Esekiel 40

Uwumbɔr aah di Esekiel buen Jerusalem aatiŋ ni pu na

1Taah nan bi tinaagbiir ni pu na aabipɔln li nan ŋa ŋibin moninko ni ŋiŋmu na aawiin kipiik daal, baah nan nyaŋ Jerusalem aatiŋ pu na aabin kipiik ni ŋinaa aapuwɔb le nan bi na. Liyaadaal ngbaan le m nan kan ke Uwumbɔr aapɔɔn sakpiin na koo mi, le u yoor mi di buen. 2Ni nan ŋa mi ke tidaŋ na la, le Uwumbɔr di mi buen Israel aatiŋ pu, ki di mi tɔŋ lijool li paa na pu. M nan kan ŋidichal ŋibaa si mmɔb wɔb ki naahn kitiŋ kibaa. 3U nan moo di mi foor buen, le m kan unii u moor lak lak ke tikumann na. U nan joo tiwaŋaŋkaan ni bi di ŋitanyaan ŋa ni na, ni tikur aadabil li bi joo ŋaŋni tiwan na, ki si mbisamɔb mubaa chee.

4U nan bui mi ke, “Unibɔn, li lik. Li pel mbamɔm ki chuu tiwan ni mɔmɔk m ga mɔk si na ŋa aayil ni, ba pu? nima pu le m joo ni si. Aa ti tuk Israel yaab saah kan tiwan ni mɔmɔk na.”

Liwipuul wɔb aabisamɔb aabɔr

5Maah nan waa tiwan ni na nan ye Uwumbɔr Aadichal la, le ligoln mann goln li. Uja ngbaan nan di waakur aadabil li bi joo ŋaŋni tiwan aan laafɔfɔk ye ŋitaa kipiik na ŋaŋ ligoln ngbaan. Laafɔfɔk nan ye ŋitaa kipiik la, le ki gbei kina mu. 6U nan buen mbisamɔb mu lik liwipuul wɔb na chee. U nan jon ŋibimbin ŋi bi maa ki taar joi na, le ki ti ŋaŋ mbisamɔb ngbaan, le ki kan ke mu aawawaan ye ŋitaa kipiik la. 7Nima chee aapuwɔb na, nsan nan bi nima, le bikikiib aadir titataa bi lipepel mɔk pu, kidiik mɔk aafɔfɔk ni nwawaan nan ye ŋitaa kipiik la, le ŋigon ŋi nan bi tikaasisik ni na aah nan filk pu na ye ŋitaa ŋiniin. Bikikiib aadir ngbaan aapuwɔb na, nsan muken nan ki bi, le mu aafɔfɔk ye ŋitaa kipiik ki ti koo kinaakook ki si Uwumbɔr Aadichal ngbaan aanimbiin ni na. 8-9U nan ŋaŋ kinaakook ngbaan, ki kan ke kaawawaan ye ŋitaa kipiik ni ŋinaa la. Ki nan di ti naa mbisamɔb mu duun Uwumbɔr Aadichal na, le ki ti saa kaadoon chee na ŋigon ngbaan aah nan gbei pu na nan ye ŋitaa ŋinaa la. 10Bikikiib aadir ti mɔmɔk bi nsan ngbaan aapepel mɔmɔk pu na nan ye nwiwiir baan la, le ŋigon ŋi bi tikaasisik ni na mu aah gbei pu na ye tiwanbaan.

