Mat 27

Yudasi gaa

(Zĩn 1.18-19)

1Kɛ́ gu dɔ̀ kɔɔkɔɔ, sa'onkiaɔ ń Yuda gbɛ̃zɔ̃ɔɔ pii lɛkpàaĩ Yesuzi, kɛ́ aa e aa aà dɛ. 2Aa aà yè, ɔ̃ aa gɛ̀ aa aà kpà busu gbɛ̃zɔ̃ɔ Pilatiwa.

3Kɛ́ Yudasi pɔ à aà kpàmá è yã zɔ̃̀lɛwà, à gɔ̃̀ dendɔ̃mɛɛ guu, ɔ̃ à gɛ̀ ãnusu ɔwatɛ̃ baakwipi sɔaai sa'onkiaɔnɛ ń gbɛ̃zɔ̃ɔɔ. 4A ònɛ́: Ma duunakɛ̀, ma taaesaide kpà gai. Ɔ̃ aa òɛ̀: Wá bàa ũmai? N yãɛ. 5Ɔ̃ Yudasi ɔ̃api zù luakpɛu, ɔ̃ à tà, à gɛ̀ à azĩa lòo. 6Ɔ̃ sa'onkiaɔ ɔ̃api sɛ̀lɛ aa mɛ̀: Ɔ̃api kaa Lua kpɛ kpagolo guu zɛ́ vĩo, asa gbɛ̃́dɛ'ɔ̃aɛ. 7Kɛ́ aa lɛkpàaĩ, ɔ̃ aa oobona gĩtɔkĩi lù ń ɔ̃apio nibɔɔ vĩkĩi ũ. 8Ayãmɛto e ń a gbão wì mɛ tɔɔlɛpiɛ Gbɛ̃́dɛna tɔɔlɛ. 9Ɔ̃ yã pɔ ãnabi Zelemi ò pà à mɛ̀: Wà ãnusu ɔwatɛ̃ baakwipi sɛ̀lɛ, ɔ̃a pɔ Isailiɔ zɛ̀ò aa kpà aà yãmusupi, 10ɔ̃ wà oobona gĩtɔkĩi lùò lá Dii òmɛɛwa.#Zkl 11.12-13

Pilati yãkpalɛkɛa ń Yesuo

(Maa 15.1-20; Luk 23.1-25; Zãa 18.28–19.16)

11Yesu zɛa busu gbɛ̃zɔ̃ɔ aɛ. Ɔ̃ gbɛ̃zɔ̃ɔpi aà là à mɛ̀: Yudaɔ kian n ũa? Yesu wèwà à mɛ̀: Ɔ̃mɛ dɔ n lɛ́u we. 12Gɔɔ pɔ sa'onkiaɔ ń gbɛ̃zɔ̃ɔɔ lɛ́ yãdɔdɔwà, i yãe zãsimáo. 13Ɔ̃ Pilati òɛ̀: Yã pɔ wàlɛ dɔdɔma dasidasi, nlɛ mao le? 14Kɛ́ Yesu i yãe o yãpiɔ kee musuo, à bɔ̀ busu gbɛ̃zɔ̃ɔpi saɛ maamaaɛ.

15Gɛ̃amusu dikpɛzĩ pii, busu gbɛ̃zɔ̃ɔpi ì dakpɛunaɔ do pɔ bila yei gbaɛnɛ́ɛ. 16Gɔɔ bee sɔ̃ dakpɛuna tɔdee ku we, wì mɛ Balaba. 17Kɛ́ bila kã̀aa, ɔ̃ Pilati ń lá à mɛ̀: Dé á ye mà kɛ̃ɛ́i? Balaba yã̀, ge Yesu pɔ wì mɛ Mɛsiɛ? 18Asa a dɔ̃ kɛ́ wɛdɔa Yesuɛ yãi ɔ̃ wà aà kpàiwa.

19Gɔɔ pɔ Pilati zɔ̃lɛa gĩ́naa, aà na gbɛ̃́ zĩ̀wà à mɛ̀: Nsu yãe kɛ gbɛ̃maapiɛo, asa nana pɔ má ò aà yãmusu gĩa gwã ma kũ gbãa maamaaɛ.

