Daa 37
37
Yosɛfu nana'oa
1Yakɔbu ku Kanaa busuu, gu pɔ aà mae zɔ̃̀lɛu yãa. 2Yakɔbu buiɔ yãn kɛ: Yosɛfuá ɛwaasonaɛ. Aà wɛ̃̀ gɛ̃o ń plaodeu kɛ́ àlɛ sãɔ dã ń a vĩiɔ, aà mae naɔ Bila ń Zilipao nɛɔ, ɔ̃ à yãvãi pɔ aa kɛ̀ kɔmalɛkɛ̀ a maeɛ. 3Isaili ye Yosɛfuzi dɛ a nɛ kĩniɔla, kɛ́ à aà ì a zikũ guu yãi, ɔ̃ à ulatao zɔ̃̀ɛ̀. 4Kɛ́ aà vĩiɔ è ń mae yeaazi dɛńla, ɔ̃ aa zàaagu, aali we yãna'òaanɔo.
5Yosɛfu nana'ò, ɔ̃ a sɛ̀lɛ a sìu a vĩiɔnɛ, ɔ̃ an zaaaagu kã̀fĩ dɛ a zia. 6A ònɛ́: À nana pɔ má ò ma. 7Má è wálɛ sɛ̃yeye búa, ɔ̃ ma sɛ̃baa fɛ̀lɛ zɛ̀. Á pɔɔ lìai, ɔ̃ aa kùlɛɛ̀. 8Ɔ̃ aà vĩiɔ òɛ̀: Nlɛ e ńyɔ̃ gɔ̃ wá kia ũ nɛe? Ńyɔ̃ ikokɛwá nɛe? Ɔ̃ an zaaaagu kã̀fĩ dɛ a zia nana pɔ a òpi yãi.
9Yosɛfu ɛ̀a à nana'ò lɔ, ɔ̃ a sɛ̀lɛ a sìu a vĩiɔnɛ à mɛ̀: Ma ɛa ma nana'ò lɔ. Má è ĩatɛ̃ ń mɔvuao ń saanaɔ mɛn kuɛdo aalɛ kulɛkulɛmɛɛ. 10À nanapi sɛ̀lɛ a sìu a maeɛ lɔ, ɔ̃ aà mae pàlawà à mɛ̀: Bɔtaa nana ń ò màai? Mapi ń n dao ń n vĩiɔ, nlɛ e wá mɔ́ wà wulɛ n aɛ nɛe? 11Aà vĩiɔ ĩisɛ̀aanɔ. Aà mae sɔ̃ a nanapi yã kũa a sɔ̃u.
12Aà vĩiɔ gɛ̀ ń mae sãɔ dãi Sikɛũ. 13Ɔ̃ Isaili ò Yosɛfuɛ: N vĩiɔ lɛ́ sãdã Sikɛũ nolo? Mɔ mà n zĩ ń kĩie! A wèwà à mɛ̀: Má làa. 14Ɔ̃ a òɛ̀: Gɛ́ n vĩiɔ gwai ń ń sãɔ, tó aa aafia, ní ɛa ǹ sumɛɛ ń a baoo. Ɔ̃ à aà gbàɛ, à bɔ̀ Hɛblɔ̃ guzulɛu à gɛ̀ Sikɛũ. 15Àlɛ liaaliaa sɛ̃u, ɔ̃ gɔ̃ɛe kpàaũaanɔ à aà là à mɛ̀: Bɔ́ nlɛ wɛɛlɛi? 16A wèwà à mɛ̀: Malɛ a vĩiɔ wɛɛlɛɛ. Tó ń ń sãdãkĩi dɔ̃, omɛɛ. 17Gbɛ̃́pi mɛ̀: Kɛ́ aa bɔ̀ lakĩi, má mà aa mɛ̀, wàlɛ gɛ́ Dotaniɛ. Ɔ̃ Yosɛfu pɛ̀lɛńzi à ń lé Dotani.
