Bɔa 3

Lua Mɔizi sisia

1Mɔizi lɛ́ a ãnsue Madiã busu sa'ona pɔɔ dã́, à gbáa baa vĩ̀ e à kà gbɛ pɔ wì mɛ Olebu kĩi. 2Ɔ̃ Dii Malaika bɔ̀ à mɔ̀wà tɛvua guu lɛlau. Mɔizi lɛpi gwà, a è tɛ́ dɔ a láu, kási àlɛ tɛkũo. 3Ɔ̃ à mɛ̀: Má gɛ́ dabupi gwaiɛ, mí e mà pɔ pɔ tò lɛpi lɛ́ tɛkũo dɔ̃. 4Kɛ́ Dii è à mɔ̀ gwai, ɔ̃ à lɛzùaazi za lɛlipi láu à mɛ̀: Mɔizi! Mɔizi! Ɔ̃ a wèwà à mɛ̀: Má kɛ́! 5Ɔ̃ Lua òɛ̀: Nsu sɔ̃io. Ǹ n kyale bɔbɔ, asa gu pɔ ń zɛau adoaɛ ma kua la yãi. 6Ɔ̃ à mɛ̀: Mamɛ má n deziɔ Ablahaũ ń Izaakio ń Yakɔbuo Lua ũ. Ɔ̃ Mɔizi ɔkù a wɛ́wa, kɛ́ a wɛsia Lualɛ vĩa vĩ yãi. 7Ɔ̃ Dii mɛ̀: Ma taasi pɔ ma gbɛ̃́ɔ lɛ́ kɛ Egipi è, mɛ́ ma wii pɔ an wɛtãnaɔ tò aalɛ lɛ́ mà. Má ń wãwãkɛa dɔ̃. 8Ayãmɛto ma pila mà ń sí Egipiɔwa, mí ń bɔlɛ busupiu, mí gɛńnɔ busu táaede yaasau, gu pɔ vĩ ń zɔ'io diu, busu pɔ Kanaaɔ kuu ń Hitiɔ ń Amɔleɔ ń Pɛliziɔ ń Hiviɔ ń Yebusiɔ. 9Isailiɔ wiilɛa ma le sa, mɛ́ ma ĩa pɔ Egipiɔ lɛ́ damá è. 10Gɛ́ sa, ma n zĩ Falaɔ̃wa, kɛ́ ǹ ma gbɛ̃́ Isailiɔ bɔlɛ Egipiɛ.#Zĩn 7.30-34 11Ɔ̃ Mɔizi ò Luaɛ: Dén ma ũ kɛ́ mà gɛ́ Falaɔ̃wa mà Isailiɔ bɔlɛ Egipii? 12Lua òɛ̀: Máɔ kunnɔɛ. Zĩa pɔ ma n zĩ seelan kɛ: Tó n ń bɔlɛ Egipi, á ma sisi gbɛɛ bee pɔlɛuɛ.

13Ɔ̃ Mɔizi ò Luaɛ: Tó ma gɛ má ò Isailiɔnɛ ma mɛ̀ an deziɔ Lua mɛ́ ma zĩmá, tó aa ma la n tɔ́i, kpelewa má onɛ́i? 14Lua wèwà à mɛ̀: Mamɛ má gbɛ̃́ pɔ má dɛ a ũ.#Zãa 8.24; Zia 1.4, 8 Onɛ́ mamɛ ma n zĩmá. 15Lua òɛ̀ lɔ: O Isailiɔnɛ ǹ mɛ ma Dii an deziɔ Ablahaũ ń Izaakio ń Yakɔbuo Lua mɛ́ n zĩmá. Ma tɔ́ɔn we gɔɔpii. Àɔ ma sisi màa e á buiwa.

16Gɛ ǹ Isaili gbɛ̃zɔ̃ɔɔ kãaa, ní onɛ́ ma Dii an deziɔ Ablahaũ ń Izaakio ń Yakɔbuo Lua mɛ́ bɔ̀ à mɔ̀ma. Onɛ́ malɛ ń e, ma yã pɔ wàlɛ kɛnɛ́ Egipi è. 17Má ń bɔlɛ Egipi, gu pɔ aalɛ taasikɛupi, mí gɛńnɔ busu pɔ Kanaaɔ kuu ń Hitiɔ ń Amɔleɔ ń Pɛliziɔ ń Hiviɔ ń Yebusiɔ, gu pɔ vĩ ń zɔ'io diu. 18Aa n yãmaɛ. Mpi ń Isaili gbɛ̃zɔ̃ɔɔ, à gɛ à Egipiɔ kia le, í oɛ̀ ma Dii Hɛbɛluɔ Lua mamɛ ma bɔ ma mɔwá, ma mɛ̀ aà á gba zɛ́ à gɛ́ gɔɔ aaɔ̃ kɛi gbáau, kɛ́ à e sa'o mapi ma Dii á Luawa. 19Má dɔ̃ kɛ́ Egipiɔ kia a wei à gɛ́o, mɛ́ i kɛ ma gãnàwà baasio. 20Má ɔtɔ̃ Egipiɔwa, mí dabudabuɔ kɛ mà kpaòńzi, i gbasa à á gbaɛ. 21Má tó Egipiɔ á wɛgwa, kɛ́ tó álɛ tá, á tá ɔgiio. 22Á nɔɛ pii ãnusu ge vua nɔamblebɔɔ ń pɔkasaɔ gbɛa a Egipi nɔɛ deewa ń ń nɔɛ pɔ ku a bɛɔ, í dada á nɛgɔ̃ɛɔ ń á nɛnɔɛɔnɛ. Màa á Egipiɔ pɔɔ simá dúuduu.

Currently Selected:

Bɔa 3: Boo2024

Highlight

Copy