حِزِقیال 16
16
خیانت اتمئش اورشلئم
1منه ربّئن بو سؤزو نازئل اولدو: 2«ای بشر اوغلو، اورشلئمه اونون نجئس عمل‌لرئنی بئلدئرئب دِه کی، 3پروردئگار رب اورشلئمه بله دیئر: ”اصلئن و دوغومون کَنَعان تورپاغیندان‌دیر: آتان بئر اِمورلو ائدی، آنان دا بئر خئتلی. 4دوغولدوغون گون، گؤبَک باغین کَسئلمه‌دی، سنی سو ائله یویوب تمئزله‌مه‌دئلر، دوزلا اووولمادین و قونداغا بَلَنمه‌دئن. 5هچ کس سنه شَفقَتله باخمادی، رحم اتمه‌دی کی، بونلارین بئرئنی سنه اتسئن. دوغولدوغون گون سندن ائیره‌ندئکلری اوچون چؤله آتیلدین.
6من سنئن یانیندان کِچَرکَن اؤز قانین ائچئنده قیمیلداندیغینی گؤردوم و اؤز قانیندا ائکَن سنه یاشا! ددئم. بلی، اؤز قانیندا ائکَن سنه یاشا! ددئم. 7سنی چؤل بئتکئلری کئمی چوخالتدیم. سن بوی آتیب بؤیودون و حدّی-بولوغا چاتدین. دؤشلرئن بؤیودو، ساچلارین اوزاندی. آمّا حله ده لوت و چیلپاق ائدئن. 8من سنئن یانیندان کِچَنده سنی گؤردوم. بو واخت سنئن محبّت چاغین ائدی. من سنئن اوستونه اَته‌یئمی آتیب لوتلویونو اؤرتدوم. آند ائچئب سنئنله عهد باغلادیم.“ پروردئگار رب بویورور، ”سن ده منئم اولدون. 9من سنی سو ائله یودوم، قانینی اوستوندن تمئزله‌دئم، سنی یاغلا مسح اتدئم. 10سنه اَلوان ناخیشلی پالتار گِیئندئردئم، آیاغینا سو ائتی دَرئسئندن چاریق گِیدئردئم، بِلئنه نازئک کتان قورشاق باغلادیم و سنی ائپَکلرله اؤرتدوم. 11سنی بَزَکلرله بَزه‌دئم، قوللارینا دستبند، بوینونا زنجئر تاخدیم. 12بورنونا حالقا، قولاقلارینا گوشوارا کچئرتدئم و باشینا گؤزل بئر تاج قویدوم. 13بله‌جه سن قیزیل گوموشله بَزه‌ندئن، نازئک کتاندان، ائپَکدن و اَلوان ناخیشلی قوماشدان پالتار گِیئندئن. نارین اون، بال و زیتون یاغی یِدئن. حدّئندن آرتیق گؤزل اولدون و پادشاهلیق حئشمتئنه اوجالدین. 14گؤزل‌لئیئنه گؤره مئلّتلر آراسیندا شؤهرتلَندئن. منئم سنه وردئیئم عظمتدن اؤتری گؤزل‌لئیئن کامئل ائدی،“ پروردئگار رب بویورور.
15”لاکئن سن گؤزل‌لئیئنه بِل باغلادین، شؤهرتلَندئیئنه گؤره فاحئشه‌لئک اتدئن، هر یولدان کِچَنه اؤزونو تسلئم اتدئن و گؤزل‌لئیئنه او مالئک اولدو. 16اؤز پالتارلاریندان گؤتوروب اؤزونه رنگ‌به‌رنگ پرستئشگاهلار دوزَ‌لتدئن و اونلارین اوستونده فاحئشه‌لئک اتدئن. بِله‌سی نه اولموشدو، نه ده اولاجاق. 17منئم سنه وردئیئم قیزیل-گوموشومدن حاضیرلانان زئنتلرئنی گؤتوروب، اؤزونه کئشی صورتلری دوزَ‌لتدئن و اونلارلا فاحئشه‌لئک اتدئن. 18اَلوان ناخیشلی پالتارینی گؤتوروب اونلارین اوستونه اؤرتدون، زیتون یاغیمی و بوخورومو اونلارین قاباغینا قویدون. 19سنه وردئیئم چؤره‌یئمی، سنه یِدئرتدئیئم نارین اونو، زیتون یاغینی و بالی دا عطئرلی بوخور اولاراق اونلارین قاباغینا قویدون. بو ائش باش وردی.“ پروردئگار رب بویورور.