20Sa'onkiaɔ ń gbɛ̃zɔ̃ɔɔ nàɛ bilawa aa Balaba gbɛa, wi Yesu dɛ. 21Ayãmɛto kɛ́ busu gbɛ̃zɔ̃ɔpi ń lá, gbɛ̃ɔn plapiɔ guu dé aa ye à kɛ̃nɛ́i, ɔ̃ aa mɛ̀ Balabaɛ. 22Ɔ̃ Pilati ń lá à mɛ̀: Kpelewa má kɛ ń Yesu pɔ wì mɛ Mɛsioi? Gbɛ̃pii mɛ̀: Ǹ aà pá líwa. 23Ɔ̃ à ń lá à mɛ̀: Vãi kpele a kɛ̀i? Ɔ̃ an wiilɛa kã̀fĩ aa mɛ̀: Ǹ aà pá líwa. 24Kɛ́ Pilati è á fɔ̃ yãe kɛo, mɛ́ zɔa lɛ́ kãfĩ, ɔ̃ à idã̀, à ɔpì bila wáa à mɛ̀: Ma ɔbɔ̀lɛ gbɛ̃́pi gaa yãu.#Iko 21.6-7 Á yãɛ. 25Ɔ̃ gbɛ̃́piɔ mɛ̀: Aà dɛa yã wí wá musu ń wá nɛɔ. 26Ɔ̃ à Balaba kɛ̃̀nɛ́ à mɛ̀ wà Yesu gbɛ̃ ń flaalao, wi aà pá líwa.

27Bee gbɛa Pilati sosaɔ gɛ̃̀ ń Yesuo busu gbɛ̃zɔ̃ɔpi bɛ, ɔ̃ an gãli pii lìaaazi. 28Aa aà pɔɔ wòlowà, aa gomusu tɛ̃a dàɛ̀. 29Aa lɛ̀ fùa tã̀ wa kpàɛ̀, aa fee nàɛ̀ a ɔplaau gopana ũ. Ɔ̃ aalɛ kulɛkulɛɛ̀, aalɛ aà kɛ pɔɔpɔɔ aalɛ mɛ: Fɔ, Yudaɔ kia! 30Aa lɛ'ikàwà, aa feepi sɛ̀ aa aà lɛ̀ò a miwa. 31Kɛ́ aa aà kɛ̀ pɔɔpɔɔ aa làa, aa gomusupi bɔ̀aala, aa aà pɔkasaɔ dàɛ̀, ɔ̃ aalɛ gɛ́ aà pai líwa.

Yesu gaa

(Maa 15.21-41; Luk 23.26-49; Zãa 19.17-30)

32Kɛ́ aa bɔ̀lɛ lɛ́ gɛ́, aa kpàaũ ń Silɛni gbɛ̃́ pɔ wì mɛ Simɔo. Aa teasi dàɛ̀, ɔ̃ à Yesu lipãakɔ̃a sɛ̀. 33Kɛ́ aa kà gu pɔ wì mɛ Gɔgɔta (bee mɛ̀ mitɔɔnagu), 34ɔ̃ aa vɛ̃ɛ yãalɛa ń ɛsɛo dɔ̀ɛ̀ aà mi.#Soũ 69.22 Kɛ́ a ìɛ, ɔ̃ à gì mii. 35Kɛ́ aa aà pà líwa, ɔ̃ aa tɛlɛpà aà pɔkasaɔ kpaalɛa yãmusu.#Soũ 22.19 36Ɔ̃ aa zɔ̃̀lɛ lɛ́ aà dɔ̃́a we. 37Wà aà tàae pɔ wa è kɛ̃̀ wa nà aà mia wà mɛ̀:

Gbɛ̃́ɛ beeá Yesu, Yudaɔ kiaɛ.

38Ɔ̃ wà kpãiwɛliwɛɔ pà líwa Yesupi saɛ gbɛ̃ɔn pla, ado ɔplaai, ado ɔzɛɛi. 39Gbɛ̃́ pɔ aalɛ gɛ̃ weɔ lɛ́ ń midɛ, aalɛ aà sɔ̃sɔ̃#Soũ 22.8, 109.25 40aalɛ mɛ: N mɛ̀ ńyɔ̃ luakpɛ wí, ní ɛa ǹ dɔ gɔɔ aaɔ̃ nolo?#Mat 26.61 Tó Lua Nɛn n ũ, ǹ nzĩa suaba, pila líwa. 41Màa sa'onkiaɔ ń Mɔizi ikoyãdanɛdeɔ ń gbɛ̃zɔ̃ɔɔ lɛ́ aà kɛ pɔɔpɔɔ lɔ aa mɛ̀: 42À gbɛ̃pãleɔ suabà mɛ́ a fɔ̃ à azĩa suabaoa? Isailiɔ kia nolo? Aà pila líwa sa, wí aà naaikɛ. 43A Lua naai vĩ. Tó Lua yeaaziɛ, aà aà bɔ sa,#Soũ 22.9 asa à mɛ̀ Lua Nɛn a ũ. 44Baa kpãi pɔ wà ń pá líwa sãnuɔ lɛ́ aà sɔ̃sɔ̃ màa lɔɛ.

