Mat 24
24
Yelusalɛũ duuzɔ̃a ń dũniaɛ bee laagɔɔ seelaɔ
(Maa 13.1-20; Luk 21.5-24)
1Yesu bɔ̀ Lua ua, àlɛ tá, ɔ̃ aà iwaɔ sɔ̃̀aazi, aa lɛsuikɛ̀ɛ̀ Lua ua kpɛɔwa. 2Ɔ̃ Yesu ònɛ́: A beeɔ è piia? Sĩana malɛ oɛ́, wa gbɛe to dikɔ̃a weo, wa a duuzɔ̃ɛ.
3Gɔɔ pɔ Yesu zɔ̃lɛa Kukpɛ sĩsĩpɔlɛu, aà iwaɔ mɔ̀ aà kĩi ntɛ̃ɛ, aa aà là aa mɛ̀: Owɛ̃ɛ, yãpiɔ kɛ bɔɛ ni? Bɔmɛ aɔ dɛ n mɔa ń dũnia tiaɛ bee laagɔɔo seela ũi? 4Yesu wèmá à mɛ̀: À laaika, ásu to gbɛ̃e á sãsão. 5Asa gbɛ̃́ɔ mɔ ń ma tɔ́o dasi, aa mɛ Mɛsin ń ũ, aa gbɛ̃́ɔ sãsã dasi. 6Áli zĩ̀ baoma ń a súuo. Ásu to sɔ̃ kɛ̃águo. Bee a kɛɛ, ãma gɔɔ laaa pɔn we gĩ́ao. 7Asa bui ń buio aa fɛlɛ ń kɔ̃oɛ, màaɛ lɔ kia ń kiao. Nɔana ń tɔɔlɛ lualuaao aɔ ku guɔu dasi. 8Yãpiɔ piiá nɔwãwã daalɛaɛ. 9Bee gbɛa wa á kpamá wà á wɛtã, wi á dɛ, bui pii i zaágu ma yãi.#Mat 10.22 10Gbɛ̃́ daside i gbasa fu, aai bɔ kɔ̃ kpɛ, aaiɔ zakɔ̃u. 11Ãnabi ɛgɛnaɔ mɔ dasi aa gbɛ̃́ɔ sãsã dasi, 12yãvãi i kɔ̃́, gbɛ̃́ dasideɔ yea Luazi i busa. 13Gbɛ̃́ pɔ zɛ̀ gbãa e a gɔɔ lɛ́wa, ade mɛ́ a bɔ.#Mat 10.22 14Wa kia pɔ Lua kpà baopi kpa dũniau pii seela ũ bui piiɛ, a lɛ́ i gbasa ká.
15Tó a tɛ̃̀ gugbãlɛbɔ pɔ ãnabi Daniɛli a yã'ò#Dan 9.27, 11.31, 12.11 è Lua ua, kyokɛna yãpi da, 16gɔɔ bee gbɛ̃́ pɔ aa ku Yudeɔ baalɛ, aa mipɛ sĩ̀sĩɔwa. 17Gbɛ̃́ pɔ ku kpɛ́ musu su pila gɛ̃ kpɛ́u pɔe sɛio. 18Gbɛ̃́ pɔ kpɛ́ bua su ɛa bɛ a ula sɛio. 19Waiyoo nɔsindeeɔ ń nɛadeɔ gɔɔ bee. 20À wabikɛ Luawa kɛ lala'oapi su kɛ buziɛ ge kãmabogɔɔzĩo. 21Asa gɔɔpi taasi aɔ zɔ̃ɔɛ. Zaa Lua dũnia kàlɛ e gbã, a taa i kɛo, mɛ́ a taa a kɛ lɔo.#Dan 12.1 22Tó Lua i zɛò à gɔɔpi laoo, dɔ̃ gbɛ̃e a bɔo. Ãma a lào gbɛ̃́ pɔ à ń sɛ́ɔ yãiɛ.