20”منئم اوچون دوغدوغون اوغوللار و قیزلارینی گؤتوروب بوتلرئن یِمه‌یی اوچون اونلارا قوربان اتدئن. مگر فاحئشه‌لئیئن آز ائدی کی، 21اؤولادلاریمی دا کَسئب اونلاری اوددا بوتلره تقدئم اتدئن؟ 22بوتون ائیرنج ائشلرئنی و فاحئشه‌لئیئنی اِدَرکَن، اؤز جاوانلیق گونلرئنی خاطیرلامادین؛ او گونلری کی، لوت و چیلپاق ائدئن و اؤز قانین ائچئنده قیمیلدانیردین.“
23پروردئگار رب بویورور: ”وای، وای سنئن حالینا! سن بوتون پئس عمل‌لرئندن سونرا 24اؤزونه معبدلر قوردون و هر میداندا پرستئشگاهلار دوزَ‌لتدئن. 25هر یولون باشیندا اؤز پرستئشگاهلارینی دوزَ‌لتدئن. اؤز گؤزل‌لئیئنی نجئس اتدئن، هر یولدان کِچَنه آیاقلارینی آرالادین و فاحئشه‌لئیئنی آرتیردین. 26مئصئرلی‌لرله ده کی، سنئن شهوتران قونشولارین ائدئلر، فاحئشه‌لئک اتدئن، منی قضبلَندئرمَک اوچون فاحئشه‌لئیئنی آرتیردین. 27بونا گؤره ده اَلئمی سنئن ضئدّئنه اوزادیب سنه تعیئن اولونان پایی آزالتدیم. سنی سنئن دوشمنلرئنئن طاماحینا، یعنی فئلئسطلی‌لرئن قیزلارینا کی، سنئن عئفّتسئز عمل‌لرئندن اوتانیردیلار، تسلئم اتدئم. 28آشورلولارلا دا فاحئشه‌لئک اتدئن، چونکی دویموردون؛ بلی، اونلارلا فاحئشه‌لئک اتدئن، آمّا حله ده دویمامیشدین. 29اؤز فاحئشه‌لئیئنی تئجارت اؤلکه‌سی اولان کَلده تورپاغینا قدر یایدین، لاکئن بو دا سنه کئفایت اتمه‌دی.“
30پروردئگار رب بویورور: ”بوتون بونلاری اِدَرکَن، یعنی حیاسیز فاحئشه‌نئن عمل‌لرئنی، گؤر سنئن اوره‌یئن نه قدر ناخوشدور! 31هر یولون باشیندا معبدلر قوردون، بوتون میدانلاردا پرستئشگاهلار دوزَ‌لتدئن. آمّا حله ده فاحئشه کئمی ده اولمادین، چونکی ائشئنئن عوضئنده ورئلَن اوجرته خور باخدین. 32زئنا ادن بئر آرواد اولدون، اَرئنئن عوضئنه یادلاری قبول ادن بئر آرواد اولدون. 33کئشئلر بوتون فاحئشه‌لره هدئیّه‌لر ورئرلر، آمّا بوتون اویناشلارینا سن هدئیّه‌لر وردئن. اونلارا روشوت وردئن کی، هر طرفدن سنئن یانینا گلسئنلر و سنئنله فاحئشه‌لئک اتسئنلر. 34بله‌جه فاحئشه‌لئک اتمکده باشقا آروادلاردان فرقئن وار ائدی. چونکی هچ کس سنئن دالینجا دوشمه‌دی کی، فاحئشه‌لئک اده‌سن؛ عکسئنه، بونون اوچون سن هدئیّه وردئن، سنه هدئیّه ورئلمه‌دی. بو جهتدن سنئن فرقئن وار ائدی.“
