Lom 9

Lua Isailiɔ sɛa

1Malɛ sĩana'o naa Kilisiwa guuɛ, malɛ ɛɛtoo. Lua Nisĩna pɔ dɔ̀aa ma laasooɛ mɛ́ dɛmɛɛ yãpi seelade ũ. 2Ma pɔsia kɛ̀ zai, ma nɔ̀sɛ ìɔ yaa gɔɔpiiɛ. 3Má fɔ̃ mà wabikɛ Luawa aà ma kɛ̃ Kilisiwa, aà laaikɛa ma Isaili deeɔ gbɛu. 4Ampiɔ ɔ̃ Lua ń sɛ́ a nɛɔ ũ,#Bɔa 4.22 à a gawi ɔlɔ̀nɛ́, aà bàa kuńnɔ, à a ikoyã kpàmá, à luasisia dànɛ́, à lɛgbɛ̃̀nɛ́. 5Aa dɛ Lua gbɛ̃kaauɔ buiɔ ũ, mɛ́ an bui guu ɔ̃ Mɛsi pɔ dɛ pɔpiia bɔ̀u gbɛ̃nazĩna ũ. Ɔ̃mɛ Lua pɔ kũ̀ wàɔ a saaukpa gɔɔpii ũ. Ãmi.

6I kɛ yã pɔ Lua ò lɛ̀lɛ pã no, asa Isaili pii mɛ́ Isaili zalala ũo. 7I kɛ Ablahaũ bui pii mɛ́ Ablahaũpi nɛɔ ũ Luaɛo, asa Lua ò Ablahaũɛ à mɛ̀, Izaaki buiɔ ɔ̃ wali onɛ́ aà buiɔ.#Daa 21.12 8Beewa i kɛ nɛ pɔ à ń í ń pɔeãoɔ mɛ́ Lua nɛɔ ũo, nɛ pɔ à ń í Lua lɛgbɛ̃a musuɔ mɛ́ dɛ buipiɔ ũ. 9Asa Lua lɛgbɛ̃̀ à mɛ̀: Má ɛa mà mɔ zii maa'i, Sala i nɛ'i gɔ̃ɛ ũ.#Daa 18.10 10-12I kɛ beeɛ adoo. Lua ì gbɛ̃́ɔ sɛ lá àlɛ yawaɛ, i kɛ an yãkɛa yãi no, kɛ́ à ń sisìɛ. Beewa kɛ́ Lɛbɛka sìaɔ nɔsì ń wá dezikaau Izaakio, e àɔ gɛ́ ń ii, e aaɔ gɛ́ maa ge vãikɛi, Lua ò Lɛbɛkaɛ nɛ pɔ bɔ̀ káau ali misiilɛ gbɛ̃́ zã́ɛ.#Daa 25.23 13Lá a kɛ̃a wà mɛ̀:

Má ye Yakɔbuzi,

Esau sɔ̃, má yeaazio.#Mal 1.2-3

14Wá o kpelewa ni? Yãvãi ku Lua kĩi yã? Aawo! 15Asa a ò Mɔiziɛ,

gbɛ̃́ pɔ á ye suuukɛaanɔ ɔ̃ á kɛ,

mɛ́ gbɛ̃́ pɔ á ye wɛ̃nadɔ̃ɛ̀ ɔ̃ á dɔ̃ɛ̀.#Bɔa 33.19

16Ayãmɛto Lua gbɛ̃́ɔ sɛa i bɔ gbɛ̃nazĩna pɔeã guuo ge an kɔaikɛa, à bɔ̀ Lua suuu guuɛ. 17Asa lá guu Lua ò Falaɔ̃ɛ à mɛ̀: Ma n kpa kpalau kɛ́ mà a gbãa ɔlɔnɛ́ n musuɛ, ma tɔ́ i li dũniaa pii.#Bɔa 9.16 18Beewa gbɛ̃́ pɔ a ye suuukɛaanɔ ì kɛaanɔɛ, mɛ́ gbɛ̃́ pɔ a ye aà swãgbãakũ, ì kũɛ.

