Mat 20

Yãlɛɛũa ń gbɛwinaɔ

1Lá kpala pɔ Lua kpà dɛn kɛ: Uabelee mɛ́ bɔ̀ kɔɔkɔɔ, à gɛ̀ gbɛwinaɔ wɛɛlɛi aa zĩkɛɛ a bua. 2An yã kɔ̃sɛ̀ aà fĩabonɛ́ ãnusu ɔwatɛ̃ dodo. Ɔ̃ à ń gbaɛ a bua. 3À bɔ̀ lɔ muuwãamigɔɔ, ɔ̃ à gbɛ̃pãleɔ lè gãaɛ kalɛa pã. 4A ònɛ́: Apiɔ sɔ̃ à gɛ́ zĩkɛi ma bua, mí fĩaboɛ́ a zɛ́wa. 5Ɔ̃ aa gɛ̀. À ɛ̀a à bɔ̀ lɔ ĩatɛ̃ minanguo, ɔ̃ à ɛ̀a bɔ̀ ĩatɛ̃ auapilaa, a ò gbɛ̃pãleɔnɛ màa lɔ. 6Kɛ́ à bɔ̀ oosi, à gbɛ̃pãleɔ lè kalɛa, ɔ̃ à ń lá à mɛ̀: Bɔyãi á kalɛa la pã za kɔɔi? 7Aa wèwà aa mɛ̀: Kɛ́ wi zĩdawɛ̃ɛo yãiɛ. A ònɛ́: À gɛ́ zĩkɛi ma bua sɔ̃.

8Ĩatɛ̃ gɛ̃a kpɛ́u#Iko 24.15 ɔ̃ budepi ò a ziiaɛ: Zĩkɛnaɔ sisi ǹ fĩabonɛ́. Daalɛ gbɛ̃́ zã́ɔwa ní a midɛ gbɛ̃kaauɔwa. 9Ɔ̃ oosideɔ mɔ̀, aa ãnusu ɔwatɛ̃ è dodo. 10Kɛ́ gbɛ̃kaauɔ mɔ̀, aalɛ e ń ɔ̃a aɔ dɛ gbɛ̃́ zã́ɔlaɛ, ɔ̃ ãnusu ɔwatɛ̃ dodo aa è mpii. 11Kɛ́ aa ń ɔ̃a sì, ɔ̃ aa zɔadɔ̀ uabelepiwa 12aa mɛ̀: Lɛɛlu do ɔ̃ gbɛ̃́ zã́ɔ zĩkɛ̀, mɛ́ n ń dilɛ sáa ń wá gbɛ̃́ pɔ wa zĩ zɔ̃ɔde kɛ̀, wa ĩatɛ̃ gbãa kàkawálaɔa? 13Ɔ̃ à wè an gbɛ̃́piɔ dowa à mɛ̀: Ma gbɛ̃́, mi n bleo. Wa kɔ̃yãmà ãnusu ɔwatɛ̃ dodo musu nolo? 14Ǹ n pɔ sí ǹ tá. Má ye mà kpa gbɛ̃́ zã́ɛ beewa lá n pɔwaɛ. 15Má zɛ́ vĩ mà kɛ ń ma ɔ̃ao lá má yeiwao le? Nlɛ wɛbɔbɔi kɛ́ má gbɛ̃kɛ vĩ yãi yã? 16Beewa gbɛ̃́ pɔ tɛ́ zã́ɔ gɔ̃ dɔaaa, mɛ́ gbɛ̃́ pɔ dɔaaaɔ gɔ̃ zã́.

Yesu a gaa ń a vuao yã'oa

(Maa 10.32-34; Luk 18.31-34)

17Gɔɔ pɔ Yesu lɛ́ gɛ́ Yelusalɛũ, à a iwa gbɛ̃ɔn kuɛplaɔ kã̀aa ntɛ̃ɛ, à yã'ònɛ́ zɛ́u à mɛ̀: 18Wálɛ gɛ́ Yelusalɛũɛ. We wa Gbɛ̃nazĩn Nɛ kpau sa'onkiaɔ ń Mɔizi ikoyãdanɛdeɔwa, aai yãdaaala, 19aai aà kpa luayãdɔ̃nsaiɔwa. Aa aà kɛ pɔɔpɔɔ, aai aà gbɛ̃ ń flaalao, aai aà pá líwa wà dɛ, i vu a gɔɔ aaɔ̃dezĩ.