11Uja ngbaan nan ki paan ki ŋaŋ mbisamɔb ngbaan aasan aawawaan. Mu nan ye ŋitaa moninko ni ŋilee la, le aa yaa chuu piir jaaleŋ tiib bilee ngbaan kan, mpaan mu bi kaasisik ni na ye ŋitaa kipiik ni ŋiloob. 12Bikikiib aadiik mɔk aabisamɔb chee nan kpa ligoln li kaa fɔk paacham na, le laafɔfɔk ye ŋisaŋ ŋitaa ni ligeln, le laah gbei pu na mu ye kina. Tɔ, tidir ngbaan aafɔfɔk ni nwawaan nan ye ŋitaa kipiik la. 13U nan ki ŋaŋ kidiik kibaa aagoln ki yoor ti ker kidiik kiken nsan aapepel liken na aapuwɔb aagoln, le naafɔfɔk nan ye ŋitaa imonko ilee ni ŋilee. 14Kidiik ki nan ti gbeln kookoo na aabisamɔb nan ti chee lii lichiln libaa pu la. U nan ŋaŋ kidiik ngbaan le kaawawaan ye ŋitaa piitaa ni ŋinaa. 15Mbisamɔb mɔk ki ti nyan lipaal wɔb aagoln chee ki ti ker kookoo aadiik chee aafɔfɔk nan ye ŋitaa imonko inaa ni ŋinaa la. 16Ŋibun waatiir nan bi kidiik mɔmɔk aapuwɔb aagon pu, ni ponn ni aagon ŋi bi tidir ngbaan aakaasisik ni na pu. Bi nan naan naan ŋibɔkpal aasui ŋa ponn ni aagon ŋi lik nsan wɔb na pu.

Lichinjal aabɔr

17Uja ngbaan nan di mi dii nsan ki ti koo lichinjal ni. Bi nan maa tidir piitaa le tam ligoln ngbaan, le bi di ŋitakpal nak mpaan mu bi tidir ngbaan aabisamɔb wɔb na, 18ki mann lichiln ngbaan ti ton. Lichinjal ngbaan aa nan paa paacham ke kichinbik na.

19Mbisamɔb mubaa nan bi ki paa siib le ki di koo kichinbik ni. Uja ngbaan nan ŋaŋ nsan mu bi ibisamɔi ilee yee aakaasisik ni na, le mu aafɔfɔk nan ye ŋitaa nkub ni imonko itaa ni ŋiniin.

Ŋŋangan wɔb aabisamɔb aabɔr

20Uja ngbaan nan ŋaŋ mbisamɔb mu bi ŋŋangan wɔb ki cha lichinjal ni na. 21Bikikiib aadir titaa ti bi nsan ngbaan aapepel mɔmɔk pu na, ni ŋigon ŋi bi tikaasisik ni na, ni kinaakook na, ni liwipuul wɔb aabisamɔb yaan nan ye tiwanbaan la. Mbisamɔb ngbaan aafɔfɔk nan ye ŋitaa imonko inaa ni ŋinaa, le nwawaan ye ŋitaa imonko ilee ni ŋilee. 22Kinaakook, ni takolu tiib, ni baah naan ŋibɔkpal aasui i ŋa ŋigon pu na nan bi ke liwipuul wɔb aabisamɔb yaan na la. Ŋibimbin ŋi bi taar joi na nan ye ŋilole le lipepel lee wɔb, le kinaakook ti gbeln puwɔb ki lik lichiln ni. 23Lichiln limina aapepel liken wɔb ki nyan ŋŋangan wɔb aabisamɔb mue chee, mbisamɔb muken nan bi ki cha kichinbik ni, ke liwipuul wɔb aapepel aah bi pu na. Uja ngbaan nan ŋaŋ nsan mu bi ibisamɔi ilee ngbaan aakaasisik ni na, le mu aafɔfɔk nan ye ŋitaa nkub ni imonko itaa ni ŋiniin.