Gbɛ̃nazĩn Nɛ mɔa
(Maa 13.21-37; Luk 17.20-37, 21.25-33)
23Gɔɔ bee tó gbɛ̃e su òɛ́, à gwa, Mɛsi ku la ge a ku le, ásu sio. 24Asa mɛsi ɛgɛnaɔ ń ãnabi ɛgɛnaɔ mɔ aa seela zɔ̃ɔɔ n dabudabuɔ kɛ, kɛ́ baa gbɛ̃́ pɔ Lua ń sɛ́ɔ aa ń sãsãò, tó a zɛkɛ. 25Malɛ oɛ́ za káauɛ. 26Tó wa òɛ́, à gwa, a ku sɛ̃u, ásu gɛ́o. Ge tó wa òɛ́, à gwa, a ku kpɛa, ásu sio. 27Asa lá lou ì pilɛ à musu pu za gukpɛ e bɛ'aɛ, màa Gbɛ̃nazĩn Nɛ mɔa aɔ dɛ. 28Gu pɔ gɛ kuu, we yãamusuɔ kãaau.
29Gɔɔ bee wɛtɛ̃a gbɛa gɔ̃̀ɔ, ĩatɛ̃ a siakũ, mɔvua a ikɛo, saanaɔ wolo luawa, pɔ pɔ ku luawapiɔ zã ń pɛkĩiɔwa.#Isa 13.10, 34.4; Yoɛ 3.4 30Gbɛ̃nazĩn Nɛ seela i gbasa bɔ musu, Isaili busu buiɔ bubuapɛ mpii,#Zkl 12.10; Zia 1.7 aai Gbɛ̃nazĩn Nɛ mɔa e lounaau ń gbãao ń gawi zɔ̃ɔo.#Dan 7.13 31A a malaikaɔ zĩ ń kãae'ɔ gbãao, aa gbɛ̃́ pɔ à ń sɛ́ɔ bɔlɛ dũnia gola siiɔ̃u za luabɛ lɛla e a lɛle aa ń kãaa.
32À yã pɔ figi lí lɛ́ daɛ́ gwa. Tó a gɔ̃na busɛkũ̀ mɛ́ àlɛ bɔlɔbɔ, i dɔ̃ kɛ́ guantɛ̃na kãikũ̀. 33Màaɛ sɔ̃, tó a yãpiɔ è pii, àɔ dɔ̃ kɛ́ a ku kãi, a zɛ kpɛɛlɛ. 34Sĩana malɛ oɛ́, gɔɔpideɔ gɛ̃lɛo, yãpiɔ kɛ piiɛ. 35Musu ń tɔɔlɛo a gɛ̃lɛ, kási ma yãɔ gɛ̃lɛa vĩo.
36Gbɛ̃e a gɔɔ ge a zaa dɔ̃o, baa luabɛ malaikaɔ, baa Lua Nɛ, sema ma Mae ado. 37Lá a dɛ Nɔee gɔɔ,#Daa 6.5-7 màa aɔ dɛ Gbɛ̃nazĩn Nɛ mɔgɔɔ. 38Gɔɔ pɔ í i da dũnialao, wàlɛ pɔble, wàlɛ imi, wàlɛ nɔsɛ, wàlɛ zãkɛ e Nɔee gɛ̀ gɛ̃̀ go'ilɛna guu. 39Aai dɔ̃o, ɔ̃ í mɔ̀ à ń sɛlɛ mpii.#Daa 7.10-24 Màa aɔ dɛ Gbɛ̃nazĩn Nɛ mɔgɔɔ lɔ. 40Gɔɔ bee gɔ̃ɛ gbɛ̃ɔn plaɔ aaɔ ku bua, wa gbɛ̃do sɛ́, wi gbɛ̃do to we. 41Nɔɛ gbɛ̃ɔn plaɔ aaɔ pɔ lɔ gbɛzĩ, wa gbɛ̃do sɛ́, wi gbɛ̃do to we. 42Ayãmɛto à itɛ̃kɛ, asa á gɔɔ pɔ á Dii a mɔwà dɔ̃o. 43Àɔ yãɛ bee dɔ̃. Tó uabele zaa pɔ kpãi a mɔwa a bɛ dɔ̃̀ yãa, dɔ̃ à itɛ̃kɛ̀, a we aà a kpɛ́ gbooo. 44A yãi apiɔ sɔ̃, à to á sɔu àɔ maà, asa Gbɛ̃nazĩn Nɛ a mɔ zaa pɔ á wɛ́ dɔiowaɛ.