35بونا گؤره ده، ای فاحئشه، ربّئن سؤزونه قولاق آس. 36پروردئگار رب بله دیئر: ”حیاسیزلیغین اورتایا تؤکولدویو اوچون، اویناشلارینلا فاحئشه‌لئک اِدَرکَن لوتلویون آچیلدیغی اوچون، بوتون ائیرنج بوتلرئندن و اونلارا قوربان وردئیئن اوغوللارینین قانیندان اؤتری - 37بوتون بونلارا گؤره کِف اتدئیئن بوتون اویناشلارینی-سنئن سِودئکلرئنی ده، نئفرت اتدئکلرئنی ده بئر یِره ییغاجاغام. اونلاری هر طرفدن سنئن ضئدّئنه بئر یِره ییغاجاغام. اونلارین قاباغیندا سنی چیلپاق اده‌جیم کی، عاییبینی کامئل بئر شکئلده گؤرسونلر. 38زئنا ادن و قان تؤکَن آروادلارا ورئلَن جزا ائله سنی جزالاندیراجاغام، قضب و قیرتئمده سنی قانا بولایاجاغام. 39سنی اویناشلارینین اَلئنه وره‌جیم. معبدلرئنی داغیداجاقلار، پرستئشگاهلارینی اوچورداجاقلار، پالتارلارینی اَینئندن سویوندوراجاقلار، زئنتلرئنی اَلئندن آلاجاقلار، سنی لوت و چیلپاق قویاجاقلار. 40جاماعاتی اوستونه قالدیراجاقلار، سنی داشا باساجاقلار و قیلینجلاری ائله تئکه-تئکه دوغرایاجاقلار. 41اِولرئنه اود ووراجاقلار، چوخلو آروادین گؤزو قاباغیندا سنی جزالاندیراجاقلار. فاحئشه‌لئیئنه آخیر قویاجاغام و داها اویناشلارینا اوجرت ورمه‌یه‌جکسن. 42بله‌جه سنئنله قضبئمی یاتیرداجاغام، قیرتئمی سؤندوره‌جیم. من ساکئت قالاجاغام و بئر داها قضبلَنمیه‌جیم. 43ائندی کی سن جاوانلیق گونلرئنی یادینا سالماییبسان، آمّا بوتون بو عمل‌لرئنله منی قضبه گتئرئبسن، من ده عمل‌لرئنئن عوضئنی باشینا گتئره‌جیم.“ پروردئگار رب بویورور. ”مگر بوتون ائیرنج ائشلرئنه عئفّتسئزلئک ده علاوه اتمه‌‌یئبسن؟
44باخ، مثل دئیَن هر کس سنئن حاقّیندا بو مثلی دئیه‌جک: آناسی نجه‌دئر، قیزی دا اِله‌دئر. 45سن او آروادین قیزی‌سان کی، اَرئندن و اؤولادلاریندان نئفرت ادئر؛ سن او باجیلارینین باجیسی‌سان کی، اَرلرئندن و اؤولادلاریندان ائکراه ادئر. آنانیز خئتلی، آتانیز دا اِمورلو ائدی.
