Sekaria 4

Karyaa aah chɔŋni tiwan ni pu na aadaŋ

1Ntuun mu nan bi len m chee tibɔr na nan ki dan nan faa fiin mi ke maah dɔ geen le na. 2U nan baa mi ke, “Aa waa ba?”

Le m gar u ke, “Karyaa aah chɔŋni salmaa aawan ni pu na. Likpasambil chɔk ni paacham. Karyaa tiib bilole le chɔk ni pu ki kpa ŋipal. 3Olif aakpan aasui ilee le nan si gbɔk ni, bubaa si lipepel libaa, le buken mu si liken.” 4Le m baa ntuun ngbaan ke, “Uninkpel, tiwan ngbaan aatataa ye kinye?”

5Le u baa mi ke, “Saa nyi ii?”

Le m gar u ke, “Uninkpel, mbamɔn, maa nyi.”

10bLe ntuun ngbaan bui mi ke, “Karyaa tiib bilole ngbaan ye Uwumbɔr aanimbil ŋilole ŋi u joo lik dulnyaa wee mɔmɔk na la.”

11Le m baa u ke, “Tɔ, olif aakpan aasui ilee i si tiwan ngbaan aapepel ŋilee ngbaan na aatataa ye kinye? 12Tɔ, olif aabon ilee i bi gbɔk salmaa aakudɔ ilee i kpa tiloln aan olif aakpan diir koo na, mu aatataa ye kinye?”

13Le u baa mi ke, “Saa nyi ii?”

Le m gar u ke, “Uninkpel, mbamɔn, maa nyi.”

14Le u bui mi ke, “Ima le ye bijab bilee bi Uwumbɔr, u ye kitiŋ kee mɔmɔk Aawumbɔr na, nyan bi ke bi li tun waatuln na.”

Uwumbɔr aah puu tipuur ti tii Serubabel na

6Ntuun ngbaan le nan di tibɔr ti Uwumbɔr di tuk u na tuk mi, ke m di nabr Serubabel ke, “Aa ga nyaŋ, ni mu aan li ye bijab aapɔɔn, bee sin aabaa aapɔɔn, ni ga li ye Maafuur Nyaan aapɔɔn pu la. 7Ŋimuk ŋi filk ke ŋijoo na ga san cha si. Aa ga ki gir maa Maadichal; aa yaa ti di kookoo aatakpal di paan kan, le binib ngbaan ga teen mpɔɔn pu ke, ‘Kinyaan, kinyaan.’”

8Uwumbɔr aabɔr tiken nan ki fuu ni m chee. 9U nan bui ke, “Serubabel bil Maadichal aadinyikl aatakpal, le ki ga maa li doo. Nimina yaa nan ŋa kan, maanib ga bee ke min le tun ni si bi chee. 10aLituln ngbaan aah kaa chuun mala mala na, le bitaakpab yɔl. Tɔ, bi ga kan ke Serubabel beenin maa Maadichal cha la, le bisui ga piir.”

Currently Selected:

Sekaria 4: xonB

Highlight

Copy

Compare