Mat 15

Fɛlɛkaayã

(Maa 7.1-13)

1Falisieɔ ń Mɔizi ikoyãdanɛdeeɔ bɔ̀ Yelusalɛũ aa mɔ̀ Yesu kĩi, ɔ̃ aa aà là aa mɛ̀: 2Bɔyãi n iwaɔ líɔ wá deziɔ fɛlɛkaayã kũao ni? Aali ɔpi lá wa dìlɛ fɛlɛkaayã guuwa aa gbàsa pɔblèo. 3Ɔ̃ Yesu a zãsìmá à mɛ̀: Bɔyãi i pãkpa yã pɔ Lua dìlɛɔzi iɔ fɛlɛkaayã kũai? 4Asa Lua mɛ̀, àli á de ń á dao kpɛlaɛ.#Bɔa 20.12 À mɛ̀ lɔ, gbɛ̃́ pɔ a de ge a da kpɛbɔ̀, wà ade dɛ.#Lev 20.9 5Apiɔ sɔ̃ i mɛ tó gbɛ̃́ ò a de ge a daɛ, pɔ pɔ á vĩ à dɔòńlɛ gɔ̃̀ Lua pɔ ũɛ, 6ade bɔ̀ an kpɛlaa yãun we. Beewa i Lua yã bãdɛ á fɛlɛkaayã kũa yãi. 7Mɔafilideɔ! Ãnabi Isaia dɔ̀aa à á yã'ò wasawasa à mɛ̀:

8Buipi ì Lua kpɛla ń lɛ́oɛ,

an sɔ̃ kuwà lɔo.

9Aaìɔ aà sisi pãɛ,

gbɛ̃nazĩna ikoyãɔ ɔ̃ aaì danɛ́.#Isa 29.13

Yã pɔ ì to wà gbãlɛ

(Maa 7.14-23)

10Ɔ̃ Yesu bila laai sìsi à mɛ̀: À swãkpa à yãma. 11I kɛ pɔ pɔ ì gɛ̃ lɛ́u mɛ́ lí tó gbɛ̃́ gbãlɛ̀o. Yã pɔ ì bɔ lɛ́u mɛ́ ì to gbɛ̃́ gbãlɛ. 12Ɔ̃ aà iwaɔ sɔ̃̀aazi aa mɛ̀: Ń dɔ̃ kɛ́ Falisiɔ yãpi mà, à zɔ̃̀ ń pɔwao le? 13Yesu wèmá à mɛ̀: Pɔ pɔ ma Mae pɔ ku musu i tɔ̃o, a wolɛɛ. 14À ń tó we. Vĩ̀a dɔaanaɔnɛ! Tó vĩ̀a dɔ̀aa vĩ̀aɛ, ampla mpii aa zu ɛuɛ. 15Piɛɛ òɛ̀: Yãpi bɔɔlɛkɛwɛ̃ɛ. 16Ɔ̃ Yesu mɛ̀: E tia i ɔ̃nɔkũoa? 17Á dɔ̃ kɛ́ pɔ pɔ gɛ̃̀ lɛ́u ì ta gbɛɛuɛ, ɔ̃ wì a bĩikpɛkɛo lò? 18Yã pɔ bɔ̀ lɛ́u sɔ̃ à bɔ̀ sɔ̃ guuɛ. Ɔ̃mɛ ì to gbɛ̃́ gbãlɛ. 19Asa za sɔ̃ guu ɔ̃ laasoo vãi ì bɔu: Gbɛ̃́dɛa, wulɛa ń gbɛ̃pãle nɔo, gbãsĩkɛa, kpãi'oa, yãdɔama ń gbɛ̃sɔ̃sɔ̃ao. 20Yã beeɔ mɛ́ ì to gbɛ̃́ gbãlɛ. Pɔblea ɔpisai lí tó gbɛ̃́ gbãlɛ̀o.