19Á gbɛ̃e a ma la, bɔyãi Lua lɛ́ gbɛ̃́ɔ taae'e lɔi? Demɛ a fɔ̃ gi Lua pɔeãii? 20N gbɛ̃nazĩna ia, dén n ũ gbasa ǹ yãzãsi Luawai? Oo a a bona la, bɔyãi n ma boi kɛ́waia?#Isa 45.9 21Oobona zɛ́ vĩ aà oo swãde ń oo swãsaio bo ń gĩ̀ doũ pɔ a tòtooo le? 22Tó Lua ye à a pɔkũma ɔlɔnɛ́ kɛ́ aa a gbãa dɔ̃, mɛ́ à mɛna zɔ̃ɔ kɛ̀ ń gbɛ̃́ pɔ dɛ à pɔkũmabɔbɔmá à ń kaalɛɔ sɔ̃ bɛ! 23A kɛ̀ màa, kɛ́ gbɛ̃́ pɔ dɛ à suuukɛńnɔ à dɔ̀aa à ń kɛkɛ̀ aaɔ gawi vĩɔ aa a gawi zɔ̃ɔ dɔ̃ɛ. 24Gbɛ̃́ pɔ Lua ń sisì à ń sɛ́piɔn wá ũ. I kɛ Yudaɔnɛ ńdoo, ń buipãleɔɛ lɔ. 25Lá Lua ò ãnabi Oze láuwa à mɛ̀:

Bui pɔ dɛ ma gbɛ̃́ɔ ũoɔ ɔ̃ má onɛ́ ma gbɛ̃́ɔ.

Bui pɔ má yeńzioɔ ɔ̃ máɔ yeńzi.#Oze 2.25

26Gua pɔ Lua ònɛ́ aa dɛ a gbɛ̃́ɔ ũo,

we wa ounɛ́ Lua bɛ̃́ɛpi nɛɔ.#Oze 2.1

27Isaia wiilɛ̀ Isailiɔ yãmusu à mɛ̀:

Baa tó Isailiɔ dasi lan isialɛ ũfãawa,

an kɔ̃naɔ mɛ́ a bɔ.

28Asa Dii a yã pɔ a ò kɛ dũniau,

mɛ́ a a midɛ zɛzɛsaiɛ.#Isa 10.22-23

29Lá Isaia dɔ̀aa a òwa à mɛ̀:

Tó Dii Zĩgɔ̃de i wá buieɔ to yãao,

dɔ̃ wa gɔ̃ lan Sɔdɔũdeɔwa,

wí bɔ lan Gɔmɔɔdeɔwa.#Isa 1.9

Isailiɔ gia Kilisi baonai

30Wá o kpelewaɛ sa? Buipãleɔ lɛ́ wɛɛlɛ Lua to yã bɔńnɔ nao, ɔ̃ a tò à bɔ̀ńnɔ na. A tò yã bɔ̀ńnɔ na a naai pɔ aa kɛ̀ yãiɛ. 31Isailiɔ sɔ̃, aalɛ wɛɛlɛ Lua to yã bɔńnɔ na ikoyã musu, ɔ̃ i bɔńnɔ nao. 32Bɔyãi ni? Kɛ́ aa ye Lua to yã bɔńnɔ na an yãkɛa yãiɛ, i kɛ aà naaikɛa yãi no. Aa gɛ̃mbɔlɛ gbɛ pɔ ì ń pãlɛwa, 33lá wa kɛ̃̀wa:

Gwa, malɛ gbɛ pɔ ì to wà gɛ̃mbɔlɛ dilɛ Siɔna,

gbɛsi pɔ ì to wà fu.

Wí a gbɛ̃́ pɔ lɛ́ aà naaikɛ kũo.#Isa 28.16

Currently Selected:

Lom 9: Boo2024

Highlight

Copy

Compare