Ŋŋangii wɔb aabisamɔb

24Uja ngbaan nan ki di mi buen ŋŋangii wɔb, le ti ti ki kan mbisamɔb muken. U nan ŋaŋ muponn ni aagon, ni kinaakook, ki kan ni bi ke niken na la. 25Takolu tiib nan bi mbisamɔb mue mu aadir ni ke ŋipepel ŋiken na la. Mbisamɔb ngbaan aafɔfɔk nan ye ŋitaa imonko inaa ni ŋinaa la, le nwawaan mu ye ŋitaa imonko ilee ni ŋilee. 26Ŋibimbin ŋilole ŋi naa tɔb pu ki cha paacham na nan bi, aan bi taar joi fuu mbisamɔb ngbaan, le laanaakook mu ti gbeln puwɔb ki lik lichiln ni. Bi nan naan naan ŋibɔkpal aasui ŋa ponn ni aagon pu nsan wɔb. 27Mbisamɔb nan bi do mu ki cha kichinbik ni. Uja ngbaan nan ŋaŋ nsan mu bi ibisamɔi ilee ngbaan aakaasisik ni na, le mu mu ye ŋitaa nkub ni imonko itaa ni ŋiniin.

Kichinbik aabɔr: Ŋŋangii wɔb aapepel

28Uja ngbaan nan ki di mi dii ŋŋangii wɔb aabisamɔb koo kichinbik ni. U nan ŋaŋ mbisamɔb ngbaan, le mu ni ibisamɔi i bi lipaal aagoln ni na ye tiwanbaan. 29-30Mu aakikiib aadir, ni kinaakook, ni ponn ni aagon, ni ibisamɔi iken aakikiib aadir, ni kinaakook, ni ponn ni aagon ye tiwan nibaa la. Mbisamɔb mumina mu aadir nan kpa takolu tiib. Mu aafɔfɔk nan ye ŋitaa imonko inaa ni ŋinaa la, le nwawaan ye ŋitaa imonko ilee ni ŋilee. 31Mu aanaakook nan lik lichinjal wɔb la, le bi naan naan ŋibɔkpal aasui ŋa ŋigon pu, nsan wɔb aapepel. Do aabimbin ŋi naa tɔb pu ki cha paacham na aan bi taar joi na nan ye ŋiniin la.

Kichinbik aabɔr: Liwipuul wɔb aapepel

32Uja ngbaan nan ki di mi dii liwipuul wɔb aabisamɔb koo kichinbik ni. U nan ŋaŋ mbisamɔb ngbaan, ki kan mu ni iken na ye tiwanbaan la. 33Mu aakikiib aadir, ni kinaakook, ni ponn ni aagon, ni ibisamɔi iken na aakikiib aadir, ni kinaakook, ni ponn ni aagon nan ye tiwan nibaa la. Takolu tiib nan bi ki mann goln ni kookoo, ki bi kinaakook mu pu. Mu aafɔfɔk nan ye ŋitaa imonko inaa ni ŋinaa la, le nwawaan ye ŋitaa imonko ilee ni ŋilee. 34Kinaakook nan lik ni lichinjal wɔb la. Bi nan naan naan ŋibɔkpal aasui ŋa ŋigon pu, nsan aapepel wɔb. Do aabimbin ŋi bi taar joi na mu nan ye ŋiniin la.

Kichinbik aabɔr: Ŋŋangan wɔb aapepel

35Uja ngbaan nan ki di mi buen ŋŋangan wɔb aapepel aabisamɔb chee. U nan ŋaŋ mu, le mu ni iken na ye tiwanbaan. 36Mu mu nan kpa bikikiib aadir, ni ŋigon ŋi bi ŋa nyɔla nyɔla ŋi pu na, ni kinaakook, ni takolu tiib ni kookoo. Mu aafɔfɔk nan ye ŋitaa imonko inaa ni ŋinaa, le nwawaan ye ŋitaa imonko ilee ni ŋilee. 37Kinaakook nan lik ni lichinjal wɔb la. Bi nan naan naan ŋibɔkpal aasui ŋa ŋigon pu, nsan aapepel wɔb. Do mu aabimbin ŋi bi nan taar joi na nan ye ŋiniin la.

