Luka 6
6
Ƴamol Dow Nyalnde Siwtaare
(Maatiyu 12.1‑8; Markus 2.23‑28)
1Wonde Nyalnde Siwtaare Yeesu e yaha nder ngesa alkamaari, sey tokkuɓemo ngaɗi ka ɓoruki cammeeje mayri e molmaɗe nder juuɗe maɓɓe, e ɓe nyaama.#TA 23.25. 2Ammaa woɓɓe Faarisanko'en mbi'iɓe, “Ko waɗi ngaɗoton ko Attawra haɗi ɗum waɗa Nyalnde Siwtaare?”
3Yeesu wi'iɓe, “On meeɗaayi janguki ko Dawda waɗi nde nani weelo, kanko e gonduɓe e maako? 4O natti Lukuru Seniiɗum, o hocci buroodi ceniiɗum, o nyaamiɗum. Attawra boo wi'ii ardiiɓe diina tan haani nyaamuki buroodi ɗum, ammaa Dawda nyaamiɗum haa maa o hokkori jaadooɓe e maako.”#KLee 24.9. #1Sam 21.1‑6.
5Sey Yeesu wi'iɓe, “Ɓii Neɗɗo woni Joomu Nyalnde Siwtaare.”
Yeesu Yamɗitinii Mo Jungo Jaraango
(Maatiyu 12.9‑14; Markus 3.1‑6)
6Wonde Nyalnde Siwtaare o natti nder suudu do'aare, e mo ekkitina. Goɗɗo mo jungo jaraango e nder mayru. 7Moodiɓɓe Attawra e Faarisanko'en cutii Yeesu koo o yamɗitinay goɗɗo nder Nyalnde Siwtaare, ngam ɓe keɓa ko ɓe ngulliroytoomo. 8Ammaa, Yeesu e andi ko woni nder ɓerɗe maɓɓe, sey o wi'i neɗɗo mo jungo jaraango on, “Woroy, ndaroɗaa caka maɓɓe.” O ummii, o darii ɗon. 9Sey Yeesu wi'iɓe, “E mi ƴama'on, ko Attawra wi'i ɗum waɗa nder Nyalnde Siwtaare, waɗa ko wooɗi koo waɗa ko wooɗaa, hisna yonki koo halkaki?” 10Gaɗa o raariiɓe ɓe fuu, sey o wi'i neɗɗo on, “Fortu jungo maaɗa.” O fortingo, sey ngo yamɗiti.
11Ammaa ɓerɗe maɓɓe metti naa' seɗɗa, ɓe meti hakkunde maɓɓe dow ko ɓe ngaɗanta Yeesu.
Yeesu Suɓii Lilaaɓe Sappo e Ɗiɗo
(Maatiyu 10.1‑4; Markus 3.13‑19)
12Nder balɗe ɗen, Yeesu yahi dow hocceere ngam waɗa do'aare. O waali waɗuki do'aare. 13Nde weeti, o noddi tokkuɓemo, o suɓi sappo e ɗiɗo, o hokkiɓe inde lilaaɓe. 14Kamɓe ngoni: Siiman mo o hokki inde Biiturus, e minyiraawo maako Andiraawus, e Yaakubu, e Yahaya, e Filibus, e Batiloomi, 15e Maatiyu, e Tooma, e Yaakubu ɓii Halfa, e Siiman bi'eteeɗo Jalooti#6.15: Ma'ana inde nden woni giɗɗo lenyol maako naa' seɗɗa, gooduɗo lawliiru lenyol maako., 16e Yahuuda ɓii Yaakubu, e Yahuuda Iskariyooti, gartuɗo kokkitirɗo Yeesu.
Yeesu Ekkitinii Moɓgal, Yamɗitinii Nyawɓe
(Maatiyu 4.23‑25)
17Sey Yeesu jippodii e maɓɓe o darii e njayri. Tokkuɓemo ɗuɗɓe e ɗon e yimɓe ɗuɗɓe ƴiwoyɓe daga leydi Yahuudiya fuu, e Urucaliima, e leydi Taaya e Sidon haade mbeela. 18Ɓe ngaroyi ngam nanukimo e yamɗineeki daga nyawuuji maɓɓe. Ɓe ginni torrata njamɗinaa. 19Wonɓe ɗon fuu e ɓaddoo ngam meema Yeesu, ngam bawɗe e mburtoo daga nder maako, e mo yamɗitina koo moye.
Barkiɗinki e Laanuki
(Maatiyu 5.1‑12)
20Yeesu raari tokkuɓemo, wi'i,
“On barkiɗinaaɓe, onon ɓe ngalanaa,
ngam onon njeyi Laamu Allah.
21“On barkiɗinaaɓe, onon nanooɓe weelo jooni,
ngam on ngartay karneteeɓe.
“On barkiɗinaaɓe, onon woyooɓe jooni,
ngam on ngartay jalayɓe.
22“On barkiɗinaaɓe to yimɓe nganyii'on, ndiiwii'on, kuɗii'on, mbonnii inɗe mooɗon ngam Ɓii Neɗɗo.#1Biit 4.14. 23Nanee belɗum nder nyalnde nden, ngamee ngam belɗum, ngam barka mooɗon ɗum ɗuɗɗum e dow. Non maama'en maɓɓe ngaɗannoo annabo'en arande'en.#2HL 36.16; KL 7.52.
24“On mbonii, onon riskuɓe,
ngam on keɓii ko ɗaɓɓitoton.
25“On mbonii, onon karɓe jooni,
ngam on nanay weelo.
“On mbonii, onon jalayɓe jooni,
ngam on nanataa belɗum, on mboyay bojji nawɗi.
