Bɔa 40

Zwãakpɛ sakɛ̃a

1Dii ò Mɔiziɛ à mɛ̀: 2Zwãakpɛ pɔ dɛ kpaaũkpɛ ũ dɔ mɔ sɛ̃ia gɔɔ sɛ̃iazĩ, 3ní kpagolo pɔ ikoyã gbɛpɛpɛɛɔ ku a guu dilɛu, ní zwãa kpai. 4Gɛ̃ ń taabũnuo, ní a taɔ kalɛwà dɔɔdɔɔ. Gɛ̃ ń dauo, ní a filiaɔ kɛkɛ. 5Tulaleti katɛakĩi dilɛ ikoyã kpagolo aɛ, ní zwãakpɛ kpɛɛlɛ zwãataɛ. 6Sa pɔ wì a pɔ katɛu à tɛkũ okĩi dilɛ kpaaũkpɛ kpɛɛlɛ, 7ní dàa dilɛ kpaaũkpɛ ń sa'okĩio zãnguo, ní ikau. 8Kaada ǹ liai, ní zwãata kaapilɛ.

9Nisi pɔ wì pɔ dilɛò à gɔ̃ ma pɔ ũ sɛ ǹ ka kpɛ́piwa ń pɔ pɔ ku a guuɔ pii, ní dilɛ ma pɔ ũ ń a zĩkɛbɔɔ, aai gɔ̃ ma pɔ ũ. 10Nisipi ka sa'okĩi ń a zĩkɛbɔɔwa pii. Sa'okĩipi dilɛ ma pɔ ũ, iɔ dɛ ma pɔ ũ ń a mìbao. 11Nisika dàa ń a dibɔowa, aai gɔ̃ ma pɔ ũ. 12Mɔ́ ń Aalonao ń a nɛɔ kpaaũkpɛ kpɛɛlɛ, ní ń zu'o we. 13Sa'on pɔkasaɔ da Aalonaɛ, ní nisikawà ǹ aà dilɛ ma pɔ ũ, i gɔ̃ ma gbagbana ũ. 14Mɔ́ ń aà nɛɔ lɔ, ní ulatao dadanɛ́, 15ní nisikakamá lá ń kɛ̀ an maeɛwa, aaliɔ ma gbagba. Nisikaamapi mɛ́ a to aaɔ dɛ ma gbagbanaɔ ũ e an buiwa.

16Mɔizi kɛ̀ lá Dii òɛwa pii. 17An bɔa Egipi wɛ̃̀ plaade mɔ sɛ̃ia gɔɔ sɛ̃iazĩ ɔ̃ wà zwãakpɛpi dɔ̀. 18Kɛ́ Mɔizi lɛ́ kpɛ́pi dɔ, à a zɛbɔɔ dìlɛdilɛ gĩ́aɛ, ɔ̃ à a lipɛpɛɛɔ pɛ̀pɛu, à a lipɔ̃ɔɔ sɔ̀lɔsɔlɔu, ɔ̃ à lipɛlɛɔ pɛ̀lɛpɛlɛ. 19À zwãa kùa, ɔ̃ à báa kpàa lá Dii òɛwa. 20À ikoyã gbɛpɛpɛɛɔ sɛ̀lɛ a kà kpagolopiu, à kpagolopi sɛliɔ sɔ̀lɔ a zãɔ guu, ɔ̃ à a nɛ tàɛ. 21À gɛ̃̀ò zwãakpɛu, ɔ̃ à zwãa kpà ikoyã kpagolopizi suuna ũ lá Dii òɛwa. 22À taabũnu dìlɛ kpaaũkpɛu suunapi ɔplaai kpɛɛlɛ oi. 23À pɛ̃ɛ kàlɛwà Diiɛ dɔɔdɔɔ lá a òɛwa. 24À dau dìlɛ kpaaũkpɛu bɔaaa ń taabũnuo ɔzɛɛ oi, 25à filiaɔ nàna Dii aɛ lá a òɛwa. 26Ɔ̃ à tulaleti katɛakĩi dìlɛ kpaaũkpɛu suuna saɛ, 27ɔ̃ à tulaleti gĩnana kàtɛa lá Dii òɛwa. 28Ɔ̃ à zwãatà zwãakpɛpilɛ.

29À sa pɔ wì a pɔ katɛu à tɛkũ okĩi dìlɛ kpaaũkpɛ kpɛɛlɛ, ɔ̃ à sa pɔ wì a pɔ katɛu à tɛkũ òwà ń pɔwɛntio lá Dii òɛwa. 30À dàa dìlɛ kpaaũkpɛ zãnguo ń sa'okĩio, ɔ̃ à ikàu. 31Mɔizi ń Aalonao ń aà nɛɔ ń ɔɔ ń ń gbáɔ pìpiò. 32Tó aalɛ gɛ̃ kpaaũkpɛu ge tó aalɛ sɔ̃ sa'okĩizi, aaì ń ɔɔ ń ń gbáɔ pipi lá Dii ò Mɔiziɛwaɛ. 33Ɔ̃ à kaadà a lìa zwãakpɛi ń sa'okĩio, ɔ̃ à zwãatà kaalɛ. Màa Mɔizi zĩpi kɛ̀ a làa.

Dii pilaa kpaaũkpɛwa

(Nao 9.15-23)

34Ɔ̃ tɛlu kùlɛ kpaaũkpɛwa, Dii gawi zwãakpɛpi pà.#1 Kia 8.10-11; Isa 6.4; Eze 43.4-5; Zia 15.8 35Mɔizi i fɔ̃ gɛ̃̀ kpaaũkpɛpiuo, kɛ́ tɛlu kùa mɛ́ Dii gawi kpɛ́pi pà yãi.

36Isailiɔ taa'oa guu, tó tɛlupi gò zwãakpɛpia, ɔ̃ aaì fɛlɛ bòou. 37Tó tɛlupi i fɛlɛo, aali fɛlɛ bòouo, sema tó à fɛ̀lɛ. 38Fãanɛ Dii tɛlu ìɔ ku zwãakpɛa, gwã sɔ̃, tɛ́ mɛ́ ìɔ ku tɛlupiu. Màa Isailiɔ ìɔ e gɔɔpii ń taa'oa guu.

Currently Selected:

Bɔa 40: Boo2024

Highlight

Copy