Sekaria 6

Itaan aatɔroku binaa aadaŋ

1M nan ki daŋ tidaŋ tiken. Tidaŋ timina ponn ni m nan kan itaan aatɔroku tiib binaa nyan ni tikumann aajoo ŋilee aakaasisik ni. 2Itaman le nan dar njan aatɔroku, le itanbɔn dar lelee yoo, 3le itapiin dar utatar, le itachachal dar unanar na. Itaan ngbaan mɔmɔk nan kpa mpɔɔn la. 4Le m baa ntuun ngbaan ke, “Uninkpel, itaan aatɔroku tiib ngbaan aatataa ye kinye?”

5Le u gar mi ke, “Itaan aatɔroku tiib binaa ngbaan le ye libuln#6.5: Hiibru aaliin ni, “libuln” ni “nwiin” ye limɔbaan la. ki nyani liwipuul, ni liwilir, ni ŋŋangan, ni ŋŋangii wɔb na, li laa nyan ni Uwumbɔr u yeh kitiŋ kee mɔmɔk na aanimbiin ni la. 6Tɔroku u itanbɔn dar na cha ŋŋangan wɔb Babiloŋ aatiŋ ni la, le itapiin yoo na cha liwilir wɔb, le itachachal yoo na cha kitiŋ ki bi ŋŋangii wɔb na ni.” 7Itaapɔɔn ngbaan aah nan nyan ni na, i nan gee mala ke i buen ki ti lik kitiŋ ngbaan aah bi pu na. Le ntuun ngbaan nan bui ke, “Li cha ki ti lik kitiŋ ngbaan aah bi pu na,” le i buen. 8Le ntuun ngbaan teen yin mi ki bui ke, “Itaan i buen ŋŋangan wɔb na sɔŋ Uwumbɔr aasui a.”

Uwumbɔr aah nan bui ke m di kibɔryikpupuk chiŋ Josua pu na

9Uwumbɔr le nan di tibɔr timina tuk mi. 10U nan bui ke, “Di bikusam bimina, Heldai, ni Tobija, ni Jedaya aah tii ipiin i na, ki buen mala Sefania aajapɔɔn Josia do. Bijab bee mɔmɔk nan nyan ni tinaagbiir ni, Babiloŋ aatiŋ ni, le ki gir ni. 11Di tikunabr ni salmaa u bi tii na ŋa kibɔryikpupuk, ki ti di chiŋ Jehosadak aajapɔɔn Josua, u ye Utotoorninkpel na. 12Bui u ke Uwumbɔr Mpɔɔnsakpiindaan bui ke, ‘Uja u bi yin u ke Mbon na ga pɔr waah bi nin chee na, ki gir maa min Uwumbɔr Aadichal. 13Uma le ga maa li, ki ga kan ubɔr aapak, ki ka waabɔrjal pu ki joo waanib. Utotoor ga li si gbɔk waabɔrjal, le bi ga li kpaan tun lituln nsuudoon ni kimɔbaan ni.’ 14Kibɔryikpupuk ngbaan ga li bi Uwumbɔr Aadichal ni ki teer binib Heldai, ni Tobija, ni Jedaya bɔr, ni Sefania aajapɔɔn Josia aaŋann pu la.”

15“Bijab ga nyan ni dandar ki nan ter baah ki bi maa Uwumbɔr Aadichal li na. Bi yaa ki gir maa li doo kan, le aa ga bee ke Uwumbɔr Mpɔɔnsakpiindaan le tun ni mi aa chee. Aa yaa kii Aadindaan Uwumbɔr aah len pu na mɔmɔk kan, nimina mɔmɔk ga ŋa.”

Currently Selected:

Sekaria 6: xonB

Highlight

Copy

Compare