18Kɛ́ aa aà è kãaa, e àɔ gɛ́ kai ń kĩi, aa lɛkpàaĩaazi aa mɛ̀ wà aà dɛ. 19Aa òkɔ̃ɛ: À gwa, nana'onki lɛ́ mɔ́ kee. 20À to wà aà dɛ sa, wi aà zu ɛɛ beeɔ do guu, wí o wài mɛ́ aà sò. Wá e lá aà nanaɔ midɛ. 21Kɛ́ Lubɛni yãpi mà, a ye à aà misi, ɔ̃ à mɛ̀: Wásu wà aà dɛo. 22Ásu to au bɔwào. À aà zu ɛɛ beeu gbáau la, ásu à aà dɛo. Lubɛni ònɛ́ màa, kɛ́ a ye à aà misi, í ɛa à aà kpa a maewa yãiɛ. 23Kɛ́ Yosɛfu kà a vĩiɔ kĩi, aa aà ula bɔ̀aala, aà ulataopi. 24Ɔ̃ aa aà sɛ̀, aa zù ɛpiu. Ɛpi da giiɛ, a í vĩo. 25Ɔ̃ aa zɔ̃̀lɛ aalɛ pɔble. Kɛ́ aa wɛzù, aa Isimaɛla bui tagɛnaɔ è, aa bɔ̀ Galada busuu, aalɛ gɛ́ Egipi. An yiongoɔ li'ɔ ń nisidɔɔmao ń tulaletio sɛsɛa. 26Ɔ̃ Yuda ò a gbɛ̃́ɔnɛ: Tó wa wá dãuna dɛ̀, mɛ́ wa aà dɛa ùlɛ, bɔ́ ài wá ei? 27À to wà aà yia Isimaɛla buipiɔwa. Wásu wà aà dɛo, wá dãuna nolo? Wá au doũɛ. Ɔ̃ aà gbɛ̃́ɔ aa aà yãmà. 28Kɛ́ Madiã laatanapiɔ lɛ́ gɛ̃, aa Yosɛfu gà wa bɔ̀ ɛu, wà aà yìa Isimaɛla buipiɔwa ãnusu ɔwatɛ̃ bao, ɔ̃ aa gɛ̀aanɔ Egipi.#Zĩn 7.9
29Kɛ́ Lubɛni sù ɛpi kĩi, i Yosɛfu e we lɔo, ɔ̃ à a pɔkasaɔ gà a kɛ̃̀kɛ̃. 30Ɔ̃ à gɛ̀ a dãunaɔ kĩi à mɛ̀: Nɛpi ku we lɔo. Má gɛ́ má ń beeo ni? 31Aa blesana kũ̀ wa dɛ̀, ɔ̃ aa Yosɛfu ulapi sɛ̀, aa màlɛ a au guu. 32Ɔ̃ aa aà ulataopi sɛ̀ tàò ń maeɛ aa mɛ̀: Pɔ pɔ wá èn kɛ. N nɛ ula yã̀, ge aà pɔ no? 33A dɔ̃̀, ɔ̃ à mɛ̀: Ma nɛ ulataoɛ, wài mɛ́ aà sò. Waiyoo, à ma nɛ Yosɛfu tàitaiɛ. 34Ɔ̃ à a ulada gà a kɛ̃̀, à zwãnkasa sɛ̀ a dɔ̀ a pi, ɔ̃ à a nɛpi ɔɔlɔ̀ e'e'e. 35Aà nɛgɔ̃ɛɔ ń aà nɛnɔɛɔ mɔ̀ aà nɔsɛniniiɛ̀ mpii, ãma à gì wà a nɔsɛniniɛ à mɛ̀: Máɔ a nɛpi gaa ɔɔlɔɛ e mà gɛ mà taò aà kĩi bɛdau. Ɔ̃ àlɛ bubuapɛ a nɛpi yãmusu.
36Madiãpiɔ sɔ̃ aa Yosɛfu yìa Pɔtifaawa Egipi. Falaɔ̃ iwaɔ doɛ, ɔ̃mɛ aà dɔaiɔ gbɛ̃zɔ̃ɔ ũ.
Currently Selected:
Daa 37: Boo2024
Highlight
Share
Copy
Want to have your highlights saved across all your devices? Sign up or sign in
Boko Bible © SIM International, 2024.
