Luk 6
6
Bade efung Esabat
(Mat 12:1-8; Mak 2:23-28)
1Efung Esabat abehng eji Jisos jo jen go emahng ji bo bahme nkohl, owo abatꞌtoono ebe kehm jo laade nkohl, fere monngo amohk tv go arahn, jo li.
2Owo egom Farisi jindiki kehm bahbe bo re, “Jen ji wahnge ń kpꞌlimi ejum ji ntahm enyahre sahde re, nne kꞌjo lim efung Esabat?”
3Jisos kehm faange re, “Ń ka tiki lung bade ana Devid limi no ngare nyi njal yam-e no, a ane ebea? 4Á yele ekpꞌkpa Esowo, song rod abred nya bo limi bum go esamahr Esowo li, fere tob ka ane ebe ba jolo a ne, bo li, nya ki fuumu re nne awohng awohng li, sehngem abalimajom ba ba jo li.”
5Owo Jisos kehm kpe tong bo re, “Mmon no nne tob li nfono Esabat.”
Nne no ebo ebe lohngo no
(Mat 12:9-14; Mak 3:1-6)
6Efung Esabat bi Jisos kpe je go etahk ero song tib, nne awohng jolo o, no eboblum ebe lohngo no.
7Atꞌtibi ba atahm, a Bab Farisi, bo jo baab-e,#6:7 Luk 14:1. joare á bahke limi nne awohng awohng, á nob efung Esabat.
8Jisos kꞌkahn ntir atahng ebo, owo á kehm tongo nne no ebo ebe lohngo no re, “Ba, wo ba yiimi ana!”
Nne noo kehm mehle yiimi, jen song yiimi ona.
9Owo Jisos kehm tongo bo re, “N kp-n bahbe re, Anv, ntahm enyahre bungu re wahr jo lim jen efung Esabat, wahr jo kak na nne ebo, afi wahr jo rannge na? Wahr jo tahre elkpin nne, afi wahr jo rannge elkpin nne?”
10Eji á ma seenge bo, song jahm, owo á kehm tongo nne noo re, “Tanne ebo eba!” Á kehm limi ano. Ebo ebe kehm feere jol ana behko jang jang.
11Atahng kehm rake bo tete, bo kehm kehme eltoobo bo bo, ji bo bahke limi Jisos.
Ana Jisos yehke abatꞌtoono ebe, ewubu ane abal
(Mat 10:1-4; Mak 3:13-19)
12Ngare nyio Jisos kehm tahme go ewong re á song kak ero. Owo á kange no, jo kak ero ka Esowo. 13Eji efungfu ma se, á kehm lungu abatꞌtoono ebe tv elne, kehm jake ewubu ane abal, ba á jo lung bo re abatiingetib. 14A wo li ewubu ane abal ba á yehke no. Saimon ji Jisos ka-e mbing nyehko re Pita, a Andru mmonannyehn Pita, go Jems, Jon, Filip, Batolomi, 15Matiu, Tomos, Jems ji mmon Alfeus, a Saimon ji jo seb re ejahbe eje lohng go elwo ni aneb Rom, 16go Judas ji mmon a Jems, a Judas Iskariot ji gungu Jisos.#6:16 Jon 6:64,70; Elt 1:13.
Ana Jisos jo tib, fere lim ane, bo nob ayam ebo
(Mat 4:23-25)
17Eji Jisos jo badde a bo go ewong, á kehm ba yiimi edi ji li bale bale, a ellong abatꞌtoono ebe gbalee, a ellong ane tvv, ba lohngo go Judea kpee, fere lohng go Jerusalem, a ba lohng go nkpe agburu aya, ejang bi Taya, a Saidon. Bo ba re bo ba wuk-e, fere nob ayam ebo. 18Ane ba asabsab atohko jo gbiingi bo, bo nobo ane kpee. 19Ellong ane bao kpee jo sebe re, bo koor-e, tibre nsahm jo lohng-e lohng.#6:19 Mak 3:10; 5:27-28. Á fere lim bo, bo nob ane kpee.