Zaki ń Zãao da wabikɛa

(Maa 10.35-45)

20Bee gbɛa Zebede nɛɔ da mɔ̀ Yesu kĩi ń a nɛɔ. A ye wabikɛwà, ɔ̃ à kùlɛɛ̀. 21Ɔ̃ Yesu aà là à mɛ̀: Bɔ́ ń yeii? A wèwà à mɛ̀: To ma nɛ gbɛ̃ɔn plaɛɔ zɔ̃lɛnnɔ n kpalau, gbɛ̃do n ɔplaai, gbɛ̃do ɔzɛɛi. 22Ɔ̃ Yesu ò nɛpiɔnɛ à mɛ̀: Á yã pɔ álɛ a wabikɛa dɔ̃o. Kɛɛona pɔ má a imi, á fɔ̃ mia? Aa wèwà aa mɛ̀: Wá fɔ̃́. 23Yesu mɛ̀: Í pɔ má mi, á mi fa, ãma zɔ̃lɛa ma ɔplaai ge ma ɔzɛɛi dɛ ma yã ũo. Zɔ̃lɛkĩipiɔ dɛ gbɛ̃́ pɔ ma Mae kɛ̀kɛnɛ́ɔ pɔ ũɛ. 24Kɛ́ aà iwa gbɛ̃ɔn kwi kĩniɔ yãpi mà, an pɔ pà vĩi ń dãunapiozi. 25Ɔ̃ Yesu ń kãaa mpii, a ònɛ́: Á dɔ̃ kɛ́ busu gbãadeɔ ì gbãablemá, mɛ́ gbɛ̃zɔ̃ɔɔ ì ikokɛmá, 26ãma aɔ dɛ màa á kĩio. Tó á gbɛ̃e ye àɔ dɛ gbɛ̃zɔ̃ɔ ũ, aà gɔ̃ á dɔnlɛde ũ. 27Tó á gbɛ̃e ye àɔ dɛ dɔaana ũ, aà gɔ̃ á zɔblena ũ. 28Asa Gbɛ̃nazĩn Nɛ i mɔ wà dɔalɛo, à mɔ̀ dɔi gbɛ̃́ɔlɛɛ, i a wɛ̃ni kpa dasi boa yãi.

Vĩ̀a baakɛnaɔ gbãgbãa

(Maa 10.46-52; Luk 18.35-43)

29Gɔɔ pɔ aalɛ bɔ Yeliko, bila tɛ́ Yesuzi. 30Vĩ̀a gbɛ̃ɔn plaɔ zɔ̃lɛ zɛ́lɛ, aa mà Yesu mɛ́ lɛ́ gɛ̃, ɔ̃ aalɛ lɛ́ gbãa zu aa mɛ̀: Dii, Davidi Bui, wá wɛ̃nagwa! 31Wàlɛ ginɛ́ wàlɛ mɛ aa nilɛ, ɔ̃ an lɛzu kɛ̀kɛ gbãakũ̀ aa mɛ̀: Dii, Davidi Bui, wá wɛ̃nagwa! 32Ɔ̃ Yesu zɛ̀, à ń sisì, à ń lá à mɛ̀: Bɔ́ á ye mà kɛɛ́i? 33Aa wèwà aa mɛ̀: Dii, wá ye ǹ wá wɛ́ wɛ̃wɛ̃ɛɛ. 34Yesu ń wɛ̃nagwà, à ɔnàna ń wɛ́wa. Wegɔ̃ɔ aa gu'è, ɔ̃ aa bɔ̀ wa tɛaazi.

Currently Selected:

Mat 20: Boo2024

Highlight

Copy