاسانین دئبئنه اوتورانی گَمئره‌جکسن،
سئنه‌نی ییرتاجاقسان.“
چونکی بونو من دِمئشَم،
پروردئگار رب بویورور.
35بونا گؤره ده پروردئگار رب بله دیئر: ”ائندی کی منی یاددان چیخاردیبسان، منی آرخانا آتیبسان، عئفّتسئزلئیئنئن و فاحئشه‌لئیئنئن جزاسینی چک.“»
36رب منه داها ددی: «ای بشر اوغلو، آیا اوهولا‌نی و اوهولئبا‌نی موحاکئمه اده‌جکسن؟ اگر اِله‌دئر ائیرنج ائشلرئنی اؤزلرئنه بئلدئر. 37چونکی اونلار خیانت ادئبلر و اَللری قانا باتیب. اونلار بوتلرله زئنا ادئب، حتّا منئم اوچون دوغدوقلاری اوغوللارینی اوددا بوتلره تقدئم ادئبلر کی، اونلارا یمک اولسون. 38بوندان علاوه، منئم ضئدّئمه حله بونلاری دا ادئبلر: هَمَن گون موقدّس مکانیمی نجئس ادئبلر و سَبّت گونلرئمه محل قویماییبلار. 39اونلار بوتلری اوچون اؤولادلارینی کَسدئکدن سونرا، همئن گون موقدّس مکانیما گئردئلر کی، اورانی نجئس اتسئنلر. باخ، بونو منئم معبدئمئن ائچئنده اتدئلر.
40بوندان باشقا، قاصئدلر گؤندَ‌رئب اوزاقدان گلن آداملار گتئرتدئلر. بو آداملار گلنده سن اونلار اوچون یویوندون، گؤزلرئنه سورمه چکدئن و اؤزونه بَزَک تاخدین. 41مؤحتشم بئر دئوان اوستونده اوتوردون. اونون قاباغیندا حاضیرلانمیش سوفره وار ائدی. منئم بوخورومو و زیتون یاغیمی اونون اوستونه قویدون. 42اطرافیندا کِف ادن بئر دسته‌نئن گورولتوسو گؤیه قالخدی. صحرادان کِفلی آداملار دسته‌سی ائله اورایا گتئرئلدی. او ائکی آروادین بئلَکلرئنه دستبندلر، باشلارینا دا گؤزل تاجلار قویدولار.
43من فاحئشه‌لئکده قرق اولموش آرواد باره‌ده ددئم: ”بله اولدوغو حالدا، مگر ائندی اونونلا زئنا اده‌جکلر؟“ 44لاکئن اونلار فاحئشه‌نئن یانینا گئرن کئمی اونون یانینا گئردئلر. بله‌جه اونلار عئفّتسئز آروادلار اوهولا و اوهولئبا‌نین یانینا گئردئلر. 45آمّا صالح آداملار اونلارا زئنا ادن آروادین جزاسینی، قان تؤکَن آروادین جزاسینی وره‌جکلر، چونکی بو آروادلار زئناکاردیرلار و اَللری قانا باتیب.
46بونا گؤره ده پروردئگار رب بله دیئر: ”اوستلرئنه بئر جاماعات گتئر و اونلاری دهشته، تالانا تسلئم ات. 47بو جاماعات اونلاری داشا باساجاق و قیلینجلا دوغرایاجاق؛ اوغوللارینی و قیزلارینی اؤلدوروب اِولرئنی یاندیراجاق. 48بله‌جه اؤلکه‌ده اولان عئفّتسئزلئیه آخیر قویاجاغام کی، بوتون آروادلار بوندان درس آلیب سئزئن کئمی عئفّتسئزلئک اتمه‌سئنلر. 49عئفّتسئزلئیئزئن جزاسی اؤز باشینیزا گله‌جک. بوتلرئنئزئن پرستئش اتمه‌سئنئن عوضئنی آلاجاقسینیز. او واخت بئله‌جکسئنئز کی، پروردئگار رب منم.“»
Currently Selected:
حِزِقیال 23: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