46بؤیوک باجین سامئره‌دئر کی، قیزلاری ائله سنئن شئمالیندا یاشاییردی. کئچئک باجین دا سودومدور کی، قیزلاری ائله سنئن جنوبوندا یاشاییردی. 47لاکئن سن اونلارین یولو ائله ده گتمه‌دئن، اونلارین اتدئیی ائیرنج ائشلر قدر ده اتمه‌دئن؛ بوتون بونلاری کئچئک بئر ائش ساییب، بوتون اؤز عمل‌لرئنده اونلاردان دا فاسئد اولدون. 48وارلیغیما آند اولسون“ پروردئگار رب بویورور، ”باجین سودوملا قیزلاری سنئنله قیزلارینین اتدئیی ائشلری اتمه‌دئلر. 49باخ، باجین سودومون و اونون قیزلارینین گوناهی بو ائدی: کئبئر، توخلوق و رئفاه ائچئنده یاشایارکَن، یوخسولا و مؤحتاجا کؤمک اَلی اوزاتمادیلار. 50کئبئرله‌نئب منئم حوضورومدا ائیرنج ائشلر اتدئلر. من بونو گؤرنده اونلاری سوپوروب آتدیم.
51سامئره سنئن اتدئیئن گوناهلارین یاریسینی بِله، اتمه‌مئشدی. ائیرنج ائشلرده اونلاری دا اؤتوب کچدئن. اتدئیئن بوتون ائیرنج ائشلرله باجیلارینی صالح کئمی گؤرستدئن. 52سن ده اؤز روسوایچیلیغینین یوکونو داشی، چونکی باجیلارینی تمئزه چیخارتدین. اتدئیئن گوناهلار اونلارینکیندان دا ائیرنج اولدوغونا گؤره، اونلار سندن داها دوز گؤرونورلر. خجالتئندن اوتان، اؤز روسوایچیلیغینین یوکونو داشی، چونکی باجیلارینی صالح کئمی گؤرستدئن.
53سودومدان و اونون قیزلاریندان اسئر اولونموشلاری، سامئره‌دن و اونون قیزلاریندان اسئر اولونموشلاری تزه‌دن اؤز یِرلرئنه قایتاراجاغام و اونلارلا بئرلئکده سندن اسئر اولونموشلاری دا گری قایتاراجاغام، 54اِله کی، اونلارا تسلّی اولدوغون اوچون اؤز روسوایچیلیغینین یوکونو داشییاسان و اتدئیئن هر ائشدن اوتاناسان. 55باجیلارین سودوملا قیزلاری اوّلکی وضعئیّتلرئنه قاییداجاقلار، سامئره ائله قیزلاری اوّلکی وضعئیّتلرئنه قاییداجاقلار، سن و قیزلارین دا اوّلکی وضعئیّتئنئزه قاییداجاقسینیز. 56کئبئرلی اولدوغون گونلرده، پئسلئیئن اوزه چیخمامیشدان، باجین سودومون آدی سنئن آغزیندان اِشئدئلمَزدی، 57ائندی سن، اَرام قیزلارینین و اطرافینداکی‌لارین، فئلئسط قیزلارینین و اطرافینداکی‌لارین مسخره‌سی اولوبسان، سنئن اطرافیندا اولانلار سنی تحقئر ادئرلر. 58سن عئفّتسئزلئیئنئن و ائیرنج عمل‌لرئنئن جزاسینی چکئرسن،“ رب بویورور.
59بلی، پروردئگار رب بله دیئر: ”سن عهدی پوزوب آندا خور باخدین. بونا گؤره ده سن نجه اتدئن، من ده سنه اِله اده‌جیم. 60لاکئن من جاوانلیق گونلرئنده سنئنله باغلادیغیم عهدئمی یادا سالاجاغام و سنئنله ابدی بئر عهد باغلایاجاغام. 61او واخت سن، بؤیوک و کئچئک باجیلارینی یانینا آلدیغین زامان، اؤز عمل‌لرئنی یادا سالیب اوتاناجاقسان. سنئنله باغلادیغیم عهدده اولمادیغی حالدا اونلاری سنه قیز یرئنه وره‌جیم. 62عهدئمی سنئنله برقرار اده‌جیم و بئله‌جکسن کی، رب منم. 63اِله‌جه بوتون اتدئکلرئنی باغیشلادیغیم زامان، بونو یادا سالیب اوتاناجاقسان، روسوایچیلیغیندان بئر داها آغزینی آچمایاجاقسان.“ پروردئگار رب بویورور.»
Currently Selected:
حِزِقیال 16: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