Tidir ti bi duun ŋŋangan wɔb aabisamɔb na aabɔr

38Kidiwaatiir kibaa nan bi lichinjal ni ki tab ponn ni aabisamɔb ŋŋangan wɔb. Ki nan piir lir kinaakook ki lik ni lichiln ni na, nima chee le bi finn kitork aawakor ti bi joo seer mmii ni timɔnn na. 39Teebul tiib binaa le nan bi kinaakook kee ponn ni, bilelee si lipepel mɔk pu. Teebul tiib ngbaan pu le bi nan kɔr kitork aawakor ti ga see mmii ni timɔnn na, ti ye titunwanbir aachapinn aatork, ni ti ye lipɔln aapam aatork na. 40Teebul tiib bimina aaboln binaa nan ki si kidiik ngbaan aapaal, bilelee si ŋŋangan aabisamɔb aapepel ŋilee ngbaan pu. 41Ni nan ti kpaan teebul tiib biniin pu le bi nan kɔr kitork aawakor: binaa nan si kidiik ni, le binaa mu si lipaal lichiln ni. 42Bi nan kpii ŋitakpal le ki di ŋa teebul tiib binaa bi nan bi kidiwaatiir na ni na. Bi nan kɔr kitork aawakor ti bi joo seer mmii ni timɔnn na bima pu la. Baah nan paa paacham pu na nan ye ŋisaŋ ŋitaa ni ligeln la, le baapaacham aafɔfɔk ni nwawaan nan ye ŋisaŋ ŋiŋmu. Tiwan ni mɔmɔk bi nan joo kɔr kitork aawakor na nan paani teebul tiib ngbaan pu la. 43Bi nan ŋa likɔl li aawawaan ye kiŋanbik kibaa na mann teebul tiib ngbaan aamɔju. Bi nan joo tinann ti mɔmɔk bi ga di see mmii ni timɔnn na paani teebul tiib ngbaan pu la.

Bitotoorb aadir

44U nan ki di mi koo kichinbik ni. Tidir tilee nan bi kichinbik ngbaan ni. Kibaa nan bi ŋŋangan aabisamɔb chee ki lik ŋŋangii wɔb, le kiken mu bi ŋŋangii wɔb aabisamɔb chee ki lik ŋŋangan wɔb. 45Uja ngbaan nan bui mi ke kidiik ki lik ŋŋangii wɔb na ye bitotoorb bi tun lituln Uwumbɔr Aadichal ni na aadiik la, 46le kidiik ki lik ŋŋangan wɔb na ye bitotoorb bi tun kitork aabimbiln pu aatuln na aadiik. Bitotoorb ngbaan mɔmɔk nan ye Sadok aayaabitiib la; bima baanja le nan ye Liifai aanibol ni aanib bi kpa nsan ke bi sil Uwumbɔr aanimbiin ni ki tun waatuln na.

Kichinbik, ni Uwumbɔr Aadichal aabɔr

47Uja ngbaan nan ŋaŋ kichinbik ngbaan, le ki nan ye ŋitaa nkub ni imonko itaa ni ŋiniin ŋipepel ŋinaa mɔmɔk pu. Uwumbɔr Aadichal nan bi laawilir wɔb la, le kitork aabimbiln si mbisamɔb wɔb. 48U nan di mi koo Uwumbɔr Aadichal aanaakook ni. U nan ŋaŋ kaabisamɔb: le mu aah waa pu na ye ŋitaa ŋiwae, le nwawaan ye ŋitaa moninko ni ŋinaa, le mu aagon aah gbei pu na ye ŋitaa ŋiŋmu ŋipepel mɔmɔk. 49Ŋibimbin ŋi naa tɔb pu ki cha paacham na le bi taar joi ki koo kinaakook ngbaan ni, le kaah nan fɔk pu na ye ŋitaa piitaa ni ŋinaa, le kaah nan waa pu na ye ŋitaa moninko. Jaatɔlk tiib bilee le nan si mbisamɔb chee, ubaa si lipepel mɔk pu.

Currently Selected:

Esekiel 40: xonB

Highlight

Copy

Compare