Zĩkɛn naaide laaide
(Luk 12.41-48)
45Demɛ zĩkɛn naaide laaide pɔ aà dii a zĩkɛnaɔ naɛ̀ a ɔzĩ, aàli blɛ kpamá a gɔɔwa ũi? 46Baaaden zĩkɛna pɔ aà dii aà lè àlɛ kɛ màa a sugɔɔ ũ. 47Sĩana malɛ oɛ́, a a aizɛɛ pii naɛ̀ a ɔzĩɛ. 48Ãma tó zĩkɛnapi vãi, a o a sɔ̃ guu a dii lɛ́ gɛ̃gɛ̃, 49i fɛlɛ na a zĩkɛndeeɔ gbɛ̃gbɛ̃awa, iɔ ulatãble, iɔ imi ń wɛ̃dɛnaɔ, 50aà dii a su gɔɔ pɔ aà wɛ́ dɔiowaɛ, zaa pɔ a dɔ̃owa, 51i aà zɔ̃ɛzɔ̃ɛ, i aà baa daaa ń mɔafilideɔ. We a ɔdi a musu a ɔɔlɔ.
Currently Selected:
Mat 24: Boo2024
Highlight
Share
Copy
Want to have your highlights saved across all your devices? Sign up or sign in
Boko Bible © SIM International, 2024.
Mat 24
24
Yelusalɛũ duuzɔ̃a ń dũniaɛ bee laagɔɔ seelaɔ
(Maa 13.1-20; Luk 21.5-24)
1Yesu bɔ̀ Lua ua, àlɛ tá, ɔ̃ aà iwaɔ sɔ̃̀aazi, aa lɛsuikɛ̀ɛ̀ Lua ua kpɛɔwa. 2Ɔ̃ Yesu ònɛ́: A beeɔ è piia? Sĩana malɛ oɛ́, wa gbɛe to dikɔ̃a weo, wa a duuzɔ̃ɛ.
3Gɔɔ pɔ Yesu zɔ̃lɛa Kukpɛ sĩsĩpɔlɛu, aà iwaɔ mɔ̀ aà kĩi ntɛ̃ɛ, aa aà là aa mɛ̀: Owɛ̃ɛ, yãpiɔ kɛ bɔɛ ni? Bɔmɛ aɔ dɛ n mɔa ń dũnia tiaɛ bee laagɔɔo seela ũi? 4Yesu wèmá à mɛ̀: À laaika, ásu to gbɛ̃e á sãsão. 5Asa gbɛ̃́ɔ mɔ ń ma tɔ́o dasi, aa mɛ Mɛsin ń ũ, aa gbɛ̃́ɔ sãsã dasi. 6Áli zĩ̀ baoma ń a súuo. Ásu to sɔ̃ kɛ̃águo. Bee a kɛɛ, ãma gɔɔ laaa pɔn we gĩ́ao. 7Asa bui ń buio aa fɛlɛ ń kɔ̃oɛ, màaɛ lɔ kia ń kiao. Nɔana ń tɔɔlɛ lualuaao aɔ ku guɔu dasi. 8Yãpiɔ piiá nɔwãwã daalɛaɛ. 9Bee gbɛa wa á kpamá wà á wɛtã, wi á dɛ, bui pii i zaágu ma yãi.#Mat 10.22 10Gbɛ̃́ daside i gbasa fu, aai bɔ kɔ̃ kpɛ, aaiɔ zakɔ̃u. 11Ãnabi ɛgɛnaɔ mɔ dasi aa gbɛ̃́ɔ sãsã dasi, 12yãvãi i kɔ̃́, gbɛ̃́ dasideɔ yea Luazi i busa. 13Gbɛ̃́ pɔ zɛ̀ gbãa e a gɔɔ lɛ́wa, ade mɛ́ a bɔ.#Mat 10.22 14Wa kia pɔ Lua kpà baopi kpa dũniau pii seela ũ bui piiɛ, a lɛ́ i gbasa ká.
