Hosea 1

1Bibɔrb bimina aah nan jin jin nnaan ki paan paan tɔb pu n‑yoonn mu aan Jehoas aajapɔɔn Jeroboam mu nan ye Israel aabɔr na, le Uwumbɔr nan di tibɔr timina tuk Beeri aajapɔɔn Hosea: Juda aabɔrb ngbaan le nan ye Usia, uma le nan puen jin nnaan, le Jotam paan u pu, le Ahas mu nan paan Jotam pu, le Hesekia ti gbeln puwɔb.

Hosea aapuu ni waabim aabɔr

2Uwumbɔr aah nan puen di Israel yaab aabɔr ti tuk Hosea na, u nan bui Hosea ke, “Ti ban upii ki yoor, aapuu ngbaan aan li ye upii kpala, le waabim mu ga li bi ke uma na la. Kina le maanib mu yii mi, kaa ye binib bi dii mi na.”

3Le Hosea nan ti yoor upii ubaa, bi yin u ke Gomer. Ute aayimbil le nan ye Diblaim. Baah nan ma baajan aabo u na nan ye ubijabo la, 4le Uwumbɔr bui Hosea ke, “Yin u ke ‘Jesreel,’ ba pu? naan yunn le m ga daa Israel aabɔr aatafal, uyaaja Jehu aah nan ku binib bi bi Jesreel ni na pu. M ban m kuln Jehu aanaan aadichal la. 5Le n‑yoonn ngbaan m ga bii Israel aajab aapɔɔn, Jesreel aafataŋ ni.”

6Gomer nan ki ma ubo uken, n‑yoonn mumina ma kan, u nan ye upiibo la. Le Uwumbɔr bui Hosea ke, “Yin u ke ‘Maaneen,’#1.6: Baaliin ni, bi yin u ke “Lo Ruhama”. ba pu? maan ki li neen Israel aanib, kaan ki di cha pinn bi. 7Tɔ, m ga li gee Juda yaab ma. Min, Bidindaan Uwumbɔr ga gaa bi lii, m mu aan di kijaak aajum, bee itɔi ni ipiin, bee itaan ni bitandam tun li.”

8Gomer aah lii waapiibo ngbaan na, u nan ki dek, le ki ki ma ubijabo. 9Uwumbɔr nan bui Hosea ke, “Yin u ke ‘Baa‑ye‑maanib,’#1.9: Baaliin ni, bi yin u ke “Lo Ami”. ba pu? Israel aanib aan ki li ye maanib, le m mu aan ki li ye Baawumbɔr.”

Israel aanaan ga ki gir maa

10Israel aanib ga li wiir ke nnyusakpem aatambol na la. Bi ga li wiir jer baah ga kahn, bee bi ŋaŋ bi pu na. Le Uwumbɔr bui bi n‑yoonn mue ke, “Naa ye maanib,” tɔ, n‑yoonn choo le u ga nan bui bi ke, “Ni ye min Uwumbɔr u bi na aabim la.”#1.10: Lik Rom Yaab 9.26. 11Juda aanib ni Israel aanib ga ki gir kpaan kimɔbaan. Bi ga kpaan le ki ban usaloln ubaa, le bi ga ki pɔr ki kan nkam baatiŋ ni. Een, Jesreel#1.11: Jesreel aatataa le ye ke “Uwumbɔr bun tijikaar la” ki mɔk ke binib ga pɔr ki kan nkam. aawiin daal ga li ye nwinkpaan la.

Currently Selected:

Hosea 1: xonB

Highlight

Copy

Compare