Maika 7

Israel yaab aaninsuŋ aabimbin

1Maa kpa nsuupiin. M naahn uja u nkon joo u aan lisubil mu aa gur waasui pu, aan ndaan aasubil mu aa bi ŋaasui pu na la. Bi ker ŋisubil mɔmɔɔn ngbaan mɔmɔk a. 2Unii ubaa aa gur kitiŋ ngbaan pu ki bi chob, ubaa mu aa bi ki kii tii Uwumbɔr. Binib mɔmɔk ka kii ke bi ku binib biken la. Unii mɔmɔk dɔ ban udo yoo le u ku. 3Bi mɔmɔk ye binib bi nyi titunwanbir aatuln na la. Ŋitun aaninkpiib, ni bibɔlem ban igaŋgaŋlik la. Binib bi kpa mpɔɔn na len baah ban pu na la, le bi kpaani ki kpokl. 4Hali binib bi ŋan ki bi chob na aa kpa tinyoor tibaa ke timoor aah bi pu na la.

N‑yoonn mu Uwumbɔr ga di daa binib ngbaan aatafal, ke waah nan cha waabɔnabtiib sak bi pu na fuu ni a. Dandana wee, baalan ŋmal a. 5Taa tii aajɔ, bee aa ni unii u koo gbɔk tɔb na naadii. Li nyi saah len pu na, hali aapuu mu chee kan, li nyi. 6N‑yoonn mumina ponn ni le mbijabim yin bitetiib bijɔrb, le mpiibim aa keei binatiib aamɔi; le bipiisapɔm ni bichapiitiib jaa; le unii aadim ye udo lichiln ni aanib.#7.6: Lik Matiu 10.35-36; Luk 12.53.

7Le mma ga li lik Uwumbɔr pu; m ga ji limɔr ki li kii Uwumbɔr u ga gaa mi lii na. Maawumbɔr ga ŋun maayim.

Uwumbɔr ga gaa timi lii

8Timi aadim aa kpa nsan ke bi li kpa mpopiin timi aafalaa pu. Ti lir la, le ki mu tee ga ki fii. Ti bi mbɔmbɔɔn ni le dandana, le Uwumbɔr ga tii timi nwiihn. 9Ti tun Uwumbɔr titunwanbir, kina pu na, ni ŋan ke ti ji falaa waaŋuul pu. Nee aapuwɔb na u ga sil tipuwɔb ki toor taani u bi ŋa timi na. U ga nyan ni timi dan nwiihn ni; ti ga li bi ki ti saa n‑yoonn mu u ga gaa timi lii na. 10Timi aadim ga kan nimina, le ki ji inimɔɔn, bidimbaam bi nan ŋani timi yaansara ki bui ke, “Nidindaan Uwumbɔr bi la?” na. Ti ga kan binib aah nyaŋ bi pu na, ki taa bi bil kitiŋ ke tikpakpar na.

11Jerusalem aanib, n‑yoonn mu ni ga ki gir maa kitiŋ kee aagon na choo. N‑yoonn ngbaan le nimi aapepel ga moo kpee. 12Nimi aanib ga nya ni ni kookoo ki gir ni, ni chee; bi ga nya ni Asiria aatiŋ, ki bi liwipuul wɔb na ni, ki nya ni Ijipt aatiŋ ki bi liwipuul aaŋangii wɔb na, ki nya ni Yufrates aapepel wɔb, ki nya ni nnyusakpem, ni ŋijoo ŋi bi dandar na ni. 13Tɔ, kitiŋ kee tee ga kpaln nteer ŋmeen, binib bi bi ki pu na aatunwanbir pu.

Uwumbɔr aah san Israel yaab kinimbaak pu na

14Uwumbɔr, li bi saanib bi aa lee na chee ke upihdaan na. Bi yaa, ki bi kipɔɔk ni la, le kitiŋ ki nyuun na bi bi chee. Cha bi buen Basann, ni Gilead aapihkpaamoor ti nyuun na ni, ke baah nan bi n‑yaayoonn na pu na.

15Uwumbɔr, tun lijinjiir aatun tii timi saanib, ke saah nan ŋa pu n‑yoonn mu aa nan nyan ni timi Ijipt aatiŋ ni na. 16Ŋitimbol ga kan nimina le bitaakpab yɔl, le baan ki li kpa mpɔɔn. Bitaakpab aah ga yɔl pu na, le bi ga muib bimɔi ki ŋeeb bitafal mu. 17Bi ga baar kitiŋ titan ni, ke iwaa na la; bi ga nyan ni baadichal ŋi kpa ŋigon ŋi fɔk na ni, ki jii ijawaan pu. Ijawaan pu, bi ga fenn ban Tidindaan Uwumbɔr.

18Uwumbɔr, ubaa aa ki bi ke sin na; aa di cha pinn saanib bi ŋmar na aatunwanbir. Saa joo saaŋuul ni yunni, le ki tee gee ke aa mɔk timi ngeehm n‑yoonn mɔmɔk. 19Aa ga ki san timi kinimbaak lelee. Aa ga taa taa timi aatunwanbir ŋmal titan ni, ki di ti buen nnyusakpem aataab. 20Aa ga mɔk saanib, Abraham ni Jakob aayaabitiib, ke saah bi mbamɔm ki kpa ngeehm n‑yoonn mɔmɔk pu na, ke saah nan puu tii tiyaajatiib n‑yaayoonn na pu na.

Currently Selected:

Maika 7: xonB

Highlight

Copy

Compare