15Tó a tɛ̃̀ gugbãlɛbɔ pɔ ãnabi Daniɛli a yã'ò#Dan 9.27, 11.31, 12.11 è Lua ua, kyokɛna yãpi da, 16gɔɔ bee gbɛ̃́ pɔ aa ku Yudeɔ baalɛ, aa mipɛ sĩ̀sĩɔwa. 17Gbɛ̃́ pɔ ku kpɛ́ musu su pila gɛ̃ kpɛ́u pɔe sɛio. 18Gbɛ̃́ pɔ kpɛ́ bua su ɛa bɛ a ula sɛio. 19Waiyoo nɔsindeeɔ ń nɛadeɔ gɔɔ bee. 20À wabikɛ Luawa kɛ lala'oapi su kɛ buziɛ ge kãmabogɔɔzĩo. 21Asa gɔɔpi taasi aɔ zɔ̃ɔɛ. Zaa Lua dũnia kàlɛ e gbã, a taa i kɛo, mɛ́ a taa a kɛ lɔo.#Dan 12.1 22Tó Lua i zɛò à gɔɔpi laoo, dɔ̃ gbɛ̃e a bɔo. Ãma a lào gbɛ̃́ pɔ à ń sɛ́ɔ yãiɛ.
Gbɛ̃nazĩn Nɛ mɔa
(Maa 13.21-37; Luk 17.20-37, 21.25-33)
23Gɔɔ bee tó gbɛ̃e su òɛ́, à gwa, Mɛsi ku la ge a ku le, ásu sio. 24Asa mɛsi ɛgɛnaɔ ń ãnabi ɛgɛnaɔ mɔ aa seela zɔ̃ɔɔ n dabudabuɔ kɛ, kɛ́ baa gbɛ̃́ pɔ Lua ń sɛ́ɔ aa ń sãsãò, tó a zɛkɛ. 25Malɛ oɛ́ za káauɛ. 26Tó wa òɛ́, à gwa, a ku sɛ̃u, ásu gɛ́o. Ge tó wa òɛ́, à gwa, a ku kpɛa, ásu sio. 27Asa lá lou ì pilɛ à musu pu za gukpɛ e bɛ'aɛ, màa Gbɛ̃nazĩn Nɛ mɔa aɔ dɛ. 28Gu pɔ gɛ kuu, we yãamusuɔ kãaau.
29Gɔɔ bee wɛtɛ̃a gbɛa gɔ̃̀ɔ, ĩatɛ̃ a siakũ, mɔvua a ikɛo, saanaɔ wolo luawa, pɔ pɔ ku luawapiɔ zã ń pɛkĩiɔwa.#Isa 13.10, 34.4; Yoɛ 3.4 30Gbɛ̃nazĩn Nɛ seela i gbasa bɔ musu, Isaili busu buiɔ bubuapɛ mpii,#Zkl 12.10; Zia 1.7 aai Gbɛ̃nazĩn Nɛ mɔa e lounaau ń gbãao ń gawi zɔ̃ɔo.#Dan 7.13 31A a malaikaɔ zĩ ń kãae'ɔ gbãao, aa gbɛ̃́ pɔ à ń sɛ́ɔ bɔlɛ dũnia gola siiɔ̃u za luabɛ lɛla e a lɛle aa ń kãaa.
