Bɔa 13

Kaaso dikpɛ ń nɛgɔ̃ɛ sɛ̃iaɔ kpaa Luawao

1Dii ò Mɔiziɛ à mɛ̀: 2Isaili nɛgɔ̃ɛ sɛ̃iaɔ ń pɔtuo nɛsana sɛ̃iaɔ kpaa, asa ma pɔɔnɛ pii.#Luk 2.23

3Mɔizi ò gbɛ̃́ɔnɛ: À tó á bɔa Egipi zɔbleau gɔɔɛ bee yã àɔ dɔágu, asa Dii mɛ́ á bɔlɛ Egipi ń a ɔ gbãao. Ásuli pɔsɛa so gɔɔpi zĩ́o. 4Álɛ bɔlɛ Egipi mɔ sɛ̃ia pɔ wì mɛ Abibu guu gbãɛ. 5Dii lɛgbɛ̃̀ á deziɔnɛ à mɛ̀ á busu pɔ vĩ ń zɔ'io diu mɛ́ Kanaaɔ ń Hitiɔ ń Amɔleɔ ń Hiviɔ ń Yebusiɔ kuu kpawá. Tó Dii tò a kau, àli dikpɛpi kɛ mɔɛ beeu. 6Àliɔ kaaso gɔɔ sopla. A gɔɔ sopladepi iɔ dɛɛ́ Dii dikpɛ ũ. 7Àliɔ kaaso e gɔɔ soplapi gɛ paò. Pɔsɛa ge pɛ̃ɛsɛ'ɛsɛ suliɔ ku uae á busuu gɔɔ beeɔ guuo. 8Zĩ́ bee àli o á nɛgɔ̃ɛɔnɛ álɛ bee kɛ yã pɔ Dii kɛ̀ɛ́ kɛ́ à á bɔlɛ Egipi yãiɛ. 9Dikpɛpi iɔ dɛɛ́ seela ũ lan pɔ daa ɔwa ge dɔngubɔ yea mi'aɛwawa, Dii ikoyã iɔ dɔ á lɛ́u, asa ɔ̃mɛ á bɔlɛ Egipi ń a ɔ gbãao. 10Àliɔ ikoyãpi kũa a gɔɔwa wɛ̃ ń wɛ̃o.

11Tó Dii tò a ka Kanaa busuu, mɛ́ a kpàwá lá à a lɛgbɛ̃̀ɛ́ ń á deziɔwa, 12à á nɛgɔ̃ɛ sɛ̃iaɔ kpawà pii. Á pɔtuo nɛsana sɛ̃iaɔ iɔ dɛ aà pɔ ũ pii. 13Íli á zaa'ĩn nɛsana sɛ̃ia bo ń sãnɛo. Tó i boo, à a waa fĩ. À á nɛgɔ̃ɛ sɛ̃iaɔ bo pii. 14Tó á nɛgɔ̃ɛɔ á lá yãpi mii zia aa mɛ̀, bɔ́ yãn wei, à onɛ́, kɛ́ Dii wá bɔ́ zɔbleu Egipi ń a ɔ gbãao yãɛ. 15Kɛ́ Falaɔ̃ kugbãakɛ̀, à gì wá gbaɛi, ɔ̃ Dii Egipi nɛgɔ̃ɛ sɛ̃iaɔ dɛ̀dɛ pii ń pɔtuo nɛsana sɛ̃iaɔ pii. A yãi ɔ̃ wi sa'oiwà ń pɔtuo nɛsana sɛ̃iaɔ, mɛ́ wi wá nɛgɔ̃ɛ sɛ̃iaɔ bo. 16Bee aɔ dɛɛ́ seela ũ lan pɔdaa wá ɔwa ge pɔyea wá mi'aɛwawa, asa Dii mɛ́ wá bɔlɛ Egipi ń a ɔ gbãao.

Isailiɔ bɔlɛa Egipi

17Kɛ́ Falaɔ̃ Isailiɔ gbàɛ, Lua i bɔlɛńnɔ ń Filitɛ̃ɔ busu zɛ́o, baa ń a kãikɛo, asa à mɛ̀: Tó wà fɛ̀lɛmá ń zĩo, aa laasookɛ ɛa taa Egipiwaɛ. 18Lua dɔ̀i, à gbáa zɛ́ sɛ̀ńnɔ Isiatɛ̃a oi. Isailiɔ bɔ̀lɛ Egipi ń ń gɔ̃kɛbɔɔ kũa.

19Mɔizi Yosɛfu gɛ sɛ̀, àlɛ taò, asa Yosɛfu tò Isailiɔ lɛgbɛ̃̀ yãa à mɛ̀, tó Lua mɔ̀ ń bɔlɛi, aa a gɛwa sɛlɛ aa bɔò weɛ.#Daa 50.25; Yoz 24.32

20Kɛ́ aa bɔ̀ Suko, aa gɛ̀, aa bookpà gbáa lɛ́ Etaũ. 21Dii ìɔ dɔaaanɛ́ tɛlu guu fãanɛ, kɛ́ àɔ zɛ'ɔlɔnɛ́. Gwãasĩna sɔ̃, ìɔ dɔaaanɛ́ tɛ́ guu kɛ́ àɔ gupunɛ́, aaiɔ taa'o fãanɛ ń gwãasĩnao. 22Tɛlupi lí go ń aɛ fãanɛo, mɛ́ tɛ́pi lí go ń aɛ gwão.

Currently Selected:

Bɔa 13: Boo2024

Highlight

Copy