45Gusia kũ̀ busupiu pii za ĩatɛ̃ minanguo e aua gɛ̀ pìlaò.#Amɔ 8.9 46Ĩatɛ̃'auapilaa ɔ̃ Yesu wii gbãa lɛ̀ à mɛ̀: Ɛli, Ɛli, lɛma sabatani! Bee mɛ̀ ma Lua, ma Lua, akɛa n ma to wei?#Soũ 22.2 47Kɛ́ gbɛ̃́ pɔ zɛa weeɔ yãpi mà aa mɛ̀: Àlɛ Ɛlia sisiɛ. 48Wegɔ̃ɔ an gbɛ̃do baalɛ̀, à sao sɛ̀ a kpàlɛ vɛ̃ɛ kũmau, a pɛ̀ feea, ɔ̃ a dɔ̀ Yesuɛ aà mi.#Soũ 69.22 49Ɔ̃ gbɛ̃kĩniɔ mɛ̀: Zɛ gĩ́a wà gwa tó Ɛlia a mɔ aà suabai. 50Yesu ɛ̀a wii gbãa lɛ̀ lɔ, ɔ̃ à kɛ̀sai.

51Ɔ̃ Lua kpɛ zwãa#Bɔa 26.31-33 pɔ daa luakukĩi aɛ pàa pla za musu e zĩlɛ. Tɔɔlɛ lùalua, gbɛɔ pàapaa, 52miaɔ wɛ̃̀wɛ̃, ɔ̃ Lua gbɛ̃́ɔ vù dasi aa bɔ̀ gau. 53Yesu vua gbɛa aa bɔ̀lɛ miau aa gɛ̃̀ Lua wɛ̃lɛu, wà ń é dasi. 54Kɛ́ sosaɔ gbɛ̃zɔ̃ɔ ń a gbɛ̃́ pɔ aalɛ Yesu dɔ̃́aɔ tɔɔlɛlualuaa è ń yã pɔ kɛ̀ɔ pii, í wãa kà ń pɔa maamaa aa mɛ̀: Gɔ̃ɛpiá Lua Nɛɛ sĩana. 55Nɔɛɔ ku we dasi, aalɛ gugwa kãaa. Aa tɛ Yesuzi za Galileɛ, aaìɔ blɛkɛɛ̀. 56Maliama Madelɛni ku ń guu ń Zaki ń Yosɛfuo da Maliamao ń Zebede nɛɔ dao.

Yesu vĩa

(Maa 15.42-47; Luk 23.50-56; Zãa 19.38-42)

57Kɛ́ oosi kɛ̀, Alimate gbɛ̃́ ɔde pɔ wì mɛ Yosɛfu mɔ̀. Yesu iwaɛ lɔ. 58À gɛ̀ Yesu gɛ wabikɛ̀ Pilatiwa, ɔ̃ Pilati mɛ̀ wà kpawà. 59Kɛ́ Yosɛfu gɛpi sɛ̀, à baabaa dafu fĩ̀wà 60à aà dà azĩa gbɛ'ɛ pɔ wa sɔ̀ mia ũ guu. Ɔ̃ à gbɛ̀ gbɛ̃̀nɛ gbeembo tà ɛpilɛ à tà. 61Maliama Madelɛni ń Maliama pãlepio zɔ̃lɛa we, an aɛ dɔa miawa.

62Kɛ́ gɔɔ lìlɛ, kãmabogɔɔzĩ kà, ɔ̃ sa'onkiaɔ ń Falisiɔ gɛ̀ Pilati kĩi sãnu 63aa mɛ̀: Yã pɔ gbɛ̃sãsãnapi ò a bɛ̃́ɛ zĩ́ dɔwágu, à mɛ̀ gɔɔ aaɔ̃dezĩ á vuɛ.#Mat 16.21, 17.23, 20.19 64O wàɔ miapi dɔ̃́a e gɔɔ aaɔ̃. Tó màa no, aà iwaɔ mɔ aa aà gɛ sɛ kpãiɛ, aai o gbɛ̃́ɔnɛ à bɔ̀ gauɛ. Ɛɛ gbɛzã bee aɔ dɛ a kaaua. 65Ɔ̃ Pilati ònɛ́: À sosaɔ sí, í gɛ́ mia dɔ̃́a lá á fɔ̃́wa. 66Ɔ̃ aa gɛ̀ seelakɛ̀ miagbɛtaɛwa, aa sosaɔ tò we aaɔ dɔ̃́a.

Currently Selected:

Mat 27: Boo2024

Highlight

Copy