Eyebatahng, a ndon
(Mat 5:1-12)
20Owo Jisos kehm tabe esamahr ebe seenge abatꞌtoono ebe, kehm bungu re,
“Elfuulu li ka wahn akpak, tibre etul bi Esowo bꞌbahne bi.#6:20 Mat 19:27-28.
21“Elfuulu li ka wahn ji njal kp-n yame anv, tibre ḿ bahke wohngo.#6:21 Jon 6:35.
“Elfuulu li ka wahn ji kpꞌlingi anv, tibre ḿ bahke wolo asol.#6:21 Ell 7:16-17.
22“Elfuulu li ka wahn, ane lꞌko-n ekv tib go esi ji Mmon no nne, fere yab a nahne, jo su-n, fere jo bung re, wahn abi ane ba.#6:22 1 Pit 4:14-16.
23“Jo belen eyebatahng, nsol ana nyio lꞌlim, wahn fere jo siiki. Tibre egburu eltuuru enahne nia, nong-n go ejahbetul Esowo.#6:23 2 Pit 3:13. Tibre nsol nyꞌnehm ona nyi babnde ebo jo lim abanyehnamahr Esowo.
24“Eyuu a nahne, wahn afang ane, tibre wahn ebbel ejum ekakeltim ejahne.#6:24 Jems 5:1-3.
25“Eyuu a nahne, wahn ji kpꞌwohngo anv, tibre ḿ bahke jene njal njal.
“Eyuu a nahne, wahn ji kpꞌwolo anv, tibre ḿ bahke jehke ndon ndon, fere jo ling.
26“Eyuu a nahne, ane kpee lꞌjo tehk-n.#6:26 Jems 4:4. Tibre ano wo babnde ebo tob jo tehk akimfahnge abanyehnamahr.
Ana nnekv ewa bahke jo kor-a
(Mat 5:38-48)
27“N kp-n tongo wahn ji kpꞌwuungu atung re, Anebekv ebahne jo kor-n. Jo limen nnoobo ka ane ba kpo ko-n ekv.#6:27 Rom 12:20. 28Jo biren nnoobo tv ane ba kpo su-n. Jo kaken ero ka ane ba kpo lim-n ebi. 29Nne no lꞌrum-a elkpal, tob sennge ejang behko ka-e fvfo, á kpe-a rum. Nne no lꞌtaare nsubu enya, á lꞌkpe ba ewobo eja taare, tob yake ka-e. 30Jo ka nne awohng awohng ejum, no bahb-a no. Nne no lꞌtaare ejum eja, k-e tong re á feere a ji.
31“Ejum ajehng ajehng ji ń kpꞌsebe re ane jo lim ka-n, wahn fvfo, tob jo limen ano ka bo.#6:31 Mat 7:12. 32Ane ba ń kpo kor bo, bo lꞌjo kor-n, eltuuru ani Esowo bahk-n tuuru? Tibre ane ba, aneb abiafem kpo kor bo, bo ba fvfo kpo tob kor aneb abiafem. 33Ń lꞌjo lim nnoobo ka ane ba kpo lim nnoobo ka-n, eltuuru ani ḿ bahke bele? Tibre aneb abiafem kpo tob lim ano. 34Ń lꞌjo bong ane akpohko, ba ń tiri re bo bahke tob bong-n, eltuuru ani ḿ bahke bele? Tibre aneb abiafem kpo bong aneb abiafem, eji bo lꞌtob lim jang jang ka bo.
35“Nong, anebekv ebahne jo kor-n, wahn jo lim nnoobo. Jo bongen ane akpohko, wahn kꞌjo kunu ekpu re bo feere a nya ka-n. Ń lꞌlim ano, eltuuru enahne bahke gbale. Owo ḿ bahke kehm jolo abon ba Esowo bi gbale sehng. Tibre Esowo kpo lim nnoobo ka ane ba kil jo kak saam, fere tob lim nnoobo ka abi ane.