26“On mbonii to yimɓe fuu manii'on, ngam non maama'en maɓɓe ngaɗannoo annabo'en fewre.
Ngiɗee Ganyooɓe Mooɗon
(Maatiyu 5.38‑48; 7.12)
27“Ammaa e mi wi'a'on onon nanooɓe ko mbi'aymi: Ngiɗee ganyooɓe mooɗon, ngaɗanee wanyuɓe'on ko wooɗi, 28mbarkiɗinee laanooɓe'on, ngaɗanee torrooɓe'on do'aare. 29To goɗɗo fiyiima to wolo, waylitanmo wo'oto ngon maa. To goɗɗo jaɓii cuddaari maaɗa, taa' haɗumo toggoore maaɗa. 30Toriiɗoma goɗɗum fuu, hokkumo. Teetanɗoma goɗɗum, taa' wi'imo o hokkutumaa. 31Ngaɗanee woɓɓe ko ngiɗɗon ɓe ngaɗana'on.#Maat 7.12.
32“To yiɗuɓe'on tan ngiɗɗon, ɗume barka keɓoton? Koo kalluɓe maa e ngiɗi yiɗuɓeɓe. 33To gaɗanooɓe'on boɗɗum tan ngaɗanton boɗɗum, ɗume barka keɓoton? Ay, kalluɓe maa e ngaɗa non. 34To ɓe kammiiɗon njoɓay'on tan kokkoton nyamaande, ɗume barka keɓoton? Ay, kalluɓe maa e kokka kalluɓe nyamaande, e ɓe kammoo hokkiteeki nyamaande maɓɓe. 35Ammaa ngiɗee ganyooɓe mooɗon, ngaɗaneeɓe boɗɗum, kokkeeɓe nyamaande, to' on kammoo hokkiteeki. To on ngaɗii non, on keɓay barka ɗuɗɗum, on ngartay ɓiɓɓe Allah Joomu Mangu. Ngam Allah e yurminana ɓe ngettataa e kalluɓe. 36Njurminanee yimɓe non no Nyaako mooɗon Mo Dow yurmirta.
To' On Kiito Woɓɓe
(Maatiyu 7.1‑5)
37“To' on kiito woɓɓe, on kiitataake. To' on metu kalluka dow goɗɗo, ɗum metataa kalluka dow mooɗon. Njaafee, ɗum yaafanto'on. 38Kokkee, ɗum hokkay'on e poondirgel kewngel tiɗɗaangel dimbaangel boɗɗum, ɗum waylanay'on nder tummuɗe mooɗon, ngam poondirgel ngel poondirɗon, e maagel ɗum foondiranta'on.”
39Ɗonmaa o hokkiɓe misaalu ɗu'um, o wi'i, “On ngi'a bumɗo waaway ardaaki bumɗo? Ɓe fuu ɗiɗo naa' sey ɓe njana nder ngayka?#Maat 15.14. 40Ekkitotooɗo ɓurataa moodibbo muuɗum, ammaa koo moye ekkitinaaɗo boɗɗum wartay bo moodibbo muuɗum.#Maat 10.24,25; Yah 13.16; 15.20.
41“Ngam ɗume ndaarataa geenel gongel nder hitere bandiraawo maaɗa, ammaa a wannaayi e legga wonga nder hitere maaɗa? 42No waɗata mbi'aa bandiraawo maaɗa, ‘Bandiraawo, al mi ittanmaa geenel nder hitere maaɗa,’ nden an e hoore maaɗa a yi'aayi legga wonga nder hitere maaɗa? An munaafukiijo, artu ittuki legga wonga nder hitere maaɗa, nden ngi'aa boɗɗum keɓaa no ittiraa geenel gongel nder hitere bandiraawo maaɗa.
Lekki e Andiree Ɓikkoy Maaki
(Maatiyu 7.16‑20; 12.33‑35)
43“Lekki boɗki rimataa ɓikkoy koy mbooɗaa, non maa lekki ki wooɗaa rimataa ɓikkoy mboɗkoy. 44Ngam koo kiye lekki e andiree ɓikkoy maaki. Ɗum teɓɓitataa ibbe to lekki kooraaje, non to gi'ehi ɗum teɓɓitataa ɓikkoy bummeeje.#Maat 12.33. 45Neɗɗo mo ngikku boɗɗum e wurtina fii boɗɗum daga nder ko woni nder ɓernde muuɗum. Non maa neɗɗo kalluɗo e wurtina halleende daga nder ɓernde muuɗum, ngam honduko neɗɗo e meta ko woni nder ɓernde muuɗum.”#Maat 12.34.
Ɓoliiɗe Yeesu Almasiihu e Cembiɗi Bo Tafaare
(Maatiyu 7.24‑27)
46O wi'iɓe, “Ngam ɗume noddirtoyyam, ‘Moodibbo, Moodibbo,’ ammaa on ngaɗataa ko mbiimi'on? 47Neɗɗo fuu garɗo to am nani boliiɗe am waɗi ko mbiimi, mi hollay'on ko o nandi. 48E mo nandi e neɗɗo mahoowo wuro gasuɗo leydi lugguɗum haa o hewti tafaare, o mahi wuro dow mayre. Caangol heewi falƴi fiyi wuro ngon, ammaa ngo dimbaaki, ngam ngo mahaama dow tafaare. 49Ammaa nanɗo boliiɗe am, nden waɗaayi ko mbiimi e nandi e neɗɗo mahuɗo wuro dow njaareendi. Nde caangol falƴi fiyingo, ɗon e ɗon ngo yani ngo fuu!”
Currently Selected:
Luka 6: fuv
Highlight
Share
Copy
Want to have your highlights saved across all your devices? Sign up or sign in
© 2010, Bible League. All rights reserved.