32À yã pɔ figi lí lɛ́ daɛ́ gwa. Tó a gɔ̃na busɛkũ̀ mɛ́ àlɛ bɔlɔbɔ, i dɔ̃ kɛ́ guantɛ̃na kãikũ̀. 33Màaɛ sɔ̃, tó a yãpiɔ è pii, àɔ dɔ̃ kɛ́ a ku kãi, a zɛ kpɛɛlɛ. 34Sĩana malɛ oɛ́, gɔɔpideɔ gɛ̃lɛo, yãpiɔ kɛ piiɛ. 35Musu ń tɔɔlɛo a gɛ̃lɛ, kási ma yãɔ gɛ̃lɛa vĩo.
36Gbɛ̃e a gɔɔ ge a zaa dɔ̃o, baa luabɛ malaikaɔ, baa Lua Nɛ, sema ma Mae ado. 37Lá a dɛ Nɔee gɔɔ,#Daa 6.5-7 màa aɔ dɛ Gbɛ̃nazĩn Nɛ mɔgɔɔ. 38Gɔɔ pɔ í i da dũnialao, wàlɛ pɔble, wàlɛ imi, wàlɛ nɔsɛ, wàlɛ zãkɛ e Nɔee gɛ̀ gɛ̃̀ go'ilɛna guu. 39Aai dɔ̃o, ɔ̃ í mɔ̀ à ń sɛlɛ mpii.#Daa 7.10-24 Màa aɔ dɛ Gbɛ̃nazĩn Nɛ mɔgɔɔ lɔ. 40Gɔɔ bee gɔ̃ɛ gbɛ̃ɔn plaɔ aaɔ ku bua, wa gbɛ̃do sɛ́, wi gbɛ̃do to we. 41Nɔɛ gbɛ̃ɔn plaɔ aaɔ pɔ lɔ gbɛzĩ, wa gbɛ̃do sɛ́, wi gbɛ̃do to we. 42Ayãmɛto à itɛ̃kɛ, asa á gɔɔ pɔ á Dii a mɔwà dɔ̃o. 43Àɔ yãɛ bee dɔ̃. Tó uabele zaa pɔ kpãi a mɔwa a bɛ dɔ̃̀ yãa, dɔ̃ à itɛ̃kɛ̀, a we aà a kpɛ́ gbooo. 44A yãi apiɔ sɔ̃, à to á sɔu àɔ maà, asa Gbɛ̃nazĩn Nɛ a mɔ zaa pɔ á wɛ́ dɔiowaɛ.
Zĩkɛn naaide laaide
(Luk 12.41-48)
45Demɛ zĩkɛn naaide laaide pɔ aà dii a zĩkɛnaɔ naɛ̀ a ɔzĩ, aàli blɛ kpamá a gɔɔwa ũi? 46Baaaden zĩkɛna pɔ aà dii aà lè àlɛ kɛ màa a sugɔɔ ũ. 47Sĩana malɛ oɛ́, a a aizɛɛ pii naɛ̀ a ɔzĩɛ. 48Ãma tó zĩkɛnapi vãi, a o a sɔ̃ guu a dii lɛ́ gɛ̃gɛ̃, 49i fɛlɛ na a zĩkɛndeeɔ gbɛ̃gbɛ̃awa, iɔ ulatãble, iɔ imi ń wɛ̃dɛnaɔ, 50aà dii a su gɔɔ pɔ aà wɛ́ dɔiowaɛ, zaa pɔ a dɔ̃owa, 51i aà zɔ̃ɛzɔ̃ɛ, i aà baa daaa ń mɔafilideɔ. We a ɔdi a musu a ɔɔlɔ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Boko Bible © SIM International, 2024.