36“Nong, ane jo fil-n ndon, ana Nso ejahne, ane kpo fil-e ndon.”
Kana jo lam ane bako
(Mat 7:1-5)
37“Kana jo lam ane bako, Esowo wahn nehm tob lam. Kana jo tong ane re, bobli ebi, Esowo wahn nehm tob tong re, wahn ebli ebi. Jo tahmen ka ane, Esowo bahke tob tahm ka-n.#6:37 Mat 6:14. 38Jo kaan, Esowo bahk-n tob ka. Á bahke gare go ebam ji nno a nno, gbehke, fere so, kak, rur wꞌwohng, fere yaange kak egahne abam. Ana ń gare no ka, ano wo fvfo Esowo bahke tob gare ka-n.”#6:38 Mak 4:24.
39Jisos kehm tob tub bo elgan re, “Anv, nwakamahr a nne bahke ma tib nwakamahr nyehko mbanga? Bo ane abal abal nehm song gbo yel go elbinga?#6:39 Mat 15:14.
40“Nne no kpꞌkpili kpehme gbal sehnge ntꞌtibi ewe. Nne awohng awohng no lꞌkpili mal, á bahke jolo ana ntꞌtibi ewe.#6:40 Mat 10:24-25; Jon 15:20; Fil 1:29-30.
41“Jen ji wahnge a kpꞌseenge mmolsahk no wob mmonanne go elmahr, a kil eltiri bada nkporti nyi wob go ega elmahr? 42A bahke limi renan, kehm tongo mmonanne, re, ‘Nong, me n yehk-a mmolsahk no wob-a go elmahr,’ eji wofono antahng kil nyehne nkporti nyi wob-a go elmahr? Wobnob tane! Tohko gbo mbang yehke nkporti nyi wob go ega elmahr, eji a lꞌmal nyehn, yehke mmolsahk no wob mmonanne go elmahr.#6:42 1 Kor 9:27.
Eti, a akab akab enye
(Mat 7:16-20; 12:33-35)
43“Tibre eti ji nno ajehng ajehng limm, ji kpo kab asabsab akab. Jol fvfo, esabsab eti ajehng ajehng limm, ji kpo kab anoobo akab. 44Tibre eti ajehng ajehng, bo kpo liing-e go ege akab. Nnene limm, no kpo bong akab efig go asokonso, fere bong akab avain go egab.
45“Nsol afang nyi wob nnooba nne go ege eltim, nyi nyi á kpo yehke, lohng a nyi. Abꞌbi nsol nya wob ebi nne go ege eltim, nya nya á kpo yehke, lohng a nya. Tibre ji ma rur nne go eltim, ji ji kpo lohng-e go nnyo.
Ana ane abal si ntahk
(Mat 7:24-27)
46“Jen ji wahnge ń kpo lung-m re, ‘Ntul, Ntul!’ ń kil jo lim nsol nyi n kpo tong-n re wahn lim?
47“Nne awohng awohng no lꞌba go egame, ba wuk alum enyame, fere jo lim,#6:47 Jems 1:22-26. m bahk-n tibi elkohn nne no á li no. 48Á li ana nne no si etahk. Á kpa rꞌrahbe tete rehng go ekpartal,#6:48 Elt 17:11. kehm bumu nnahb ekahme enye o. Eji nnyel yele no, alahb jo gbul etahk jio, tikem ma gbehke egbehkegbehke, tibre nnahb ekahme nyio kuumu go ekpartal.
49“Nne no lꞌwuk alum enyame, fere ten go ellimi,#6:49 Jems 2:17. á li ana nne no si na si etahk eje kunu go ndi, kꞌbum nnahb ekahme. Eji alahb jo gbul etahk jio, kehm soro gbo kpee rꞌrere rꞌrere.”
Currently Selected:
Luk 6: ekaNT
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.