Buipãle nɔɛ wabikɛa

(Maa 7.24-30)

21Ɔ̃ Yesu bɔ̀ we à gɛ̀ Tii ń Sidɔ̃o busuu. 22Kanaa nɔɛe ku busupiu, à mɔ̀ wiilɛ̀wà à mɛ̀: Dii, Davidi Bui, ma wɛ̃nagwa. Tãa lɛ́ ĩada ma nɛnɔɛnawa maamaaɛ. 23Ɔ̃ Yesu i wewào. Aà iwaɔ sɔ̃̀aazi, aa wabikɛ̀wà aa mɛ̀: Nɔɛpi yá, asa aɔ tɛwázi ń wiioɛ. 24Yesu wèmá à mɛ̀: Isailiɔ vũaaa lan sãɔwaɛ. An kĩi ɔ̃ Lua ma zĩu ado.#Mat 10.5-6 25Ɔ̃ nɔɛpi mɔ̀ kùlɛɛ̀ à mɛ̀: Dii, ma ĩa. 26Yesu òɛ̀: A maa wà nɛɔ blɛ sɛ wà zu gbɛ̃ɔnɛo. 27Ɔ̃ nɔɛpi mɛ̀: Sĩanaɛ Dii! Baa ń beeo gbɛ̃ɔ ì blɛ kasona pɔ lɛ̀lɛ ń dii taabũnu ziɛɔ pɛɛlɛɛ. 28Ɔ̃ Yesu wèwà à mɛ̀: Nɔɛ, ń ma naai vĩ zɔ̃ɔ. A kɛnɛ lá ń yeiwa. Ɔ̃ aà nɛnɔɛna gbã̀gbã zaapiwa gɔ̃̀ɔ.

29Yesu bɔ̀ we à sù, àlɛ dɔ Galile isidai, ɔ̃ à bùa à zɔ̃̀lɛ sĩsĩa. 30Wà mɔ̀ɛ̀ ń kɔ̃̀ɔɔ ń vĩ̀aɔ ń ɛɛɔ ń swãdoɔ ń gyãe pãleɔ dasidasi. Wà ń kalɛ aà gbázĩ, ɔ̃ à ń gbãgbã̀. 31Kɛ́ gbɛ̃́ɔ è lɛnanaalɛadeɔ lɛ́ yã'o, ɛɛɔ lɛ́ gbãgbã, kɔ̃̀ɔɔ lɛ́ taa'o, mɛ́ vĩ̀aɔ lɛ́ gu'e, yãpi bɔ̀ ń saɛ, ɔ̃ aa ń Isailiɔ Lua saaukpà.

Yesu blɛkpaa gbɛ̃ɔn ɔaasɔsɔo lɛɛ siiɔ̃ɔwa

(Maa 8.1-10)

32Yesu a iwaɔ kã̀aa a ònɛ́: Gbɛ̃́ɛɔ kɛ̀mɛɛ wɛ̃naũ, asa aa kumanɔ a gɔɔ aaɔ̃n la, mɛ́ aa pɔe vĩ wà bleo. Má ye mà ń gbaɛ ń nɔanaoo, kɛ́ an yɛ̃ɛɛ su laa zɛ́uo yãi. 33Ɔ̃ aà iwaɔ aà là aa mɛ̀: Makĩi wá blɛ eu sɛ̃gbãu la à gbɛ̃́ sà dasiɛɔ kãi? 34Yesu ń lá à mɛ̀: Á pɛ̃ɛ vĩ mɛn ũma ni? Aa mɛ̀: Mɛn sopla ń kpɔ kelenaeɔ. 35Yesu ò bilaɛ aa zɔ̃lɛzɔ̃lɛ tɔɔlɛ. 36Ɔ̃ à pɛ̃ɛ mɛn soplapiɔ sɛ̀ ń kpɔɔ, à saaukpà, ɔ̃ a ɛ̀'ɛ a kpà a iwaɔwa, aa kpà bilawa. 37Gbɛ̃pii pɔblè kã̀. Wà a miɔna pɔ fɛ̃̀ɔ sɛ̀lɛ sɔ sopla pai. 38Gɔ̃ɛ pɔ aa blèɔ kà gbɛ̃ɔn ɔaasɔsɔo lɛɛ siiɔ̃ (4 000) nɔɛɔ ń nɛɔ baasi. 39Kɛ́ Yesu bila gbàɛ, ɔ̃ à gɛ̃̀ go'ilɛna guu, à gɛ̀ Magadani busuu.

Currently Selected:

Mat 15: Boo2024

Highlight

Copy