Bɔa 6
6
Dii Isailiɔ suabaa lɛgbɛ̃a Mɔiziɛ
1Ɔ̃ Dii òɛ̀: Ńyɔ̃ yã pɔ má kɛ Falaɔ̃ɛ e tia. A ń gbaɛ ma gbãa zɔ̃ɔ yãi. A ń yá a busuu ma gbãa zɔ̃ɔ yãi. 2Ɔ̃ Lua ɛ̀a yã'ò Mɔiziɛ à mɛ̀: Mamɛ má Dii ũ, 3ma bɔ ma mɔ Ablahaũ ń Izaakio ń Yakɔbuowa Lua Gbãapiide ũ,#Daa 17.1, 28.3, 35.11 kási aai ma dɔ̃ kɛ́ ma tɔ́n Diio. 4Ma bàa kuńnɔ ma mɛ̀ má Kanaa busu pɔ aa ku a guu nibɔɔ ũ kpamá. 5Ma Isailiɔ aaukɛa mà an zɔblea Egipiɔnɛ yãi, mɛ́ ma bàa pɔ kuńnɔpi yã i sãmaguo. 6Ayãmɛto o Isailiɔnɛ ǹ mɛ: Mamɛ má Dii ũ, má á bɔ zĩ gbãa pɔ Egipiɔ dàɛ́ guu, mí á bo. Má yãkpalɛkɛńnɔ, mí á bo ń ma gãsa gbãao. 7Má á sɛ́ ma gbɛ̃́ɔ ũ, míɔ dɛ á Lua ũ, íɔ dɔ̃ kɛ́ mamɛ má Dii á Lua pɔ á bɔ́lɛ Egipi zĩ gbãau ũ. 8Má gɛ́ánɔ busu pɔ ma a lɛgbɛ̃̀ Ablahaũ ń Izaakio ń Yakɔbuoɔnɛ guu. Má á gba àɔ vĩ. Mamɛ má Dii ũ.
9Mɔizi yãpi ò Isailiɔnɛ, kási aai aà yãmao, kɛ́ zɔzĩ pãsĩ ń kãdɛ̀ yãi. 10Ɔ̃ Dii ò Mɔiziɛ à mɛ̀: 11Gɛ ǹ o Egipiɔ ki Falaɔ̃ɛ aà Isailiɔ gbaɛ aa bɔlɛ a busuu. 12Ɔ̃ Mɔizi wè Diiwa à mɛ̀: Lá Isailiɔ lí ma yãmao, ma gbɛ̃́ pɔ ma lɛ́ gbia, kpelewa Falaɔ̃ a swãsɛ ma yãii?
Mɔizi ń Aalonao buibɔkĩi
13Dii yã'ò Mɔiziɛ ń Aalonao Isailiɔ ń Egipiɔ kiao yãmusu, a ònɛ́ aa Isailiɔ bɔlɛ Egipi. 14An bui uabeleɔn kɛ: Isaili nɛgɔ̃ɛ sɛ̃ia Lubɛni nɛgɔ̃ɛɔn kɛ: Anɔki, Palu, Ɛzɔ̃nɔ, Kaami. Lubɛni buiɔn we. 15Simɛɔ nɛgɔ̃ɛɔn kɛ: Yemuɛ, Yamini, Oada, Yakɛ̃, Zohaa ń Kanaa nɔɛ nɛ Sauluo. Simɛɔ buiɔn we. 16Levi nɛgɔ̃ɛɔ tɔ́ɔn kɛ an buiwa: Geesɔ̃, Kɛata, Mɛlali. Levi kɛ̀ wɛ̃̀ basoolokwi ń soplaoɛ (137). 17Geesɔ̃ nɛgɔ̃ɛɔn kɛ an buiwa: Libeni ń Simɛio. 18Kɛata nɛgɔ̃ɛɔ tɔ́ɔn kɛ: Amlaũ, Isaa, Hɛblɔ̃, Uziɛli. Kɛata kɛ̀ wɛ̃̀ basoolokwi ń aaɔ̃oɛ (133). 19Mɛlali nɛgɔ̃ɛɔn Mali ń Musio ũ. Levi buiɔn we daɛdaɛ.
20Amlaũ a mae dãe Yokɛbɛdɛ sɛ̀ nɔ ũ, ɔ̃ à Aalona ń Mɔizio ìò. Amlaũ kɛ̀ wɛ̃̀ basoolokwi ń soplaoɛ (137). 21Isaa nɛgɔ̃ɛɔn Kole ń Nɛfɛgio ń Zikelio ũ. 22Uziɛli nɛgɔ̃ɛɔn Misaɛli ń Ɛlɛzafão ń Sitelio ũ. 23Aalona Aminadabu nɛ Ɛlisɛba, Naasɔ̃ dãe sɛ̀ nɔ ũ, ɔ̃ à Nadabu ń Abiuo ń Ɛleazaao ń Itamaao ìò. 24Kole nɛgɔ̃ɛɔn Asii ń Ɛlikanao ń Abiasafao ũ. Kole buiɔn we. 25Aalona nɛ Ɛleazaa Putiɛli nɛnɔɛɔ do sɛ̀ nɔ ũ, ɔ̃ à Finɛasi ìò. Levi bui uabeleɔn we daɛdaɛ.
26Aalona ń Mɔizio ɔ̃ Dii ònɛ́ aa Isailiɔ bɔlɛ Egipi gãgã. 27Ampiɔ mɛ́ yã'ò Egipiɔ ki Falaɔ̃ɛ, kɛ́ wà Isailiɔ bɔlɛ Egipi. 28Kɛ́ Dii yã'ò Mɔiziɛ Egipi, 29à mɛ̀ ámɛaa Dii, yã pɔ álɛ oɛ̀ aà o Falaɔ̃ɛ pii. 30Ɔ̃ Mɔizi òɛ̀ a lɛ́ gbiaɛ, kpelewa Falaɔ̃ a a yãmai?
Currently Selected:
Bɔa 6: Boo2024
Highlight
Share
Copy
Want to have your highlights saved across all your devices? Sign up or sign in
Boko Bible © SIM International, 2024.
