۱قورئنتلی‌لره 3
3
جملئکده نه‌لرسئنئز؟
1قارداشلار، من سئزئنله روحانئلرله دانیشان کئمی دانیشا بئلمه‌دئم، آنجاق جئسمانئلر کئمی، مسئحده کؤرپه‌لر کئمی دانیشدیم. 2من سئزه آغیر یمک یوخ، سود وردئم. چونکی اونو یمه‌یه گوجونوز چاتمیردی، ائندی ده چاتمیر. 3چونکی سئز حله ده جئسمانئسئنئز. آرانیزدا پاخیلّیق و چکئشمه اولماسیندان آیا جئسمانی دیئلسئنئز؟ آیا آیری ائنسانلار کئمی یاشامیرسینیز؟ 4چونکی اگر بئری «من پولوسدان تَبَعئیّت اِدئرم» او بئری ده «من اَپولّوسدان تَبَعئیّت اِدئرم» دیئر، آیا آیری ائنسانلار کئمی دیئلسئنئز؟ 5اَپولّوس کئمدئر؟ پولوس کئمدئر؟ آنجاق خئدمتکاردیرلار کی، اونلارین واسئطه‌سی‌ائله، ربّئن هر کسه وردئیی فورصته گؤره ائمان گتئردئنئز. 6من اَکدئم، اَپولّوس سوواردی، آمّا تاری بؤیوتدو. 7بونا گؤره، موهوم اولان اَکن و یا سوواران دیئل، بؤیودن تاری‌دیر. 8اَکنله سووارانین دَیَری بئردئر، لاکئن هر بئری چکدئیی زحمتئنه گؤره اجر آلاجاق. 9چونکی بئز تاری ائله ائشله‌ین ائشچئلرئک؛ لاکئن سئز تارینین زمئسی، تارینین عئمارتئسئنئز.
10من، تارینین منه وردئیی فیضه گؤره، حئکمتلی بئر معمار کئمی بونؤوره قویدوم و آیری بئر آدام اونون اوستونده بئنا ادئر. آمّا هر کس نجه بئنا اتدئیئنه دئقّت اتسئن. 11چونکی هچ کئم قویولان بونؤوره‌دن، یعنی عئسا مسئحدن باشقا بئر بونؤوره قویا بئلمز. 12اگر بئری بو بونؤوره اوستونده قیزیلدان، گوموشدن، قئیمتلی داشلاردان، تاختادان، ساماندان، کولَشدن بئنا اتسه، 13هر بئرئنئن ائشی بلّی اولاجاق؛ اونا گؤره کی، دئوان گونو اورتایا چیخاجاق، چونکی اودلا آچیغا چیخاجاق. و اود اؤزو هر کسئن ائشئنئن کیفئیّتئنی ائمتاحان اده‌جکدئر. 14کئمئن بئنا اتدئیی داوام گتئرسه، او، اجر آلاجاق. 15کئمئن ائشی یانسا، او، ضرر چکه‌جک، آمّا اؤزو اوددان چیخان کئمی نئجات تاپاجاقدیر.
16مگر بئلمئرسئنئز کی، سئز تارینین معبدئسئنئز و تارینین روحو سئزده ساکئندئر؟ 17کئم تارینین معبدئنی محو اتسه، تاری اونو محو اده‌جک. چونکی تارینین معبدی موقدّسدئر؛ بو معبد ده سئزسئنئز. 18هچ کئم اؤزونو آلداتماسین. سئزلردن هر کس اگر اؤزونو بو عصرده حئکمت صاحئبی ساییر، قوی عاغیلسیز اولسون کی، بلکه حئکمت آلسین. 19چونکی بو دونیانین حئکمتی تارینین حوضوروندا عاغیلسیزلیقدیر. نجه کی، یازیلیب دا: «تاری‌دیر کی، حئکمت صاحئبلرئنی اؤزلرئنئن حؤقّه‌بازلیقلاری ائله توتور.»#3:19 اَیّوب ۵:۱۳
20گئنه ده یازیلیب: «رب بئلئر کی، حئکمت صاحئبلرئنئن دوشونجه‌لری فایداسیزدیر.»#3:20 مزمور ۹۴:۱۱
21بونا گؤره، هچ کئمئن فخری ائنسانلاردا اولماسین، چونکی هر شی سئزئندئر. 22ائستر پولوس اولسون، ائستر اَپولّوس؛ ائستر کئفا اولسون، ائستر دونیا؛ ائستر حیات اولسون، ائستر اؤلوم، ائستر ائندئکی شِیلر اولسون، ائستر گله‌جکده‌کی؛ هامیسی سئزئندئر. 23سئز ده مسئحئنسئنئز، مسئح ده تارینیندیر.
Currently Selected:
۱قورئنتلی‌لره 3: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
